香港特別行政區 訴 陳浩傑
Read the full judgment text of HCCC 81/2016 on BabelCite. This High Court CFI judgment was delivered on 27 May 2016.
|
HCCC 81/2016 香港特別行政區 高等法院 原訟法庭 刑事案件2016年第81號 ----------------
---------------------- 判刑 以下內容乃法庭數碼錄音謄本 ---------------------- 官： 被告係被控兩項與未成年嘅女童非法性交嘅控罪，被告係承認控罪，並且係同意案情。 案情撮要就透露，女童出生於2000年12月26號，咁佢喺14年8月就成為被告嘅女朋友，而被告一直係知道佢嘅年齡。後來喺2014年12月及15年嘅1月，被告先後同女童發生性行為，被告兩次都冇使用呢個被孕套，亦都係在女童嘅體內射精。到咗15年嘅10月，女童誕下被告嘅孩子，女童嘅家庭社工知道之後係報警處理。最後，被告係被拘捕同埋檢控。 被告其實喺犯罪嘅時間都係16歲，咁佢以往係冇刑事紀錄嘅。 本席係先取得咗感化官嘅報告，報告內容對被告嘅情況有頗為正面嘅評價，睇嚟被告對自己後來係有反思，亦都打算負起對佢女朋友同埋兒子嘅責任。雖然呢一類嘅案好多時候都會有判監嘅結果，但係本席考慮到被告同埋女童嘅關係、被告自己嘅年齡與及感化官都係願意幫助被告去改過，本席決定係畀一次機會被告，等佢可以喺感化官嘅指導之下，為咗佢將來嘅工作同埋生活，重新學習，唔再去浪費時間。 本席會採納感化官嘅建議，兩項罪都係判被告18個月嘅感化，但係就有特別嘅條件：即係第一，喺感化官指示之下學習、工作同埋住宿；第二，要在感化官指示下，住入同埋完成唔少過九個月嘅院舍嘅安排。 本席會要求感化官喺六個月之後提交進度報告，除非法庭有指示，否則被告喺嗰次嘅進度報告不需要出席。希望被告明白，如果被告喺感化期間再犯事或者破壞感化令，被告會係被帶上法庭，呢個控罪會係重新再判，咁到時好大機會就係去監禁㗎喇。 | ||||||||||||||||||||||