香港特別行政區 訴 曾景聰

HCCC 162/2015

香港特別行政區

高等法院

原訟法庭

刑事案件2015年第162號

----------------

----------------

----------------------

判刑
以下內容乃法庭數碼錄音謄本

----------------------

官：　

被告係被控一項販運毒品罪，涉及毒品係一共七百幾克嘅「冰」毒。被告承認控罪，亦都同意案情。

其實呢件案嘅案情就係好簡單，警方人員喺案發當天嘅晚上，喺旺角廣東道嘅一處地方截停咗被告，亦都搜查佢身上嘅東西，就喺佢手持嘅膠袋裡面搵到控罪所列出嘅毒品。

警員拘捕咗被告。在警誡下，被告話佢只係運送啲毒品，佢唔係話買賣啲毒品嘅。在後來嘅錄影會面時候，被告透露佢犯案嘅背景同埋細節。

根據警方嘅估計，相關毒品嘅零售價係大概三十幾萬鈫。

被告今年30歲，以往佢係並冇犯罪紀錄嘅。

代表大律師喺求情嘅時候指出，被告一直有工作，係同佢母親一齊居住嘅。被告在被拘捕之後，一直係同警方合作，佢亦都係非常後悔。佢後來有向警方提供呢個罪案嘅資料，但係因為時間嘅問題，警方未能夠根據資料去作出進一步嘅行動。

伍大律師將多份嘅求情信呈上畀法庭，希望法庭能夠輕判被告。本席已經係睇咗呢幾封信件嘅內容，包括係被告自己寫嘅，同埋佢父母、牧師所寫嘅信。喺呢一方面，本席都係覺得有啲嘅奇怪，一般牽涉呢一類販毒案件嘅被告，自己都會係吸毒者，亦都會喺十幾二十歲呢個階段已經開始係有刑事紀錄，法庭好少見到一個係到成30歲嘅人，先至去參與呢一啲咁樣嘅販毒行為。當然，年紀大先去運毒嘅人，主要會係因為經濟壓力或者金錢嘅利益，但係睇嚟被告並唔係話有好大經濟方面嘅壓力。如果話佢真係因為頭腦比較簡單，而容易畀人利用去犯案，本席只能夠講就係覺得非常可惜，亦都係可憐嘅。不過，呢一類販毒方面嘅判刑，上訴庭係有指引嘅，相信伍大律師亦都有向被告同埋佢嘅家人係解釋咗。

考慮到有關嘅指引，本席係決定用20年作為刑期嘅基準，呢個已經係可以採用嘅最低起點。本席會給予被告全數三分一嘅扣減，因此刑期係十三年四個月。

被告有意圖去協助警方，亦都有真係提供資料，可惜呢啲資料係並冇太大嘅用處。今次係被告初犯，亦會係第一次面對咁長嘅刑期。整體嚟講，在考慮後，本席會酌情將刑期再減6個月。因此刑期係十二年十個月。

希望被告喺服刑嘅期間，透過懲教署嘅各類課程盡量學習，同埋一開始就要保持良好嘅行為，睇下將來是否能夠爭取比較提早係釋放，再重新做人。

以下即係--呢個就係法庭嘅判刑，結果係十二年十個月。