香港特別行政區 訴 陳永占

HCCC 122/2016

香港特別行政區

高等法院

原訟法庭

刑事案件2016年第122號

----------------

----------------

----------------------

判刑
以下內容乃法庭數碼錄音謄本

----------------------

官：　

被告陳永占被控一項販運危險藥物罪，違反香港法例第134章《危險藥物條例》第4（1）（a）同埋（3）條。被告人喺本席席前認罪同埋承認咗案情，本席裁定被告人罪名成立。

案情睇番呢，就係喺2015年嘅6月2號，當時有一隊警員就喺紅磡區嘅範圍進行反毒品嘅行動，咁當時警員就見到被告人你係形跡可疑，於是就截停你同埋搜查。喺被告人腰間就發現咗有兩包嘅物體，入面係啲晶狀固體嘅，咁後屘經過化驗之後，證明夾埋晒係內含47.74克甲基苯丙胺鹽酸鹽嘅47.99克嘅晶狀固體，咁而嗰個估計嘅市值係18,716鈫。咁呢兩包嘅「冰」毒呢，一包其中就有字體就寫住「白仔」嘅，另外嗰一包其實裝住咗七包細包啲嘅，咁每一包上面都有個數字嘅，咁啲數字分別就係5、1.75、175、3G、3G、3G同埋35。咁當時警員搵到兩包毒品之後就拉被告喇，就話佢係販運危險藥物。咁响警誡之下，被告人就話當時係搵緊朋友，嗰啲嘢就畀佢自己食嘅，咁佢要求警方係畀次機會佢。

咁後屘返到去警署就進行咗一個錄影會面，咁喺呢個錄影會面，被告人當時聲稱個內容就話呢，佢就咁啱咁蹺撞到個朋友，喺公園度嘅，咁個朋友問佢係咪需要『冰』毒，一包就會$2,000，但係如果買兩包就平啲，$3,500。咁於是被告就同意咗，就買咗嗰兩包，咁就「攝」咗喺個腰間，當時嗰個朋友畀佢嘅時候已經有「白仔」呀，有嗰啲咁嘅數字喺度㗎喇，跟住佢就去約朋友，咁後屘畀呢個警員拉到。

佢就話佢自己食毒品呢，都食咗成十年㗎喇，就每日食3至4克喥。咁佢話就係做呢個地盤工人嘅，賺就賺6,000至7,000鈫。雖然就被告人被警員拉到喇，同埋喺警誡錄影會面嘅時候都聲稱話所有嗰啲毒品呢，「冰」毒係畀佢自己，但係被告人喺本席嘅席前就承認當時佢係販運危險藥物嘅。

好喇，背景喇。被告31歲，就唔係冇案底，有十一次出庭紀錄，總共有十四次嘅案底，其中五次係管有危險藥物。被告代表律師王大律師求情嘅時候就話畀本席聽，就係被告喺案發嘅時候就做裝修工人，一個月就賺7,000鈫，就係一個有毒癮嘅人嘅，咁而喺呢件嘅事件係幫人帶毒，即係做呢個運輸咁樣喇，咁就係賺500鈫嘅啫。被告人透過王大律師就話畀本席知，就係佢犯咗呢件案之後，咁跟住就收監，即係喺還押嘅期間就外公去咗世，唔能夠喺外公嘅身邊，咁佢覺得非常之難過，就好後悔，亦都係立定決心重新做人。咁而喺案發嘅時候，被告係同爸爸、媽媽同埋家姐一齊住嘅，就未結婚嘅。咁佢爸爸、媽媽同埋家姐都寫咗信畀本席，係替被告人你求情，希望係輕判你嘅。

好喇，判刑喇。販運危險藥物係非常之嚴重嘅罪行，一個人如果係循公訴嘅程序被定罪呢，可以係被判終身監禁同埋罰款係五百萬嘅。咁上訴庭喺一宗叫做譚伊真嘅案件呢，就頒下咗呢個判刑指引，就係關於販運「冰」毒嘅。咁喺呢件案件涉及嘅「冰」毒係47.74克，根據上述嗰個指引，即係販運10至到70克呢一個嘅「冰」毒呢，經過審訊之後，判刑嘅起點係7至11年。

我就考慮咗呢件案件嘅案情之後，就認為呢個嘅量刑起點9年係適合嘅。咁雖然被告唔係話冇案底嘅人，就有幾次呢個同毒品有關嘅案底，不過都係管有毒品，唔係販運危險藥物，所以我唔會因為被告人之前已經有案底呢一個嘅情況呢，係將呢個9年嘅刑期係增加。被告人可以亦都講係話及時認罪，所以可以得到呢個三分之一嘅刑期扣減，但係除咗及時認罪之外，又冇其他嘅求情理由呢，可以將呢一個刑期係繼續減㗎喇，雖然話屋企人點樣求情，被告人點後悔，被告人立心將來會係重新做人，呢啲都唔構成係一個求情理由嘅。正式嘅判刑就係被告人就販運危險藥物呢個罪行呢，係要坐監6年。