被告人係被控一項販運毒品罪，涉及嘅毒品係大概27克嘅「冰」毒。
被告人承認控方嘅案情撮要，簡單嚟講，警務人員喺案發當天就係喺呢個黃大仙區進行掃毒嘅工作，期間截停咗被告，並最後喺佢身上搜到有關嘅毒品，將佢拘捕。咁呢啲毒品嘅零售價，大概係港幣兩萬鈫。
被告人以往係有兩次嘅藏毒紀錄，亦都試過有違反感化令，但係今次就第一次涉及販運毒品罪嘅。
代表大律師喺求情嘅時間係指出，被告因為受損友嘅影響，吸食毒品已經有七年喇，今次佢最後都係選擇承認控罪，因此希望法庭輕判嘅。
根據程國雄案例嘅指引，本席係經考慮後決定以七年半作為刑期嘅起點，咁呢一個嘅起點已經係一個較低嘅基準嚟㗎喇。
代表大律師提出話，被告坦白認罪，其實如果被告回顧一下呢一件案，佢都係浪費咗好多法庭同埋警方嘅時間，如果佢唔係話棄保潛逃，呢一件案不論個結果如何，應該一早就已經處理完畢，就唔使一件2012年嘅案係搞到而家先至係宣判嘅。
無論如何，本席都接納代表馬大律師所講嘅情況，就喺話被告最後都係選擇承認控罪，所以本席決定依然喺畀番被告全數三分一認罪方面嘅減免，因此刑期變成係5年嘅。至於被告嘅背景同埋佢個人嘅情況，咁本席係睇唔到有其他可以減刑嘅因素。馬大律師亦都提到，被告因為宗教嘅信仰，而佢思想係有所改變。其實本席亦都睇得到，被告人頗明顯地喺態度上係有改變嘅，由佢開頭比較係反叛、負面嘅情況係變得比較平和，法庭希望呢一個改變係真心同埋長久嘅改變。正如馬大律指出，被告依然係年輕，本席希望佢喺呢個監禁之後，能夠真係重新做人。