香港特別行政區 訴 范家文

HCCC57/2012

香港特別行政區

高等法院

原訟法庭

刑事案件2012年第57號

----------------

----------------------

判刑
以下內容乃法庭數碼錄音謄本

----------------------

官：　

被告你經審訊之後，被裁定一判強姦罪成立。

案情方面好簡單，受害人X喺事發時係一名16歲嘅女學生，佢喺晚上同同齡嘅同學Y到蘭桂芳飲酒，結果醉倒喺街上。被告你經過，自動提出幫手，抱住X上的士不特止，仲喺冇被邀請嘅情況下同車，送到嗰兩個少女返屋企入面，之後某個階段，你更加喺房內同X發生性行為。

從陪審員嘅判決話你有罪，知道可以接受嘅事實係咩嘢呢？X當時係醉到係失去行為能力，根本冇能力同意抑或不同意同你性交嘅。

被告，你今年39歲，香港出生，並受教育至中五程度，之後做過裝修、文員同警察。被捕時係一名助理保安經理，與父母及呢一個弟弟同住。冇刑事定罪紀錄。

求情，律師基本上係冇咩嘢說話好講嘅，主要指本案冇涉及暴力。

我認為被告你嘅行為可恥，點解呢？X同Y去到今日尚且稚氣未除，一眼就睇得出十多歲嘅少女，事發時，我相信亦都係咁。你相反比佢哋年長一倍半，但係就乘人之危，登堂入室，情況令人髮指嘅。至於你喺審訊嘅辯護，我個人認為就更加係你自己先會相信會有人接納嘅啫，而且不斷喺度曲解，喺庭上曲解最初向警方招認過嘅某啲說話，試圖脫身，可以見到你根本毫無悔意。

綜觀一切嘅情況，我認為以5年為量刑嘅起點係合適嘅。你唔認罪，冇有效嘅求情理由，就應該維持喺本案嘅水平。

我宣判，你需要為本案入獄5年。

有關向上訴法庭提出的相關上訴，請參閲CACC310/2012。