香港特別行政區 訴 劉保全

HCCC369/2011

香港特別行政區

高等法院

原訟法庭

刑事案件2011年第369號

----------------

----------------

主審法官：高等法院法官彭偉昌

日期：2011年11月24日上午9時50分

控罪：　[1] 至 [2] 販運危險藥物（Trafficking in dangerous drugs）

----------------------

判刑
以下內容乃法庭數碼錄音謄本

----------------------

官：　　　　被告早於裁判法院承認過兩項販運危險藥物罪，而家交由我懲處。控罪一涉及嘅係以淨含毒量計1,810克氯胺酮同18.38克海洛英；控罪二則為以淨含毒量計2,196.67克氯胺酮同36.41克海洛英。

案情方面好簡單，被告喺涉案單位步出嘅時候，被海關截停搜查，發現控罪一嘅毒品。其後海關用佢身上嘅鎖匙進入涉案單位，又發現控罪二嘅毒品兼一批包裝工具。警誡下，被告承認所有毒品都係佢嘅，身上搵到嗰啲更係被運送給別人途中。

被告現年45歲，香港出生及受教育至初中程度，被捕時無業，靠拿取綜援維生。佢有十一次共十七項前科，04年嘅一項同為販運危險藥物，係認罪之後被判刑六年零八個月，可見涉及嘅毒品數量相當可觀嘅。然而，被告並未受到教訓，喺出獄之後三年再犯下本案，而且涉及毒品嘅數量有加冇減嘅。

求情時，律師亦好公道咁指出，佢可以為被告講嘅說話唔多，只係話佢及早認罪同有經濟壓力所以犯案，但呢啲都唔係有效嘅求情理由嚟。

非常明顯，控罪一同二嘅毒品同出於一批，加起嚟係4,006.67克氯胺酮同54.79克海洛英，如是者，兩項控罪加埋嘅總量刑起點，就應該係我認為21年。被告認罪，可得三分一嘅扣減，就下調至14年，此外就再冇減免嘅理由。

為達至呢個結果，我下令被告須為兩項控罪，每罪入獄12年，其中兩年分期，其餘同期，即係合共14年。