香港特別行政區 訴 李志忠

DCCC1046/2011

香港特別行政區

區域法院

刑事案件2011年第1046號

----------------

----------------

主審法官：　　區域法院暫委法官鍾偉強

日期：　　　　2011年12月21日上午10時45分

----------------

判刑理由書

----------------

1.被告人李志忠在本席面前承認兩項控罪。

2.第一項控罪，販運危險藥物，違反香港法例第134章第4（1）（a）同埋（3）條。罪行詳情就係喺2011年6月28號，喺沙田沙角邨雲雀樓C座嘅2樓樓梯間，非法販運藥物，涉及13.40克嘅粉末裡面含有10.03克氯胺酮。

3.第二項控罪管有危險藥物，違反香港法例第134章第8（1）（a）同埋（2）條。罪行詳情係指你喺2011年6月28號，喺沙田沙角邨雲雀樓C座嘅214室，管有危險藥物，即係3.30克粉末裡面含有2.59克嘅氯胺酮。

4.案件嘅罪行嗰個事實你都承認咗㗎喇，亦都相當簡單，就係案發當日，即係2011年6月28號，喺呢個雲雀樓嘅2樓梯間，警方截停你，咁就喺你嘅右前褲袋搵到一包毒品，就即係控罪一所指嘅13.04克裡面含有10.03克嘅氯胺酮，當時你承認呢一包毒品係氯胺酮，亦都承認你自己住喺214室同座大廈，咁跟住警方帶你返去屋企，就喺廚房嘅儲物櫃嗰度搵到一個膠袋，裡面就分別藏有一個膠袋，就亦都係裝住一啲氯胺酮，咁亦都有一個膠管，亦都係有氯胺酮嘅成份，總共就係第二項控罪所指嘅3.30克粉末裡面含有2.59克嘅氯胺酮，咁同裡面亦都係有一個電子磅、有一百四十三個可以再封口嘅膠袋同埋一張交易紀錄紙，咁你亦都承認就係，呢啲係裝有氯胺酮毒品嘅物品嚟。咁拘捕你嘅時候，你身上並冇現金。根據控方指出，就係證物1嘅市值大約係1,447港幣，而證物2同3，即係嗰個細膠袋，喺屋企搵到嘅，裡面嘅毒品就大約值366鈫。

5.你現年29歲，已婚，有兩個細路，一個兩歲，一個四歲，基本上屋企係靠綜援嚟支持。你就話有做散工，就每個月二三千鈫。你總共有四次案底，其中兩次係涉及毒品，最後一次係去年2010年6月14號，因為兩項藏毒罪，就被法庭判咗4個月監禁，但係緩刑1年。喺本案案發嘅時候，就係你剛剛過咗呢個緩刑嘅時間。據講，你太太係家庭主婦，亦都因為呢件事件而患上抑鬱症。

6.我睇過你同太太提交出嚟嘅求情信，基本上你嘅意思都係話自己有悔意，咁就希望可以家庭團聚，太太亦都想法庭對你輕判，亦都有其他兩封求情信，講到你平時工作其實都係好勤力嘅，刻苦耐勞，樂於助人。

7.毒品案，尤其是販毒案，係好嚴重嘅罪行，上訴庭亦都有講過，個人背景對於個判刑基本上係冇影響嘅，除非係好特別嘅情況。你個人嘅背景，我就睇唔到有咩嘢特別情況，係可以令到我唔依據呢個上訴庭嘅指引。

8.根據香港特別行政區訴許守城呢個案件（[2009] 1 HKLRD 1），上訴庭話過，販運10至50克嘅氯胺酮，嗰個量刑起點就應該係4至6年。我基本上睇唔到有乜嘢特別嘅理由本席係應該唔跟呢一個守則。至於第二項控罪嚟講，所涉及嘅毒品數量唔算多，但係亦都唔係少量。

9.你經你嘅大律師同埋你自己寫嘅信都想話畀本席聽，你因為今次嘅事件係好後悔，你亦都顯示你知道你嘅行為係影響到屋企人，尤其是你太太同埋兩個小朋友。但係從紀錄顯示，去年你已經就同一類型嘅事，因為毒品，法庭已經畀咗一次機會你，你似乎並冇珍惜。你嘅大律師已經將所有可能對你有利嘅說話向本席講過。根據你大律師話，你去年點解會接觸番毒品呢？係因為多咗個細路，而又受到壓力，呢個我唔覺得係求情說話，應該係加重刑罰嘅說話，既然你多咗個細路，既然你壓力大，更加要想辦法去幫屋企、幫太太，唔係自己走去食毒品，食毒品要錢㗎嘛，你係咪將啲奶粉錢都去買埋食毒品呢？自然唔得喇，咁你跟住就係走上呢一條販運毒品嘅路。路係你自己行嘅，就唔係由我去話畀你聽點行。

10.綜合晒以上我講出嚟嘅理由，控罪一，本席以4年作為量刑起點，唯一嘅求情因素就係你嘅認罪，所以扣減三分之一，第一項控罪嘅判刑係兩年零八個月。控罪二，本席以9個月作為起點，你認罪，亦都係有三分一嘅扣減，所以判刑係6個月。

11.本席接受你大律師所講，兩個控罪基本上係同時發生，我亦都留意到，就算第二條控罪係好似原本嘅控罪係販運都好喇，最終亦都唔會影響嗰個刑罰。基於咁嘅原因，本席就會將兩個控罪嘅刑期同期執行。

12.所以被告人總共入獄兩年零八個月。