香港特別行政區 訴 王星傑
|
DCCC211/2011 香港特別行政區 區域法院 刑事案件2011年第211號 ----------------
---------------- 主審法官： 區域法院暫委法官林偉權 日期： 2011年5月26日上午10時11分
控罪： 販運危險藥物（Trafficking in a dangerous drug） ---------------- 判刑理由書 ---------------- 1.被告承認一項販運危險藥物罪，販運嘅毒品係氯胺酮，重量為25.62克混合物，內有純度21.55克氯胺酮。 2.案情指2011年1月8日晚上，警員發現被告行跡可疑，將佢截停，喺佢身上找到兩包毒品，即係控罪所指嘅氯胺酮。警誡下，被告承認佢替人帶運該兩包毒品。 3.喺警方進一步詢問之下，被告話佢識一個人叫做阿標，阿標叫被告將呢兩包毒品，由一個花槽嘅地方帶到同一座大廈嘅5字樓電錶房，並答應給予被告100元報酬，被告就係喺該大廈嘅5字樓被警方拘捕。 4.被告沒有案底，事發時剛滿16歲。 5.辯方律師在求情時指被告受人利用。被告教育未完成中三，律師指被告已經後悔，希望法庭給予被告機會，話被告決定改過，想接受一啲職業訓練，重新做人，先叫法庭替被告拿取一啲報告。 6.喺呢一種嚴重販運氯胺酮案件之中，上訴庭有判刑指引，以呢個純度嘅氯胺酮嚟計算，一個成年嘅罪犯就算冇前科，都應該被判監，起點為四年半監禁，認罪可獲三分一寬減，都要判監3年。被告剛滿16歲，唔算得極度年青，不過本席喺考慮判刑時，都要考慮點樣判刑係對呢個社會有更大嘅裨益，再其次就係考慮被告個人嘅利益。好明顯，被告嘅情況就係法庭好多時見到一啲年青人教養不足，法律知識薄弱，為咗一點錢財或者一點享受，就以身試法，唔知後果嚴重。若果判被告進入監獄數年，當然可以懲罰佢，但係喺令佢成長，學好做人同埋學好一啲專門知識方面，係不及要被告進入教導所呢一種懲教院所，教導所有佢一套完善嘅管教方法。根據法例，一個人被判入教導所，被囚禁係不少於6個月、不多過3年。通常嘅囚禁刑期大約18個月，然後就要接受不少於3年嘅監管，若果喺監管期間行為唔好，就會受到重召，係再度入教導所接受囚禁同埋教導。 7.本席認為喺被告嘅情況，教導所嘅判處唔算係一個輕省嘅刑罰，而且更能係令呢一個教養不足、學無所成嘅年青人係有機會喺教導所嘅制度之下，學好做人同埋學習一啲學識與及技能，等佢喺離開教導所之後，係能夠重新做人。 8.喺咁嘅情況之下，法庭認為可以不跟上訴庭頒下販運氯胺酮嘅一般判刑指引，而以一個恰當嘅教導所命令代替。本席喺呢件案件，判被告進入教導所。
|