香港特別行政區 訴 梁乃祥

HCCC 461/2016

香港特別行政區

高等法院

原訟法庭

刑事案件2016年第461號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人原本被控一項販運危險藥物罪，所涉嘅危險藥物係內含26.4克甲基苯丙胺鹽酸鹽嘅27.3克結晶體。案件係被告人喺街上被截停，搜身之下揭發。被告人不承認控罪，喺審訊之下被裁定販運危險藥物罪無罪，管有危險藥物罪有罪。

本席喺考慮判處嘅時候顧及咗整體情況，包括被告人嘅個人背景同埋戒毒所報告，與及辯方大律師嘅求情陳詞。

被告人已經被還押咗一段長嘅日子，戒毒所不建議被告人進入該所接受治療，並非係預期之外，被告人嘅定罪紀錄可以講得係差劣，有三十四個場合曾經被定罪，其中涉及十一次管有危險藥物，喺2014年更加因為一項販運危險藥物罪被判監禁兩年。從戒毒所報告可見，被告人嘅問題主要都係源自佢嘅毒癮。

單以被告人管有嘅危險藥物嘅份量而言，本席認為應該考慮一個大約18個月嘅刑期，顧及整體事實嘅情況，本席認為喺本案嘅潛在風險係相當高，因此認為量刑起點應該因此提高12個月。此外，今次亦都係被告人第十二次干犯管有危險藥物罪，本席認為，量刑基準亦都應該因此提高6個月。

考慮過整體情況，基於上述嘅理由，本席採用3年作為最終嘅量刑基準。被告人承認管有危險藥物呢項控罪，因此應該得到三分一嘅刑期扣減，顧及辯方謝大律師嘅求情陳詞，本席認為呢個就係被告人就本案應得嘅刑期扣減幅度。因此就本案嘅管有危險藥物罪，判被告人監禁兩年。