被告係被控一項販運毒品罪，涉及一共係579.33克嘅可卡因。咁被告承認控罪，亦都同意控方嘅案情。
簡單嚟講，海關人員在檢查經香港轉運嘅行李時係留意到被告名下嘅行李箱，在向被告作調查搜身嘅時候，發現佢嘅胸罩裡面係藏有兩包可卡因。進一步嘅調查後，發現被告嘅陰道同埋大腸都係藏有毒品，亦屬於係可卡因嘅毒品嚟。起初嘅時間，被告都有話係有人將呢啲東西放入佢嘅陰道同埋直腸，佢係唔知道呢啲係乜嘢嚟，其實佢喺開始時亦否認知道胸罩裡面係有其他物品嘅。
被告今年係大概30歲，佢係泰國籍人士，佢未婚，但係喺泰國有十多歲嘅仔女，佢喺香港就並冇刑事紀錄。代表被告嘅張大律師向法庭求情嘅時候指出，被告因為失業，生活有困難，欠下高利貸，所以一時愚蠢，就被外籍男友利用，由巴西運送毒品，目的地應該會係泰國，咁之前被告係並冇收取過酬勞嘅。現時佢喺泰國嘅母親因為呢一件事受到刺激而中風，被告就係深感後悔嘅。被告自己都有寫求情信畀法庭，希望法庭能夠輕判。
根據劉德明（譯音）嘅案例，以呢一個數目嘅可卡因嚟到計算，刑期會係在15到20年間。本案涉及嘅係五百七十九克幾嘅可卡因，所以刑期起點應該係靠近20年嘅。其實本案明顯涉及國際販運，呢一個係加重刑罰嘅因素。經考慮之後，本席係會以20年作為刑期起點，被告認罪，咁法庭係會畀被告因為認罪而扣減嘅三分一嘅減免，刑期會係十三年四個月。
法庭理解，張大律師係希望盡量去協助被告，爭取較低嘅刑罰，但係上訴庭已經一早講明，外國人喺香港犯事服刑，並不構成減刑嘅理由。考慮到被告係初次面對一個頗長嘅刑期，雖然個人嘅困境並不係有效嘅求情因素，但係喺本案嘅情況下，本席會將刑期調整為13年。