香港特別行政區 訴 蔡宇城

HCCC96/2011

香港特別行政區

高等法院

原訟法庭

刑事案件2011年第96號

----------------

----------------------

判刑
以下內容乃法庭數碼錄音謄本

----------------------

官：　本案嘅被告係否認強姦罪，但係就承認交替罪，即係與16歲以下女童非法性交。控方係要求審訊嗰個強姦嘅控罪，最後陪審員係裁定強姦罪名不成立。

就與女童非法性交嘅定罪，本席首先取得咗教導所同埋感化官嘅報告，而有關嘅報告本席已經係閱讀過。

代表被告人嘅馮大律師今日係替被告做咗一個好詳盡嘅求情，可以話能夠替被告講嘅，馮大律師都已經向法庭係提出咗。馮大律師亦都將好幾封求情信呈交畀本席參考，其中有被告自己寫嘅，家人、老師同埋講師寫嘅都有，內容主要都係強調咗被告行為嘅正面因素，亦有多次提出話犯案可能係一時嘅衝動行為，當然基於被告自己嘅透露，一時衝動嘅講法未必能夠成立嘅。

喺呢一類案中，受害人嘅年紀係比較重要嘅考慮因素，本案中嘅女童喺事發嘅時間只有十三歲幾未到14歲。以本席喺視像系統見到呢名女童都明顯係天真孩子氣嘅。當然被告自己都唔係話年紀大，而基於陪審員嘅裁決，佢並冇強逼女童同佢性交，但係被告同咁細年紀嘅女孩性交都係嚴重嘅罪行嚟嘅，就算法庭判監禁都會係恰當嘅處理方法。兩份報告都指出話被告喺讀到高中嘅時間成績變差，無心向學，有時同朋友流連商場，又出夜街，並且係傾向沉迷電子遊戲，感化官嘅睇法係被告是否能夠成功接受感化呢，只係屬於邊緣嘅個案，被告實在係需要得到紀律上嘅訓練同埋道德教育。教導所嘅評估係如果被告能夠接受教導所嘅全面課程訓練，會幫助佢深切咁樣反省本身嘅問題，更可以加強佢守法嘅意識，因此教導所建議係被告接受教導所令嘅。當然，本席有考慮過被告係承認呢一項嘅控罪，但係呢一步係佢喺法庭裁決接納錄影會面之後嘅決定，無論如何，本席係需要對案件有整體嘅考慮，尤其係女童嘅年紀同埋被告自己嘅背景情況等等。

經考慮後，本席最後決定接納教導所嘅建議，本席會判被告入教導所。

法庭亦都下令指派心理專家，透過控方或者警方嘅安排與女童見面跟進。