被告人被控一項販運毒品罪，涉及嘅毒品係九百五十幾克嘅「冰」毒。被告係承認控罪同埋同意控方嘅案情。
簡單嚟講，有關案情係在案發當天下午，海關人員喺36號登機閘口截停咗被告，後來喺佢雙腳上發現綁上咗控罪所指嘅「冰」毒。當時被告係準備上機去紐西蘭嘅。
在警誡下被告承認替人販運毒品去紐西蘭，而佢係會得到三萬幾鈫嘅報酬。後來喺錄影會面嘅時候，被告向關員係進一步交代咗犯案嘅背景同埋過程。
被告今年25歲，佢讀書就係到中五嘅程度，家中有父母，佢自己係做呢個海鮮檔嘅售貨員嘅，佢並非係吸毒者。
在替被告求情嘅時候，張大律師向法庭陳述，指被告嘅父親係患上咗精神病，因此不能繼續工作，而佢自己嘅入息亦都係有限，因此係有經濟上嘅壓力，所以佢經不起朋友嘅引誘去幫佢販毒。
其實喺安排嘅過程中佢係曾經想過退出，但係對方就威逼利誘佢，要佢繼續進行。張大律師係接納，根據本案嘅犯案日期，上訴庭喺Tam Yi Chun案中嘅指引係適用，因此以本案涉及嘅毒品數量而言，判刑應該屬於20到30年嘅範疇。張大律師亦都接納，因為國際因素呢一方面，呢一點亦都係提高刑期起點嘅原因嚟嘅，但係佢希望法庭能夠整體考慮，採納一個較低嘅量刑起點。
本席經考慮後係會用二十二年半作為刑期基準，呢一方面係已經包括咗國際販運嘅呢個加刑因素。被告承認控罪，本席會給予佢全數三分一嘅扣減，因此刑期變成15年。被告今次係初犯，雖然佢已經係成年，但係依然可以算得話係年輕，今次佢係要面對咁長時間嘅監禁，對佢應該已經構成一個好大嘅教訓，對佢家人亦都會係一個嚴重嘅打擊，本席最後決定酌情將刑期減1年，因此個刑期係14年。
希望被告係能夠好自為之，喺服刑嘅時間保持良好嘅行為，同埋能夠利用懲教署所提供嘅學習機會，將來服刑之後係能夠真係重新做人。