香港特別行政區 訴 葉志傑

HCCC 425/2014

香港特別行政區

高等法院

原訟法庭

刑事案件2014年第425號

----------------

----------------

----------------------

判刑
以下內容乃法庭數碼錄音謄本

----------------------

官：　

被告係被控一項販運毒品罪嘅，涉案嘅毒品係四十九點幾克嘅「冰」毒。被告承認控罪，亦都同意控方嘅案情撮要。

其實本案嘅情節就好簡單嘅，就喺去年6月8日凌晨嘅時間，被告同其他兩名人士喺奶路臣街一所大廈行出嚟嘅時候被警員見到，警員決定上前將佢哋截停，要求調查，期間被告係想逃走，但係不成功。被告曾經將一包白色嘅物品拋掉，警員就成功搵番呢一包東西，並拘捕被告人。

在警誡之下，被告承認因為兒子剛剛出世，所以等錢使，要替人販毒搵錢。後來警員喺被告嘅褲袋再搵到另外一包嘅毒品，控罪所指嘅就係呢兩包一共四十九點幾克嘅「冰」毒。

被告在現場及錄影會面時，都合作交代咗犯案嘅情況同埋背景，被告話今次佢本來可以得到1,500鈫港元嘅報酬嘅。根據警方嘅資料，今次嘅毒品價值大約係兩萬七千鈫港元。

被告今年27歲，有三次嘅刑事紀錄，兩次係與藏毒有關，好明顯被告自己都係吸毒者嚟嘅。

辯方代表大律師在求情時都係強調，被告係因為金錢壓力之下先至犯案，希望法庭能夠輕判。

控辯雙方都同意適用嘅案例指引係程國雄一案。考慮到相關嘅指引，本席認為刑期起點係9年。被告承認控罪，因此可以得到三分一嘅扣減，9年變成6年。

一般嚟講，對於販運毒品呢一類非常嚴重嘅罪行，個人嘅壓力、經濟困難等等都不能構成減刑嘅因素，有關本案嘅情況係案發時，被告嘅兒子係剛剛出生，其實本席都非常同情被告嘅兒子，如果佢知道父親係要用販毒嚟到搵錢養佢，佢會係點樣諗，睇嚟被告嘅父親都係勤力辛苦去工作做嘢而養活佢嘅仔女嘅人，點解被告唔單只自己吸毒，仲要去販運毒品呢？本席覺得被告嘅行為對不住父母，亦對兒子絕不公平。今次之後，被告是否真係能夠清楚反省佢嘅行為，坐完監之後重新做人，呢一方面被告要好好作出選擇。

經考慮後，本席會因為被告嘅年幼兒子，減刑半年，等呢個小朋友可以早啲係同自己嘅父親係一齊生活，不過本席希望佢嘅兒子見到嘅唔再係一個吸毒又販毒嘅爸爸，希望被告係好自為之喇，因此刑期係五年半。