香港特別行政區 訴 周吳彬
|
HCCC 178/2014 香港特別行政區 高等法院 原訟法庭 刑事案件2014年第178號 ----------------
---------------------- 判刑 以下內容乃法庭數碼錄音謄本 ---------------------- 官： 本案嘅被告人係承認咗一項販運毒品罪，涉及嘅毒品係190克俗稱「K仔」嘅毒品。 案情顯示，警員喺案發當天喺旺角嘅街頭截停咗被告，進行搜查，咁就喺佢手上嘅一個袋裡面搵到有關嘅毒品。在警誡下，被告就話佢因為欠債，所以幫人運送「K仔」去賺快錢。以呢一個份量嘅毒品，市值差唔多係要30,000鈫港元嘅。被告喺會面時有向警員進一步透露有關今次運毒嘅細節。 被告以往係並冇刑事紀錄嘅，佢今年19歲，犯事嘅時間（即係舊年）就只係18歲，佢讀書係讀到中一嘅。 代表被告嘅林大律師呈上咗兩封求情信，一封係被告母親所寫，另一封係外展社工所寫嘅。被告母親提到佢嘅背景同埋家庭狀況都係比較複雜，又因為佢忙於工作，冇辦法管教被告，曾經要將被告兩次交託畀喺內地嘅親戚照護嘅，而被告就一路變得反叛，又係讀書不成，最後走上犯罪嘅道路。外展社工亦都有指出，被告今次係因為要照顧中咗風嘅父親而欠下70,000鈫嘅債務，佢想盡早清還，所以係鋌而走險。照被告母親所講，被告喺咁樣嘅家庭狀況出世、長大，而父母都因為生活冇時間去管教佢，令佢自制能力係比較薄弱。本席只可以話佢咁樣係值得同情，但係犯案係佢自己嘅選擇，法庭只能夠根據法例去將佢判刑。 以判刑嘅案例嚟到講，50至300克嘅「K仔」會係6至到9年嘅判刑範疇，以190克嘅份量嚟講，其實應該係可以去到用七年半嚟到作為量刑起點嘅，咁林大律師所建議嘅六年半、六年，本席認為都並非係恰當。最後，本席決定會用七年作為本案嘅量刑起點。本席會給予被告全數因為佢承認控罪三分一嘅扣減，因此刑期變成係四年八個月。除此之外，本席係唔會因為被告嘅年紀或者其他嘅因素再作扣減。 就最近呢個法庭已經係處理過好幾件年輕人販毒嘅案件，最年輕嘅被告犯案時只有16、17歲，佢哋大部分都係冇刑事紀錄嘅年輕人，而每位被告都似乎係有好困難嘅個人或者家庭嘅情況，社工都不約而同咁樣話佢哋個個都係本性唔壞，係畀人帶壞或者教壞而犯案嘅。但係本席都要整體考慮到香港毒品嘅嚴重性，如果法庭隨便就話被告年輕就再減刑嘅話，可能會有更多嘅年輕人被誤導，最終受害嘅會係香港整體。 本案嘅判刑因此係四年八個月。本席都希望被告真係可以喺懲教嘅監管之下，立定決心，重新學習，重新做人。 | ||||||||||||||||||||||