香港特別行政區 訴 盧心心
|
DCCC 1160/2013 香港特別行政區 區域法院 刑事案件2013年第1160號 ----------------
----------------
---------------- 判刑理由書 ---------------- 1.被告承認一項販運危險藥物罪，違反香港法例第134章《危險藥物條例》第4（1）（a）及（3）條。罪行詳情指，被告人於2013年7月20日，在香港九龍秀茂坪寶達邨達信樓（B座）2002室，非法販運內含15.40克可卡因的21.10克固體。 2.根據同意案情，涉案嘅毒品係喺被告人嘅睡房內發現，警方同時亦在房內發現一啲相信係包裝毒品嘅工具，包括一啲小包嘅透明膠袋內含毒品、一盒白色嘅粉末、兩個電子磅、一隻透明膠手套同埋一個膠袋，裡面有一沓可再封口嘅透明膠袋。毒品嘅總價值約為港幣20,340鈫，係一個相當可觀嘅數目。冇爭議嘅係被告人嘅男朋友係因為販毒而被判入獄，而雙方亦都同意喺本案裡面，被告人嘅角色係協助佢男朋友去處理呢啲毒品與及包裝工具，以逃避警方嘅調查。而本席亦都接納佢之所以觸犯今次嘅罪行係因為對佢男朋友嘅錯愛、愚蠢與及對法律嘅無知。 3.被告人案發嘅時候係19歲，現在係20歲，佢冇案底，有良好嘅家庭背景，亦都有支持佢嘅屋企人，佢現在已經後悔，而本席亦都有讀過佢代表大律師呈上法庭嘅求情信。 4.根據兩宗上訴法庭嘅案例，即係女皇訴劉德明（譯音）及另一人（[1990] 2 HKLR 370）與及律政司訴 Pedro Nel Rojas（[1994] 2 HKLR 69），販運15.4克可卡因係可被判入獄5至8年監禁，而呢一個量刑指引亦適用於初犯者。本席接受被告今次犯罪並非係為咗圖利，但無可否認嘅係佢冇將本案嘅毒品或者係包裝工具丟棄，因此毒品流入他人之手以致再被流傳嘅危險係唔能夠被忽略嘅。而代表被告人嘅葉大律師亦都認同監禁係無可避免嘅刑罰，但葉大律師請求本席喺5至8年嘅量刑嘅量刑基準底下，採納一個較低嘅量刑起點。 5.如果唔係被告人嘅特殊求情理由，本席係會採納五年五個月作為佢控罪嘅量刑起點，但因為被告人嘅求情原因，本席會採納一個較低嘅起點。本席採納5年，即係60個月作為量刑起點。又因為被告嘅認罪與及悔意同埋良好紀錄，給予三分之一嘅量刑折扣，減至40個月監禁。
|