|
HCCC232/2011
香港特別行政區
高等法院
原訟法庭
刑事案件2011年第232號
----------------
| |
香港特別行政區 |
|
| |
訴 |
|
| |
單松健 |
（第一被告人） |
| |
韓志安 |
（第二被告人） |
----------------
|
出席人士：
|
律政司高級檢控官布偉倫先生，代表香港特別行政區
郭憬憲先生，由法律援助署委派的Tse Yuen Ting Wong律師行延聘，代表第一被告人
姚姜敬淑女士，由法律援助署委派的Haldanes律師行延聘，代表第二被告人
|
|
控罪：
|
[1] 販運危險藥物（Trafficking in a dangerous drug）
[2] 販運危險藥物（Trafficking in dangerous drugs）
[3] 至 [4] 管有危險藥物（Possession of a dangerous drug）
|
---------------------------------------------
判刑
以下內容乃法庭數碼錄音謄本
---------------------------------------------
官： 兩名被告，我叫佢哋做D1同D2，以共犯嘅身分承認兩項販運危險藥物罪（即控罪一），以淨含毒量計3.02公斤嘅氯胺酮同控罪二，同樣以淨含毒量計2.1公斤嘅氯胺酮同18.8克嘅可卡因。此外，D1獨自承認控罪四（一項管有危險藥物罪），即以淨含毒量計0.38克嘅可卡因，而D2則獨自承認控罪三（另一項管有危險藥物罪），即以淨含毒量計1.93克嘅可卡因。
案情方面好簡單，海關將載有兩名被告嘅汽車截停，發現控罪一嘅毒品。跟住海關從兩名被告登車前入過嘅小屋入面，又搵到控罪二嘅毒品同其他嘅工具，至於控罪三同四嘅少量毒品，則分別喺D2嘅屋企同埋D1身上搵到。
D1現年十八歲半，香港出生及受教育至中三，被捕時無業，與父母同埋家人同住。佢曾經喺09年9月（即係本案前十三個月），因管有攻擊性武器而遭警司警誡。
求情嗰陣時，律師話D1已經深感悔意，希望可以重新做人。
至於D2，佢今年25歲，香港出生及受教育至中三，被捕時據稱係倉務員，與女友同住。佢有六次（共八項）前科，其中三次係管有危險藥物、一次係販運，販運嗰次被處以16個月嘅監禁，當時係08年8月，最後一次管有則被處入獄8個月，宣判嘅日期係2011年2月16日。換言之，佢喺出獄後短時間，據稱係6個月即再犯下本案。
求情嗰陣時，律師好公道咁表示呢一類案件根本冇咩嘢求情理由，只係話佢曾經做過某啲行動，表現有悔意，即係不為控方所接納，只不過案例指明呢啲都唔係有效嘅求情理由嚟㗎。
控罪一同二所涉及嘅氯胺酮明顯係一批毒品，合計嘅數量有5.12公斤，佢哋嘅總量刑基準加埋有關嘅可卡因，就應該係22年，而兩名被告認罪可得三分一嘅扣減，就下調至十四年零八個月。為達致呢個目標，我下令D1同D2要為控罪一各自入獄11年，又為控罪二各自入獄12年，而後者嘅三年零八個月可以同控罪一分期執行，即係合共十四年零八個月。
至於D1同D2各自面對嘅兩項管有罪，認罪後均處以8個月嘅監禁即可，而且可與控罪一同二同期。換言之，D1同D2總共嘅刑期各自都係十四年零八個月。
有關向上訴法庭提出的相關上訴，請參閲CACC458/2011。 |