香港特別行政區 訴 梁源北及另一人

HCCC 352/2015

香港特別行政區

高等法院

原訟法庭

刑事案件2015年第352號

----------------

----------------

----------------------

判刑
以下內容乃法庭數碼錄音謄本

----------------------

官：　

第一被告人梁源北同埋第二被告人劉鎮堅，喺本席前各自分別承認一項販運危險藥物罪，違反香港法例第134章《危險藥物條例》第4（1）（a）及（3）條。

第一被告人所承認嘅係第一項控罪。罪行詳情指，第一被告人於2015年1月22日，喺香港新界大嶼山香港國際機場，非法販運危險藥物，即內含994克甲基苯丙胺鹽酸鹽的1.00公斤晶狀固體，該危險藥物俗稱為「冰」。第一被告人亦都承認咗控方所備就關於佢嘅控罪案情，該控罪案情如下，我而家讀出嚟：

1. 2015年1月22日15：45時，梁源北（下稱「第一被告」）準備乘飛機到印尼耶加達時，在大嶼山香港國際機場離境大堂近43號登機閘口被海關關員截查，搜身期間，在第一被告纏在腰上的腰封內發現有八包晶狀共重1公斤懷疑「冰」毒品。

2. 海關關員在現場拘捕及警誡第一被告，第一被告承認由深圳販運「冰」毒到印尼，報酬是11,000元。

3. 在其後的錄影會面中，第一被告承認下列事情：

a）他當時失業，並且欠下人民幣4,000元的債。

b）一個名為「老闆」的人叫第一被告帶一些東西到耶加達，報酬是人民幣10,000元。

c）2015年1月22日早上，「老闆」在深圳一間酒店內為第一被告紮上已放入「冰」毒的腰封，「老闆」給予他港幣1,000元及人民幣1,000元作為零用錢及旅程間的瑣碎開支，另外給予35美元用作抵達耶加達時申請簽證用途。

d）當第一被告到達香港國際機場後，在機場找換店把港幣換作印尼盾。

e）假若第一被告成功到達耶加達，「老闆」會在他抵步之後再給他指示，但他在香港國際機場登機之前便被香港海關截獲。

4. 入境處出入口紀錄顯示第一被告在2015年1月22日10：56時由中國經深圳灣口管制站進入香港。

5. 經化驗後，在第一被告腰封內的八包毒品，內含994克甲基苯丙胺鹽酸鹽的1,000克晶狀固體，當時的市場零售價是港幣425,000元。第一被告現承認在拘捕時正在販運上述藥物。

第二被告人所承認嘅係第二項控罪。

罪行詳情指，第二被告人於2015年1月22日，在香港新界大嶼山香港國際機場，非法販運危險藥物，即內含990克甲基苯丙胺鹽酸鹽的994克晶狀固體。第二被告人亦都承認咗控方所備就關於佢嘅控罪案情，該控罪案情如下，我而家讀出嚟：

1. 2015年1月22日15：45時，劉鎮堅（下稱「第二被告」）準備乘飛機到印尼耶加達時，在大嶼山香港國際機場離境大堂近43號登機閘口被海關關員截查，搜身期間，在第二被告人纏在腰上的腰封內發現有八包晶狀共重約1公斤懷疑「冰」毒品。

2. 海關關員在現場拘捕及警誡第二被告，第二被告承認由深圳販運「冰」毒到印尼，會獲得金錢報酬，第二被告人說一切由其他人安排。

3. 在其後的錄影會面中，第二被告承認下列事情：

a）他的朋友叫第二被告帶毒品到印尼。

b）2015年1月22日上午，在深圳一間酒店房間內，一名綽號「大哥」的大陸人，把包在腰封的毒品綁上第二被告的腰間。

c）「大哥」給第二被告35美元，作為抵達印尼時用來申請簽證之用。

d）第二被告從深圳抵達香港。

e）假如他們到達印尼的話，第二被告會打電話給「大哥」尋求進一步指示，電話號碼由一名綽號「老闆」的人提供。

f）第二被告知道此行的任務是運送毒品。

4. 入境處出入口紀錄顯示第二被告在2015年1月22日10：56時由中國經深圳灣口岸管制站進入香港。

5. 經化驗後，在第二被告腰封內的八包毒品是內含990克甲基苯丙胺鹽酸鹽的994克晶狀固體，當時的市場零售價是港幣422,450元。第二被告現承認在拘捕時正在販運上述藥物。

兩名被告人係喺海關人員嘅同一行動之中被截查及被拘捕的，兩人各自所販運嘅危險藥物同是「冰」毒，而所涉的毒品重量分別不大，而且兩人亦都係舊同學，一齊干犯控罪，從深圳嚟香港過境，試圖將身上嘅「冰」毒帶往印尼，喺此等情況之下，本席認為對佢哋嘅判刑應該係沒有差別嘅。

本案罪名為販運不少於990克純「冰」毒，根據律政司訴程國雄（譯音）係[1991]年 2 HKLR 125頁，香港特別行政區訴 Abdallah Anwar Abbas係[2009]年2 HKLRD 437及香港特別行政區訴譚伊真（譯音）[2014]年3 HKLRD 691第34段等案，上訴法庭定下咗嘅量刑指引，販運大量（即600克起）嘅海洛英嘅量刑指引係適用於販運「冰」毒嘅。販運600至1,200克「冰」毒，刑罰應該係20至23年監禁。以本案販運990克起嘅「冰」毒，量刑基準以算術計算應該約為22年監禁，而且本案涉及攜帶毒品過境，計劃是將毒品帶往印尼，這亦都係所謂國際元素，係加重刑罰嘅因素，可以見於香港特別行政區訴鍾炳焜，係CACC 85/2014年，係2014年7月2日嘅判決，未經彙編嘅，第9段。喺本案嘅情況之下，增加嘅刑罰應該唔少於兩年監禁。

兩名被告人都係喺1998年喺國內出生，都係家鄉喺廣西，而父母亦都係居住於廣西，佢哋兩位都係現年17歲，但係犯案嘅時候，均係16歲，佢哋喺本港都係冇犯罪前科。張秀群大律師代表第一被告人，而黃錦娟大律師係代表第二被告人向本席求情，要求輕判兩名被告人。兩名被告人都致函法庭，佢哋都係於輟學之後，從廣西到廣州尋求工作，希望能夠賺多啲錢去幫助家人，受唔住賺快錢嘅引誘，干犯咗今次呢件咁嚴重嘅罪行，佢哋亦都道出心中嘅悔意，希望法庭從輕發落。佢哋兩人嘅父母都從廣西嚟到香港呢個法庭度支持佢哋，並且致函法庭求情，盡道佢哋嘅痛心疾首，同埋對疏於管教兒子而造成大錯，責無旁貸，希望法庭可以畀佢哋兒子盡快出獄，以聚天倫。然而販運毒品係好嚴重嘅罪行，被告人嘅身世背景多數係唔能夠構成求情輕判嘅因素，唯一一個最有效嘅減刑因素，就係佢哋承認控罪，應該係獲得三分一嘅刑期扣減。因為兩名被告人犯案嘅時候係年輕，不知輕重，而喺本港亦都係冇犯罪前科，本席認為可以對佢哋網開一面，寬大處理，希望佢哋可以盡快改過自新，重返正途，即只係以21年監禁為量刑基準，呢個已經係包括咗國際元素嘅加刑因素，因為佢哋認罪而扣減三分之一，所以判處每名被告人係14年監禁。