被告就被控一項販運毒品罪嘅，涉及嘅係13.50克嘅「冰」毒，咁佢係承認控罪喇，同埋嗰個同意嘅案情嘅。
簡單嚟講，案發當天被告喺落馬洲管制站入境大堂就準備返香港，喺嗰個時間佢係被海關關員截停搜身，期間被告想將一包物件放喺口入面，失敗之後佢就將物件係拋棄同埋用腳去踩。後來關員發現嗰包物件係裡面有一啲白色嘅晶體，被告就承認話嗰啲係「冰」毒，佢話係買嚟自己用嘅。
到後來嘅錄影會面時間，佢透露佢喺羅湖用咗5,000鈫買咗嗰啲「冰」係返嚟香港自用。被告又話每日就食一、兩次，咁呢啲毒品可以夠佢用十到十四日。佢話佢係司機，月入7,000鈫。
喺求情嘅時間，代表大律師就話，被告其實就仲另外有一份工嘅，咁入息總共大概有萬幾鈫。根據程國雄嘅案例呢一個數量嘅毒品係要判到七至十年嘅。被告由國內帶啲毒品嚟香港，咁所以構成販運。但係本席都要考慮被告所講，話係全部自用是否屬實。喺呢一個問題上，被告決定不上台作供喇，佢話佢唔想再花法庭嘅時間。但係以佢嘅背景嚟睇，佢應該都係毒品使用者。佢係喺09年9月同埋11月先後有藏毒同埋販毒嘅定罪嘅。
咁根據紀錄，被告喺2012年7月10日放監，一個月之後就再干犯咗呢一件案嘅。被告剛剛放監，除咗必要嘅使費，應該就唔會有太多嘅多餘錢去買咁多嘅毒品，加上要工作，照道理佢應該係喺香港去買啲細包份量嘅，去滿足佢嘅毒癮。綜觀本案嘅情況，喺冇其他證據嘅支持之下，本席難以接受被告話全部係自用嘅呢個講法。睇嚟佢應該係想搵快錢而幫手販運毒品嘅。但係本席不排除其中有啲係可以畀佢自用嘅份量。
本席會以7年作為刑期嘅起點，在扣除咗因為佢認罪而得到嘅三分一嘅減免之後，刑期會係四年八個月。法庭考慮到佢可能可以得到一小部分嘅毒品作為自用，咁本席決定將刑期係減為4年，咁本案嘅刑期係4年嘅。