被告承認兩項販運危險藥物罪，違反香港法例第134章《危險藥物條例》第4（1）（a）及（3）條。
案情指，警員截停、搜查從的士落車嘅被告，喺佢攜帶嘅袋中發現兩包毒品。其後化驗證實為內含402.17克氯胺酮嘅499.93克粉末。被告承認係一位朋友交畀佢，帶返屋企，已經收取咗500元，餘額後付。
後來警員從被告嘅住所另外搜出七包毒品同埋一盒可再封口膠袋、四個電子磅，另外有一個小型嘅透明膠袋，載有微量嘅毒品。被告亦都稱喺屋內嘅毒品係佢朋友交畀佢，放喺佢屋企度嘅。喺佢屋企撿獲嘅毒品其後化驗證實為473.42克嘅粉末內含152.15克嘅氯胺酮，以及內含224.61克可卡因嘅260.74克固體。所有嘅可卡因同埋氯胺酮當時嘅市值分別為港幣263,086元以及109,988元。
被告犯事嘅時候係16歲，而家已經17歲喇，之前冇刑事紀錄。根據佢嘅背景口供，佢係讀書讀到中二，之後根據大律師所指，佢因為反叛離校，做過散工，喺被捕嘅時候係做洗車工人。大律師指，被告第一時間認罪，希望法庭能夠寬大處理。
本席喺量刑嘅時候考慮咗本案嘅案情、涉及毒品嘅種類、重量、有關嘅量刑指引、被告承認控罪、大律師嘅求情，以及閱讀過被告母親所寫嘅求情信。
本案涉及兩種毒品，即係合共554.32克氯胺酮同埋224.61克可卡因，毒品總重量係773.93克。上訴庭喺葉偉賢（譯音）一案中指出，法庭喺量刑時候，現時多以組合量刑方法處理，即係須先考慮案中主要嘅毒品嘅重量予以起刑點，然後因應重量可觀嘅另外嘅毒品，將適當嘅起刑點往上調整。
本案主要嘅毒品無疑係可卡因，但係氯胺酮嘅重量係為可卡因嘅接近兩倍半，如果睇番每一種毒品嚟講，根據劉德明案，販運可卡因兩百至到四百克，起刑點應為12至到15年。本案涉及嘅係224.61克嘅可卡因，起刑點淨可卡因計，應為約12年。至於總數554.32克嘅氯胺酮，根據許守城案嘅量刑指引，係喺300至到600克嘅界別，即係9至到12年嘅量刑界別，起刑點應約為十一年半至十二年。
本席考慮到本案所涉及嘅毒品總重量係773.93克，如果將呢個總重量全部當為可卡因計，起刑點係約為21年；如果全部當為氯胺酮計，起刑點大概係12年。本席考慮到本案嘅氯胺酮嘅重量等於可卡因嘅重量嘅大概兩點五倍，所以起刑點應該係兩個起刑點嘅中位數字，但係傾向或者偏向氯胺酮嘅12年起刑點。本席認為一個總數15年嘅起刑點係合適嘅，予以三分之一嘅認罪扣減，判刑10年。兩項控罪分配如下：控罪一4年監禁，控罪二10年監禁，兩項控罪嘅監禁期同期執行。