被告戴俊威被控一項販運危險藥物罪，違反香港法例第134章《危險藥物條例》第4（1）（a）同埋（3）條。被告人喺裁判官席前承認咗控罪同埋同意案情之後，交付嚟高等法院原訟庭判刑。
睇番案情，案情顯示，喺案發當日，警方就喺慈雲山區進行一個反毒品嘅行動。當時就見到被告人你，就喺毓華街度就截停咗你，當時其實你係同另外一個女士一齊行。搜你身嘅時候，就發現到有十一包嘅物品，後屘經過化驗之後，證明係內含99.28克呢個氯胺酮嘅127.13克嘅粉末，而呢十一包嘢就係收埋喺你著嘅褲嘅右邊袋。當時警方就拉你，警誡之下，被告你就話你係幫人去「拖」呢啲毒品「K仔」，就係賺錢嘅，咁當時身上就有1,800鈫港紙。
後來喺一個警察局度進行嘅錄影會面紀錄，被告就講話係有人應承咗每帶一次毒品就係畀100鈫做報酬，而且已經分別兩次將啲毒品交畀兩個唔同嘅人，就收咗喺1,600鈫嘅呢個費用。而送完嗰兩次貨之後，就同個女朋友去食飯，跟住就畀差人拉到。就個女朋友係唔知道被告人牽涉喺運毒呢件事。
而後屘，即係嗰啲毒品就再去進行過核對之後，就發覺以當時市價就係16,273鈫，即係個價值。
好喇，講被告你嘅背景同埋求情陳詞方面。被告喺犯案嘅時候就相當年輕嘅，17歲，就冇先前定罪嘅紀錄。不過，其實睇番嗰啲資料，被告都試過係有一次係話不誠實咁樣使用電腦呢件事件係被警司警誡過，但係當然就係唔係一個刑事紀錄，所以被告係一個冇刑事紀錄嘅人。咁而啲資料都顯示，被告讀書讀唔晒，即係冇讀到中學畢業。咁而根據你嘅代表律師何大律師話畀我聽，就你讀唔成書之後，其實就有喺一間賣pizza嘅連鎖店嘅餐廳度做嘢。就因為喺嗰度做嘢嘅時候就識咗一個樓面，雖然後屘已經離咗職，但係就受到呢一個做樓面嗰個人嘅引誘，可以講，就答應佢去幫人帶毒品嚟賺快錢。
而何大律師喺替你求情嘅時候都講出，話喺呢件事件你唔係主腦，而係畀人利用咗，因為你係有想貪搵快錢呢一個情況就畀人利用嚟帶毒品。而被告本身亦都唔係有毒癮嘅人。何大律師求情嘅時候就話你係已經真心後悔，亦都有父母、祖父母同埋其他屋企人支持你，而且大部分而家都已經喺法庭添。咁又話，即係被告你喺受到羈留一段嘅期間，行為都係良好，冇任何嘅嘢話你喺受羈留嘅期間又再犯事咁喇。同埋你亦都係應承咗就話，即係出咗獄之後就唔再犯事。你爸爸係做裝修，你自己就應承咗話出獄之後就會跟爸爸學做裝修嘅工作。
何大律師亦都話，因為被告你又一早已經認咗罪，同埋又咁有悔意，就希望本席係會考慮盡量喺可以容許嘅範圍之內，以最低嗰個判刑嚟判處被告你，因為何大律師話佢已經講咗畀你聽，呢類嘅案件係有量刑指引。
而本席亦都收咗都相當多嘅信件，就你爸爸、媽媽、你嘅祖父、你嘅外祖父母，又有伯父、又有堂阿哥、又有好朋友寫信上嚟幫你求情，被告你自己都有寫。另外就仲有呢個更生會嘅梁先生亦都有寫信上嚟，其實全部都係幫你求情。基本上要求本席輕判。我唔詳細去講佢哋嘅內容，只係就提番，根據被告你屋企人講嗰啲情況，就話你基本上都係一個善良、有孝心、又乖仔。咁爸爸、媽媽就要做嘢，去賺錢養家，變咗就唔係咁多時間去睇你。你就有輕微嘅學習障礙，所以就讀書唔成，出咗嚟做嘢之後，就犯咗而家呢件事，誤交損友。而你啲朋友都係話，你係好容易受人哋影響嘅人嚟嘅，所以先搞咗呢件事去賺快錢。而被告你自己本身而家都知道係話，即係事情幾嚴重，犯咗件咁、即係彌天大罪喇，可以講。咁亦都明白到以前自己所謂嗰啲朋友，其實都唔係真係朋友嚟嘅，冚唥都離你而去，反而就係爸爸、媽媽就真係真心，而家就知道其實以前就囉唆，而家知道爸爸、媽媽其實係真心愛𡃶自己，而家非常之後悔。而梁生，即係更生會嘅梁生，亦都話佢喺去探你嘅時候，佢得到嗰個印象，佢都相信你係真心有悔意。
好喇，講判刑呢方面，販運危險藥物係好嚴重嘅罪行，一個被告人被拉到嘅時候，一定係要嚴懲。咁喺一件叫做許守城嘅案件，上訴庭就已經係頒下咗量刑指引，即係話如果你係販運氯胺酮嘅話，某一個份量，你就係嗰個量刑會係幾多年至幾多年之間。咁而家呢個，因為你而家涉及嗰個係99.28克，所以就係屬於50至到300克呢個範疇，量刑指引就係6年至9年，喺呢一個範圍之內去搵一個恰當嘅量刑起點。我接受，根據呢件案件嘅案情、根據被告人你喺警誡之下已經即刻講，即係和盤托出嘅情況，你就唔係呢件案件嘅主謀，亦都係畀啲人叫咗你去做一個帶家，即係幫人送貨；亦都接受你而家係真心悔改，亦都知道當時係幾蠢，係為咗賺啲咁嘅快錢，就去犯咗一個咁嚴重嘅罪行；亦都接受被告人你而家明白到，其實你屋企人係幾𡃶你，尤其你父母係幾咁樣去關懷你同埋支持你。
我亦都明白，喺犯咗一件咁嚴重嘅罪行，對你嘅父母、對你嘅家人嚟講係幾咁震驚同埋幾咁心痛。被告人你可以講好好彩，因為你犯咗咁嚴重嘅罪行之後，都仍然得到屋企人同埋你嘅朋友去支持你，唔係話已經離棄你，唔理喇，由得你自生自滅，所以你喺呢方面可以講係非常之幸運。而被告人你，我亦都希望你真係照你嘅承諾去咁做，因為你同我承諾係冇用。老實講，我唔會因為你承諾我而影響嗰個判刑，我判刑唔係去考慮你到底將來出咗監之後，會唔會真係跟你爸爸去做嗰個裝修嘅工程。呢個你自己好自為之，你應承得你父親，你就應該要咁樣做，但係最終都係你嘅決定。做唔做好人，只有你先可以做到，人哋幫唔到你，明白喇嘛？
我都已經講咗喇，雖然父母係痛心，你嘅朋友亦都--即係家人、朋友個個都係為你求情，但係我始終都要考慮呢件案件恰當嘅判刑，唔可以就咁話人哋幫你求情就判輕咁，係咪？
我睇番呢件案件嘅案情先，知道當時係點樣拉到你、點樣啲毒品喺身上搵到、你又講過啲乜嘢，又考慮到你都算係年輕，當時17歲，又考慮到你係冇案底，即係雖然你係曾經試過一次警司警誡，但係我係會當你係冇案底咁樣嚟處理，又考慮到涉及嘅毒品嘅份量 - 99.28克嘅氯胺酮，仲有你喺呢件事件扮演嘅角色，即係幫人帶毒品，而唔係個主謀。我就認為，我可以喺6年至9年呢一個範疇，用最低最低嗰個起點，即係話6年作為呢個量刑起點。被告人你係真係同警方合作，亦都喺第一個可以認罪嘅時間，即係喺裁判署已經即刻認罪，所以我係會畀你足足三分之一刑期扣減，即係4年 - 減咗三分一之後。
好喇，除咗你認罪，即係話你已經真心悔改，你嘅認罪顯示你已經真心悔改，冇嘥到法庭嘅時間，係得到三分之一嘅刑期扣減之後，我就睇唔到有其他嘅理由再減刑，因為你嘅承諾頭先已經講咗，你嘅承諾或者你嘅父母作出嗰啲求情，嗰啲唔係特殊嘅理由，令到我將一個恰當嘅刑期再遞減。所以就而家呢個販運危險藥物罪名，你係須要坐4年監。