被告承認兩項販運危險藥物罪，違反香港法例第134章《危險藥物條例》第4（1）（a）及（3）條。
被告喺步出一屋苑嘅時候，被警員截查，喺佢攜帶嘅膠袋內搜獲多包毒品。期後，警員以佢身上嘅鎖匙進入一單位，從單位內再撿獲多包毒品以及包裝毒品嘅工具，包括兩個電子磅、加熱封口機以及一啲空嘅透明袋。
佢所攜帶嘅毒品經過化驗之後，證實為140克固體內含110克可卡因，而喺住所入面嘅毒品就係510克嘅固體內含410克可卡因，所有嘅毒品當時嘅市值大約係六十二萬九千多元。
被告承認佢因為急需錢用，替家人還債，販運同埋出售該些毒品，佢話佢將會獲得4,000鈫嘅酬勞。喺事發嘅時候，佢正在按照指示將攜帶嘅毒品運交他人。
被告現年19歲，過往並冇刑事紀錄。大律師喺求情嘅時候表示，被告15歲已經開始加入職訓課程，學習咗半年嘅髮型設計，16歲開始從事運輸業。母親係清潔工人，而佢嘅父親自佢3歲嘅時候已經離棄家庭，佢喺工作嘅時候將月入嘅一半交與母親作家用。
大律師指，今次被告犯事係因為父親生意失敗，母親擔任擔保，欠下債項，佢為咗幫助母親還債又受咗損友嘅唆擺，先至鋌而走險干犯本案以其賺快錢，佢對呢件事件已經深感後悔，故第一時間認罪彰顯佢嘅悔意並承諾在囚嘅時間會努力讀書，希望出獄之後可以回饋社會、孝順母親。
本席喺量刑嘅時候考慮咗本案嘅案情、毒品嘅種類、總重量以及有關嘅量刑指引，同時考慮咗被告認罪、大律師嘅求情，又閱讀咗被告、被告母親以及更新會所撰寫嘅求情信。
根據量刑指引，販運可卡因重量400至600克，起刑點係15至20年。就本案兩項控罪所牽涉嘅毒品總重量係520克嘅可卡因，本席認為審訊後嘅刑期應該係十七年半，予以三分之一嘅認罪扣減，判刑係140個月（十一年零八個月），分配如下：控罪一，六年半；控罪二，十一年八個月，同期執行。