香港特別行政區 訴 楊嘉俊

HCCC 377/2015

香港特別行政區

高等法院

原訟法庭

刑事案件2015年第377號

----------------

----------------

----------------------

判刑

以下內容乃法庭數碼錄音謄本

----------------------

官：　

咁被告係被控兩項販運危險藥物罪嘅，被告承認第一項控罪，而否認第二項控罪。咁控方決定不繼續起訴係第二項控罪。

被告承認控方嘅案情撮要。簡單嚟講，事發當晚海關同埋警方係進行一次聯合行動。喺凌晨時分，佢哋喺西貢碼頭附近係部署。佢哋注意到被告同另一名男子喺一輛七人車上係等候。後來有艘快艇駛近碼頭，並有人將兩個手提袋係搬上碼頭平台嘅位置。被告同另外嘅男子就上前，各自攞起一個手提袋離開。被告所攞嘅係其中嗰個啡黑色嘅袋。警員於是係現身，進行拘捕，但係同被告一齊去攞起手提袋嘅男子，拋下手提袋就成功逃脫。而被告亦都拋下佢所攞嘅手提袋，然後走到一名正在碼頭旁邊釣魚嘅人士嗰度去搭訕。當其他警員都到場協助後，佢哋成功將被告拘捕，並撿回被告先前拋棄嘅黑啡色手提袋。

經調查後，警方係發現手提袋裡面有十六包氯胺酮毒品，亦即係第一項控罪裡面所指嘅共12.93公斤嘅氯胺酮，零售價差不多係2,000,000港元嘅。

被告係喺香港出生嘅，今年22歲，以往有一項不相同嘅刑事紀錄。佢接受過中二程度教育，亦都做過廚房呀，運輸工人呀等等。代表被告嘅李大律師詳細講咗被告嘅個人同埋家庭背景。亦都提出話被告今次係突發咁樣係被朋友要求佢去幫手運毒。被告所提到嘅家庭問題，本席只能夠係表示同情。不過佢嘅家庭情況不能夠構成有效嘅求情因素。至於被告所講嘅，佢係被臨時拉夫去幫手運毒呢一方面，本席認為係難以令人接納嘅，尤其係當被告喺第一次審訊時，係在宣誓之下講話對毒品全不知情，被告現時嘅版本係並冇太大嘅說服力。不過本席主要都係會以毒品嘅份量去作呢個量刑嘅評估。

經考慮後，本席會以十六年作為刑期起點。今次係重審，其實就算被告認罪，都未必一定可以得到全數三分一嘅減免嘅。喺有啲情況之下，個扣減只係去到四分一嘅啫。不過本席經考慮後，今次都會以一個較為寬大概方法嚟到處理，給予被告三分一嘅扣減，十六年變為十年八個月。

至於協助調查方面，到現階段控方嘅立場似乎係佢哋並冇得到值得即時行動嘅資料，而辯方亦只能夠話被告係曾經提供過某一些嘅協助。實際情況係點樣，本席並冇充分嘅基礎去作出合理嘅評估嘅。當然法庭接納被告係有心去提供協助，不過與其本席現時隨便咁樣扣減幾個月，不如等被告作出實質同埋有效嘅協助之後再通過其他渠道提出呢方面嘅事情，可能對佢更為有利。

本席希望被告係真心悔改，服刑期間能夠好似佢講係讀番書，專心學習，刑期完結之後能夠再重新做人。

有關被告自己寫嘅求情信裡面係有啲敏感嘅資料，為咗佢嘅安全同埋利益，本席下令呢個信件應該保密同埋打漆，冇法庭嘅准許下不可打開閱讀。至於內容是否涉及刑事指控，及應否交由警方跟進同埋調查呢一方面，辯方應該考慮如何處理。咁呢個刑期係十年八個月。