本案有兩名被告人，各被控一項強姦罪，兩人都分別承認控罪。喺判處嘅時候，本席考慮咗整體情況，包括案件嘅性質同埋情節、兩名被告人嘅個人背景同埋辯方大律師嘅求情陳詞。
本案嘅事主係一名喺案發時14歲嘅中學女學生X，案情可以簡述如下：2014年3月初，X透過網上平台面書認識第一被告，兩人期後以流動電話程式WhatsApp溝通，亦都曾經見面約五次，喺其中一次見面嘅時候，經過第一被告人介紹，X認識咗第二被告。喺案發日傍晚，第一被告致電X要求佢前往青衣美景花園見面，X答應，佢乘坐的士前往美景花園，會合第一被告人之後，第一被告指示的士司機駛往青衣長宏邨，將X帶往第二被告嘅居所，即係案發地點。
到達之後，第一被告叫X前往洗澡，X獨自進入浴室預備洗澡，但係唔識得開啟浴室裡面嘅花灑，就向兩名被告求助，當時X以浴巾包裹身體，兩名被告人一齊進入浴室。第二被告幫X開啟花灑之後離開，第一被告冇離開，佢當時上身赤裸，伸手摸X嘅右胸兩次同埋下體一次，X喊住咁樣同第一被告講「唔好搞我喇，我要沖涼，你出番去喇。」第一被告話「妳放我咁多次飛機，又應承搵我，但係冇搵，係咪摸下都唔得？」佢仲脫咗佢自己條褲同X講「一齊沖囉」，X抗拒同埋不斷咁樣哭泣，第一被告著番條褲離開咗浴室。
X沖完涼之後著番衫返到去客廳食煙，食完煙之後，第一被告面對面咁樣抱住佢，將佢抱往客廳梳化後面一張床褥上面強吻佢，X擰頭話「唔好」，第一被告按住X嘅手強行脫去佢嘅衣服，又強吻佢嘅面同埋嘴，然後強行同佢性交，X一直喺度喊同埋用手試圖推開第一被告，但係冇辦法。喺性交期間，第二被告喺床褥尾撫摸同埋X嘅腳，X一直都喺度喊同埋掙扎，第一被告同X性交嘅時候冇使用避孕套，最後第一被告喺X嘅體外射精。完事之後，第一被告企咗起身，第二被告當時已經脫去衣服，佢隨即爬喺X身上用力咁樣按住X雙手，雖然X一直喊同埋掙扎，第二被告強姦咗佢，同樣冇使用避孕套，之後喺X嘅體外射精。完事之後，X進入浴室沖洗，後嚟第一被告問佢「幾時會再上嚟？如果妳唔講就嚟多鑊。」X只係想立即離開，所以回答話「聽日」。然後兩名被告就同X一齊落咗樓，送佢去附近嘅小巴站，X就離開咗。後嚟X由父親陪同去報案。
2014年4月23日，兩名被告前往警署自首之後被拘捕。
控方告知法庭X不願意為受害人心理報告有所參與，咁嘅情況，本席理解，控方亦都不堅持法庭應先聽取相關報告，然後先至判處。從案情可見，X喺過程裡面一直有喊，而且反抗不果，本席會以X受到一般呢類案件嘅受害人嘅心理創傷嚟作判處考慮嘅依歸。
第一被告人現年23歲，喺案發時22歲，佢係中三學業程度，曾經任職跟車工人、廚房工人、工廠工人、空調學徒同埋影音調售貨員。2008年曾經因為一宗販運危險藥物罪被判進入勞教中心。
辯方黃大律師喺求情嘅時候強調，第一被告人喺聆訊前嘅審核聆訊已經表示會承認控罪，佢係有真誠悔意嘅，而且認罪亦都可免X出庭作證之苦，亦都減輕咗控方同埋法庭嘅工作。黃大律師亦都指出第一被告人嘅父親喺第一被告人5歲嘅時候已經離逝，後嚟母親再婚，雖然第一被告人犯咗事，但係母親同埋繼父都係依然支持佢。辯方亦都交嚟咗第一被告人嘅信件同埋八封親友嘅求情信，喺信裡面，第一被告人表示悔意，亦都告知法庭佢已經信咗基督教，作咗反省，會走正路。法庭喺判處嘅時候必須依法理而行，第一被告人既然信咗基督，應當會明白神對悔改咗嘅人嘅應許。第一被告人嘅父母指出，第一被告人係孝順嘅兒子，二人同埋第一被告人嘅兄長都話佢係對家人盡責嘅，同事亦都話第一被告人工作勤奮，其他朋友亦都為第一被告人求情。
兩位辯護大律師都請法庭顧及：一，兩名被告人都冇用過份嘅武力，亦都冇使用或者威脅使用武器；二，事件歷時不長，兩名被告人亦都冇做到咩嘢令到X被侵犯嘅時間延長咗，亦都冇唔讓佢離開；三，兩名被告人都係到警署自首嘅。
第二被告人現年21歲，尚算年青，佢亦都係中三學業程度，係一名運輸工人，亦都曾經做過壽司店嘅學徒。2009年因為一宗管有危險藥物罪被判感化36個月。除咗本席剛才複述嘅事項，辯方蔡大律師亦都告知法庭，第二被告人嘅父親係患有思覺失調嘅，家庭嘅重擔落咗喺任職超級市場助理經理嘅母親身上。蔡大律師亦都力陳第二被告人喺案中並非擔當領導角色，佢係見到第一被告人嘅行為不能夠自控而犯案而已，絕無預謀犯案。辯方亦都呈遞咗第二被告人嘅信件，同埋四封親戚嘅信件作為求情。喺信裡面，第二被告人表示悔意，承諾會改過自新，佢嘅母親指出，第二被告人係善良嘅，亦都曾經參與義務工作，事情對第二被告人嘅父親有好大嘅影響，因為佢嘅精神健康有欠，兒子一向都係佢信賴嘅精神支柱，現時大受打擊，其他親戚都認為第二被告人本性不壞，犯案只係一念之差。
喺判處嘅時候，本席特別顧及咗以下嘅事項：一，X當時只係得14歲，案中冇任何嘅情況令到本席可以裁斷兩名被告人會誤以為X係年長好多嘅人，雙方交情不深，案件有被告人利用X年輕無措嘅成份。二，第一被告人將X帶到第二被告人嘅居所，叫佢沖涼，當X需要幫忙嘅時候，第一被告人乘住一段只係得佢哋兩個人喺浴室嘅機會猥褻侵犯X，仲曾經脫去自己嘅衣服，企圖不軌，當X沖完涼出嚟不久，第一被告人就有所行動，強姦咗X，呢啲行為著著顯示第一被告人一直不懷好意。三，兩名被告人冇用太過份嘅武力去令到X就範，但係當時X嘅不願意係明顯嘅。四，二人喺性交嘅時候都冇用安全套，帶嚟X有懷孕同埋其他健康嘅風險，幸而冇真係有呢啲重大嘅後遺情況發生。五，過程中冇特別變態嘅行為。六，X連續被兩個人侵犯，所受嘅屈辱同埋創傷不問而知，第二被告人當時明知道情況係咁樣嘅，至於第一被告人以整體情況嚟講，尤其是佢將X帶到第二被告人嘅居所，佢嘅整體行為明顯反映佢居心不良，佢明目張膽咁樣喺第二被告人面前強姦X，此舉本身已經令到X增加咗屈辱，佢亦都對第二被告人嘅虎視眈眈，最終亦都侵犯咗X，毫不理會。七，喺X被兩個人侵犯之後，第一被告人仲對X講咗一啲具威嚇侮辱性嘅說話。
考慮咗整體情況，本席認為案件有相當嘅嚴重性，本席亦都認為雖然案件喺第二被告人嘅居所發生，但係第一被告人嘅所作所為明顯顯示佢係主導嘅，亦都利用咗佢同X嘅認識關係，將佢誘至犯案地點，到達之後不久就率先侵犯咗X。至於第二被告人，佢喺X被第一被告人強姦之後，就接住強姦咗X，雖然佢並冇協助第一被告人制服X，兩個人亦都唔算合力行事，但係事件喺第二被告人嘅家中發生，佢冇做到丁點兒嘅事情去令到X脫離第一被告人嘅侵犯，雖云喺法律上嚴格嚟講，佢冇責任去咁做，但係客觀事實係第二被告人提供咗一個不會被他人見到嘅地方，讓第一被告人侵犯X，而第二被告人喺X被第一被告人侵犯嘅時候，亦都同時撫摸X嘅腳，喺第一被告人完事之後，第二被告人就隨即強姦X，加重咗X所受嘅傷害。
本席認為兩人嘅刑責並非冇分別，但係差別並不至到令到刑期有何影響，本席認為對兩名被告人而言，都採用七年半作為量刑基準係合適嘅，亦都足以反映兩個人嘅罪行嘅嚴重程度。考慮咗整體情況，包括兩名辯方大律師嘅求情陳詞，因為被告人承認控罪，應該得到三分一嘅刑期扣減，本席認為呢個就係兩名被告人應該得到嘅刑期扣減幅度。
兩名被告人請起立，基於上述理由，第一被告人，本席判你就第一控罪監禁5年，第二被告人，本席亦都就第二控罪判你監禁5年。