兩名被告係分別被控一項販運毒品罪，兩項控罪都涉及氯胺酮。第一項係1.59公斤；第二係1.28公斤。
兩名被告都承認控罪，並同意控方嘅案情撮要。簡單嚟講，海關毒品調查科嘅關員喺案發當天去到大埔區執行反毒品嘅任務。佢哋到達太和商場裡面嘅男廁觀察，後來發現兩名被告喺廁所裡面。最後關員見到係第一被告喺洗手盤旁邊，而第二被告就喺廁格裡面。關員喺第一被告手中攞嘅尼龍袋裡面搵到思疑毒品。喺警誡之下，第一被告係即時承認嗰啲係氯胺酮，佢亦都透露係話第二被告係將嗰啲毒品交畀佢。
至於第二被告，經調查之後，關員喺佢身上物品之中發現有電子磅同埋思疑嘅毒品。警誡之下，第二被告人係否認對毒品知情，佢亦都話係唔認識第一被告。喺後來嘅錄影會面之中，第一被告講出更多犯案嘅資料，並指出係第二被告將毒品交畀佢，同埋指示佢喺廁所裡面係包裝啲毒品嘅。第一被告承認，喺取得嗰啲毒品之後，會係喺上水嗰度分發。第二被告就係繼續否認呢個指控嘅。
第一被告今年係21歲，以往冇刑事紀錄；第二被告人今年44歲，有幾次並不相同嘅刑事紀錄。
本席已經聽取過兩位代表大律師詳細嘅求情，亦都閱讀過呈咗上法庭嘅家人、朋友替佢哋所寫嘅求情信件。
根據許守城案嘅指示，如果涉及販運超過1公斤嘅氯胺酮毒品嘅話，量刑基準係由14年起。考慮到本案嘅情況，以呢兩份嘅毒品數量都係相若，本席決定都係以十四年半作為刑期起點。
因為兩位被告都係承認控罪，所以係得到三分一嘅扣減，刑期就變為九年八個月。就第一被告而言，佢犯案時約為20歲，佢有即時承認，亦都坦白講出佢犯案嘅背景，甚至承認以往係做過好多次。根據紀錄，被告係有向海關提供協助，提供一啲嘅資料，雖然今次冇實際嘅結果，但係本席都接納第一被告係真心有悔意，同埋在有需要嘅情況之下，佢係有誠意去協助海關同埋控方嘅。考慮到佢嘅背景、年歲及所有情況，本席會將第一被告嘅刑期減為9年，希望被告能夠履行佢喺求情信入面所答應過嘅事情，努力學習，徹底改過。
至於第二被告人，佢已經係成年人，做事要對自己、對社會負責。佢有一個17歲嘅女兒，如果佢嘅女兒係被人教導、引誘去販毒嘅話，相信佢都係非常難過，亦都係不能接受嘅。希望被告能夠改過，建立番父親嘅榜樣，但係本席不認為有再減刑嘅空間喇。
總括嚟講，第一被告嘅判刑係9年；第二被告嘅判刑係九年八個月。至於第一被告人所呈上有一封嘅信件，法庭下令係打呢個火漆，同埋除非係有法庭嘅指示之下，否則係不能夠公開。