被告人被控一項販運毒品罪嘅，佢涉及嘅毒品係一共242.4克嘅氯胺酮，即係俗稱係「K仔」嘅毒品。被告係承認控罪，亦都同意咗控方嘅案情。
簡單嚟講，呢一件案係由被告住所嘅一名保安員起咗疑心而發現嘅事情。喺案發當天，該名大廈保安員喺早上巡樓嘅時候，喺唔同樓層嘅消防喉箱位置見到有可疑物品，喺巡完樓之後佢就去報警。警方到場進行調查，並喺保安員所報稱嘅幾個位置搵到有思疑嘅毒品，咁警員就喺附近埋伏監視。稍後，佢哋見到被告去到9樓，同埋由嗰個消防箱裡面攞咗一啲毒品出嚟。佢被拘捕及警誡下，被告就承認係替人哋運送「K仔」賺錢，佢亦都承認其他樓層消防箱嗰度嘅毒品都係屬於佢嘅。之後，警員帶同被告去撿走其他嘅毒品，期間亦都搵到可再封透明嘅膠袋同埋電子磅。咁所有「K仔」總共就係有上述嘅242.4克。
根據警方嘅估計，呢啲毒品嘅零售價大概係三萬幾鈫港幣。
被告今年21歲，佢喺內地出生嘅，係2006年先至嚟到香港定居，佢以前做過唔同嘅工作，包括侍應、酒吧同埋廚房等。佢以往係並冇刑事紀錄嘅。
代表被告人嘅陳大律師就指出，被告人同佢家人係住喺嗰個大廈裡面嘅7樓，佢嚟到香港之後，因為英文嘅成績未能跟上，只係讀到中一就冇再讀落去，佢父母都因為忙於工作，冇時間係嚴加看管。被告後來認識咗一啲壞朋友，咁喺大概三年前開始吸食毒品，期後因為想搵快錢，就加入咗販運毒品嘅圈子。佢承認係佢將嗰啲毒品放喺消防箱嗰度，以防佢父母係發現佢同毒品有關嘅。
陳大律師指出，同意案情所提到嘅幾包細啲嘅「K仔」係佢自用嘅，即係P1、P3、P4、P5呢幾包。至於喺佢手度攞住嘅吉野家手抽裡面所搵到嘅大包「K仔」，就係佢用來販運嘅，咁呢一包毒品嘅含量係兩百克。陳大律師指出，幾包細嘅「K仔」，化驗所係將佢哋混埋一齊嚟到處理，咁其實每包都只係大概10克，咁呢啲都係被告自用嘅。
喺被告嘅毒癮方面，同埋有部分毒品係自用嘅問題上，辯方就唔打算傳召被告人作供嘅，最後本席決定係先取得戒毒所報告作為參考。戒毒所報告嘅內容，本席已經小心睇咗。咁似乎戒毒所職員嘅調查都印證到陳大律師所提出嘅事情，本席接納被告自己喺犯案期間都係有毒癮嘅，而販毒係佢搵錢買毒品嘅其中原因。
雖然本席懷疑嗰幾包細啲嘅毒品係唔係真係被告完全用嚟自用嘅，但係考慮過案例所指出嘅因素，呢個案例係HKSAR v Wong Suet Hau and Anor（CA 366 & 487/2000年），本席並不排除辯方指細個幾包係被告自用嘅可能性。喺呢個情況之下，本席嘅處理方法會係以200克嘅「K仔」作為基礎去考慮本案嘅刑期基準。經考慮後，本席認為恰當嘅基準會係七年半，本席會給予被告因為佢承認控罪全數三分一嘅減免，咁刑期會變成係5年。另一方面，就算嗰幾包細啲份量嘅「K仔」係被告自用嘅話，咁法庭都應該係判刑嘅。原本法庭係打算加刑6個月至到1年嚟到反映呢幾包所謂自用嘅部分；其實呢幾包雖然話係比較細，但係整體嘅份量都唔係話太細嘅。
其實被告都唔係話真係年紀好細㗎喇，佢父母安排佢嚟香港，都係希望佢有一個更好嘅前途，但係被告明顯冇好好珍惜呢個機會。當然，由內地轉到香港嘅學校讀書係唔容易嘅事情，咁調番轉，香港學生如果突然之間要轉去內地嘅學校讀書亦都唔會係容易嘅。但係如果被告係努力嘅話，應該都能夠好似其他同樣情況嘅學生一樣係跟得上嘅，就算佢真係跟唔上，都應該係安分守己，好好哋搵份野做。本席相信，被告人嘅父親都唔係話英文好好，但係佢都能夠努力工作去賺錢養家嘅。被告嘅犯法行為確實係令佢父母極之失望，希望被告人喺懲教看管之下能夠重新學習，起碼係學番一門嘅手藝，出監之後能夠重新做人。
至於個刑期方面，本席亦都係破例酌情唔再去考慮自用嗰一部分嘅刑罰，咁因此刑期就係5年，希望被告人係好自為之。