香港特別行政區 訴 俞偉傑

HCCC 299/2016

香港特別行政區

高等法院

原訟法庭

刑事案件2016年第299號

----------------

----------------

----------------------

判刑
以下內容乃法庭數碼錄音謄本

----------------------

官：　

被告承認一項販運危險藥物罪，違反香港法例第134章《危險藥物條例》第4（1）（a）及（3）條。

根據案情，被告所乘坐嘅七人車喺深圳灣入境香港嘅時候被關員截查，關員從佢攜帶嘅旅行袋內撿獲八包毒品，有關嘅毒品經過化驗之後證實為7,144克粉末，內含5,988克氯胺酮，市值893,000元。被告承認佢係替他人從深圳運送嗰啲毒品返香港，將會獲得10,000鈫嘅報酬。

被告現年45歲，同媽媽同住，佢有六項嘅刑事紀錄，最後一項係管有危險藥物，係喺2010年12月3日被判到戒毒所服刑。

大律師喺求情嘅時候表示，被告之前做過侍應同埋酒吧，今次係因為想搵快錢，希望可以同年邁嘅母親去旅行先至鋌而走險，干犯本案。被告第一時間認罪，彰顯悔意，希望本席乃念佢媽媽年邁，亦都希望喺有生之年可以同被告團聚，予以一個較低嘅量刑起點。

本席喺量刑嘅時候考慮咗本案嘅案情、牽涉毒品嘅種類、重量、有關嘅量刑指引、被告承認控罪、大律師嘅求情，亦都閱讀咗被告母親所撰寫嘅求情信。根據量刑指引，販運氯胺酮超過1公斤，量刑基準係超過14年。根據香港特別行政區訴單松健一案（[2013] 1 HKLRD 627），該案涉及5.12公斤嘅氯胺酮，上訴庭表明販運2,000至到3,000克氯胺酮，起刑點分別不少於18年同埋20年。就住該案所涉及嘅5.12公斤嘅氯胺酮，上訴庭認為22年嘅起點係恰當嘅。

本席喺本案中亦都以22年為量刑基準，因跨境因素，上調兩年至到24年，予以三分之一嘅認罪扣減，判刑16年。