被告人喺本席前承認咗一項販運毒品罪，涉及嘅係八包「冰」毒，實質「冰」毒嘅份量一共有1,153.47克，被告人同意控方嘅案情。
被告係台灣人，佢喺2013年11月28日（案發當天）從深圳蛇口乘搭咗渡輪去到香港機場，打算轉機去韓國，但係就被警方嘅毒品調查科探員將佢截停，同埋喺佢行李篋裡面搵到有關嘅毒品。被告喺被拘捕後坦白交代咗佢今次犯案嘅背景資料，咁本案嘅「冰」毒零售價喺香港差不多係六十八萬港幣嘅。
辯方喺求情嘅時間提交咗多封嘅求情信，包括被告妻子所寫嘅信件，佢女兒嘅寫咗幾句說話同埋佢家庭係屬於清寒情況嘅證物書。辯方特別提到，被告嘅父親同埋兄長喺去年係先後過世，而佢當時就係喺香港被囚禁，佢年老嘅母親亦都有老人失憶症嘅。就呢方面嘅個人背景，本席都認為係值得同情，咁本席亦都考慮過呢啲嘅事情；但係另一方面，法庭不能夠忽視毒品帶畀社會，尤其係對年輕人，嘅禍害。
就判刑方面，辯方大律師提出一點，就係話因為案例譚依珍（譯音）係決定於2014年6月，就會係本案發生之前嘅--對唔住，我講一講，就係話呢件案在有關案例之前所發生嘅，因此就並不適用，辯方大律師認為法庭應該根據番程國雄案例去處理，即係話達到600克同以上嘅「冰」毒，判刑係18年起。辯方嘅意思似乎係如果用呢一個基礎去考慮，刑期起點係可以比較低嘅。經考慮後，本席並不完全認同呢一個嘅睇法，因為正如控方喺回應呢一點嘅時間指出，就算冇正式嘅指引，單以酌情權去考慮嘅話，法庭都主要係根據毒品嘅份量去訂定刑期嘅基準，喺呢個情況下，就算法庭係接納應該係依照呢個程國雄嘅案例去處理，本席會係用22年作為刑期嘅基準。不過相信你嘅代表律師都會向你解釋過，因為有呢個國際販運嘅因素，法庭係要將個刑期基準提高。一般嘅呢個調整會係加兩年。喺咁嘅情況下，刑期基準會係24年。被告承認控罪，可以得到三分一嘅扣減，扣減之後，刑期變為16年。
呢類嘅販運毒品罪係嚴重嘅罪行，法庭一般唔會因為個人嘅困難同埋家庭嘅背景係再作出扣減。不過法庭注意到，被告以往係並冇刑事紀錄，咁本席亦都接納被告係在佢家庭經濟面對極大壓力之下先至去鋌而走險犯案，因此本席會酌情減刑6個月，因此刑期係十五年六個月。