被告人徐浩泰被控一項販運危險藥物罪，違反香港法例第134章《危險藥物條例》第4（1）（a）及（3）條。被告人喺裁判官席前認罪同埋同意案情之後，交付嚟高院嘅原訟庭判刑。
案情講，喺案發嗰日，被告人就喺油塘嘅地鐵站出口嗰度係被警員截查，當時警員係搜被告人手上住一個嘅袋，喺袋入面就係搵到而家控罪入面所講嘅危險藥物，即係0.24公斤（即係240克嘅粉末），而入面係有0.2公斤（即係200克）嘅氯胺酮，而呢個氯胺酮嘅市值大概係27,840鈫。
被告人喺干犯案件嘅時候係19歲，咁而家佢就其實下個月25號就會係20歲㗎喇，先前係冇任何刑事紀錄，讀書讀到去中學三年班。就做過售貨員，又喺水吧、喺酒樓做過，咁最後一份全職嘅工作係一間日式嘅餐廳做，咁喺舊年嘅10月開始直至到今年嘅1月就係做呢個散工，係侍應生。喺犯案件之前，係同爸爸、媽媽喺觀塘一個單位度住嘅。
被告人嘅代表沈大律師就告知本席，被告人就喺香港出世，不過好細個嘅時候已經返番去內地，當時同媽媽住喇，因為媽媽係內地人。後來，因為媽媽係有單程證，可以嚟到香港同爸爸團聚，咁被告就跟埋嚟香港，係可以同媽媽一齊。咁而沈大律師亦都話畀我聽，就被告嘅父母都係有一啲身體上嘅毛病，尤其係媽媽嗰方面係因為有抑鬱症嘅，咁係成三年㗎喇，所以就喺今年年頭就係冇再做到售貨員嘅工作，就係要去醫病。亦都係喺呢個咁困難嘅時期，因為即係家庭係冇晒呢個收入，所以被告人就被他人引誘，就係話去做呢一個販運危險藥物嘅工作喇。初初，根據沈大律師話畀我聽喇，受被告人你嘅指示，就話第一次被告你亦都係話唔做嘅，不過後屘終於就決定係鋌而走險，咁就應承咗做，當然個結果就係被捕喇，而家就好後悔，亦都係答應係會重新做人，同埋會喺呢個坐監嘅期間係完成中學嘅學業。
被告人媽媽、被告人個家姐（其實係養女嚟嘅）同埋被告嘅婆婆、姨媽同埋仲有一位外展社工都分別寫咗信畀本席係同被告人你求情嘅，咁就唔需要係話將每封信嗰個詳細內容講出嚟喇，因為我已經睇咗，咁好明顯，即係其實佢哋個個個講法都係被告人你本身係一個本性良善嘅人嚟，乖仔嚟，孝順仔嘅，咁媽媽同埋養子更加就係就而家被告發生喺你身上嘅事佢哋有自咎，即係認為--即係媽媽同埋個養子都認為係咪擺喺你身上嘅時間唔夠，所以令到你發生呢件事，而佢哋全部亦都係提到話你而家係點樣後悔喇，即係知道自己做錯咗，係決定重歸正途，全部都係要求本席係盡量輕判嘅。
販運危險藥物係一個非常之嚴重嘅罪行，而係拉到嘅時候就係受到好嚴重嘅懲罰，你個代表律師 ─ 被告人 ─ 都已經一定同你講咗喇，關於氯胺酮係有量刑指引嘅，上訴庭喺一件案件叫做許守城嘅，就係已經畀咗關於販運氯胺酮嘅量刑指引，如果係販運50至到300克嘅氯胺酮，個量刑起點係要喺6年至9年之間嘅。今次係被告人你第一次干犯任何刑事罪行，我亦都接納喺犯呢件案件之前你本身係一個本性良善嘅乖仔，同埋亦都係一個孝順仔。雖然本席係明瞭到你嘅家人即係面對嗰個嘅困境，佢哋本身有咩嘢困難，同埋你犯咗事之後要坐監，佢而家係會面對一啲嘅困境，但係我唔認為嗰個係構成一啲特別嘅理由係令本席唔使跟量刑嘅指引。我已經考慮咗你相對嚟講係比較年輕嘅情況，19歲，當時係咪？同埋今次你亦都係第一次干犯呢一個嘅罪行，所以我就係喺考慮6至9年呢一個範疇之內嗰個選擇一個量刑起點，我就決定咗六年半就係一個恰當嘅量刑起點。被告人你喺一早已經認罪喇，喺裁判處已經認罪，咁就可以得到三分之一嘅刑期扣減。再重申一次喇，被告人你本身屋企嗰個嘅情況就唔算係任何獨特嘅情況，令到本席可以除咗呢三分一之外係另外畀一個刑期嘅扣減。
當然本席係希望被告人你真係今次得到呢個教訓喇，以後真係唔好再去干犯任何嘅控罪，重新做人，亦都希望你盡量係利用而家要坐監呢段嘅時間係去充實自己，努力讀書，咁將來就能夠可以出嚟真係重新做人。本席亦都希望被告嘅媽媽同埋姊姊亦都唔再需要怪責自己，因為咁係於事無補嘅，不如將啲精力，即係與其去怪責自己，不如將啲經歷--即係嗰啲嘅力氣喇，可以講，就向--即係畀被告人你更多嘅支持同埋鼓勵同埋愛護，幫助被告人重新做人仲好喇。
因為我頭先已經講咗喇，量刑起點係六年半，畀咗被告人你三分之一刑期扣減之後，判刑就係四年四個月，咁即係話就而家呢項控罪，被告你係需要坐監四年四個月嘅。我諗你都知喇，如果你係行為良好，亦另外會有多三分之一嘅刑期扣減，咁你自己好自為之喇，坐低。