香港特別行政區 訴 李兆偉

HCCC379/2011

香港特別行政區

高等法院

原訟法庭

刑事案件2011年第379號

----------------

----------------

--------------------------------------

判刑
以下內容乃法庭數碼錄音謄本

--------------------------------------

官：　

被告早於裁判法院承認過一項販運危險藥物罪，涉及以淨含毒量計87.69克嘅海洛英同324.51克嘅「冰」，而家交由我懲處。

案情方面好簡單，被告喺落馬洲管制站行出嚟，被警員發覺形跡可疑，將佢截停，結果搜出涉案毒品。警誡下，被告承認為錢替人從深圳將毒品帶到香港嘅。

被告現年38歲，香港出生及受教育至中五程度，之後喺酒店做散工，被捕時無業，喺大陸與妻子同女兒同住。此外，佢有七次共十四項前科，最後（即係09年2月）嗰次同為販運危險藥物，係區域法院嘅案件，處刑兩年半。換言之，被告喺出獄後不過八、九個月，即再犯下本案嘅。

求情時，律師指被告因為經濟理由而鋌而走險，但係呢啲都唔係有效嘅求情理由。觀乎涉案毒品嘅數量同埋呢次係一次跨境販運嘅事實，我認為一個合適嘅量刑基準係十五年半。被告認罪同埋卷宗所顯示嘅其他因素，就可下調百分之四十五至八年半，之後就再冇任何減免喇。

我宣判，被告須為本案入獄八年半。