被告係被控兩項販運危險藥物罪嘅，第一項涉及大約十五克嘅可卡因，咁第二項係涉及2.35公斤嘅氯胺酮。被告承認控罪，同埋係同意控方嘅呢個案情。
簡單嚟講，海關關員係首先喺深水埗一個大廈單位外面埋伏，見到被告人從單位出嚟嘅時候就將佢截停同埋搜身，關員喺被告身上搵到第一項控罪所指嘅可卡因。後來又喺搜查被告住所嘅時候，搵到第二控罪提到嘅氯胺酮。被告承認有關毒品係屬於佢嘅，身上嘅可卡因係佢準備去交畀人哋嘅，而氯胺酮都係用作販運用途嘅。
被告今年係23歲，佢以往並冇刑事紀錄，已婚，有一名八個月大嘅兒子。被告以往做過銀行推銷員等等，咁被捕時就係失業嘅。基於辯方嘅要求，本席曾經將案押後，等控方可以跟進一啲事情，但最新嘅情況係，似乎喺呢一方面並冇特別嘅進展。
代表被告大律師今朝係替被告求情，提到被告係因為金錢嘅壓力之下被壞人利用，咁今次佢知道要面對頗長時間嘅監禁，但係佢都會係積極面對嘅。大律師強調，被告以往並冇刑事紀錄，希望法庭可以採用較低嘅刑期起點，同埋盡量將刑期係以同期執行。
本席已經考慮過求情，同埋閱讀過幾封由被告同佢親人所撰寫嘅求情信，我都相信被告今次係真有悔意嘅，但係法庭都要根據上訴庭嘅指引去處理。考慮到相關嘅案例，特別係控方所提交嘅上訴庭單松健案之後，本席會有以下嘅決定：就第一項控罪，本席會以五年半作為刑期基準，減去三分一之後係三年八個月；就第二項控罪，本席會以18年作為刑期基準，減咗三分一之後係12年。
喺評估同期、分期嘅決定嘅時候，除咗考慮整體刑期外，本席亦會酌情考慮到被告相對都係年輕、初犯，亦係有意去提供協助嘅。本席下令第一項嘅刑期中嘅1年同第二項嘅刑期分期執行，因此，最後刑期係13年。本席要講明，呢一個結果係已經反映咗法庭所提到酌情考慮嘅上述求情因素。希望被告記住佢今天對佢父母、親人、妻子同埋兒子所作出嘅承諾。