案情指被告被警員觀察進入一楝大廈，警員喺梯間截停佢，要求搜身嘅時候，被告從腰間先後取出兩包毒品，並逐一撕破，部分嘅粉末係散落地上。後來警員制服佢，並且鎖上手銬。
被告共管有四包嘅毒品，經過化驗之後，證實為共含有940.73克粉末嘅721.36克氯胺酮。
被告承認替人運送「K仔」，佢會獲得500鈫嘅報酬，而毒品當時嘅零售價為港幣116,650元。
被告現年17歲，喺2011年1月21號因為管有危險藥物而被判戒毒所令，本案係喺該案擔保期間干犯嘅。
大律師喺求情嘅時候表示，被告喺被捕前係做裝修嘅散工，月入大約10,000鈫，父親已經去世，其他所有家人，今天均在法庭給予佢精神上嘅支持，佢今次係因為染上毒癮，欠下債項，而鋌而走險，干犯今次嘅控罪。大律師希望本席考慮到佢尚算年輕，今次係第一次干犯本類嘅案件，而喺一被捕嘅時候，已經同警方合作，並且承認控罪，希望法庭盡量予以輕判。
本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告認罪、大律師嘅求情，亦都閱讀咗被告本人、家人以及社工所撰寫嘅求情信。
根據許守城一案嘅量刑指引，販運600至到1000克嘅氯胺酮，起刑點係12至到14年。就住本案所涉及嘅712.36克（原文照錄）嘅氯胺酮，本席採納十二年半作為起刑點，被告承認控罪，予以三分之一嘅量刑扣減，判刑100個月，即係八年四個月。