香港特別行政區 訴 郭龍發

HCCC 225/2015

香港特別行政區

高等法院

原訟法庭

刑事案件2015年第225號

----------------

----------------

----------------------

判刑
以下內容乃法庭數碼錄音謄本

----------------------

官：　

被告係被控告一項販運毒品罪，涉及嘅毒品係約5公斤嘅可卡因。

被告起初否認控罪，亦都就會面紀錄嘅自願性提出爭議。本席在自願性嘅問題作出裁決後，需要將審訊押後，再排期處理，但係在開審之前，辯方以書面通知表示話被告決定承認控罪。其後，被告亦都係喺法庭上認罪及同意控方嘅案情撮要。簡單嚟講，在案發當天，被告坐飛機到達香港機場時，被關員截停，並喺佢嘅行李裡面搵到相關嘅毒品。在警誡下，被告承認佢因為經濟問題，經中間人安排下，同意替人由巴西運毒返香港。

根據海關嘅評估，毒品當時嘅市值係六百幾萬鈫。

被告現年25歲，生於香港，佢以往並冇刑事紀錄。被告已婚，同妻子住喺深圳，而佢家人就係住喺香港。被告自己聲稱並非係藥物濫用者。

在被告承認控罪之後，案件又再有多次押後，因為被告就係要求向海關提供罪案資料，希望藉此能夠得到進一步嘅減刑。但到咗今天，海關只能夠同法庭講，就係話被告確實有提供資料，而部門已經係積極進行調查，但係因為資料頗多，又涉及海外嘅事情，因此未能好快咁樣作出結論，不過，律政署都已經就調查方向多次係畀出指示。在押後期間，本席亦取得被告嘅背景報告，感化官對被告嘅評語都係頗為正面，感化官認為被告現時已經知錯，佢亦接納自己要面對法律上嘅後果。

就呢類嘅判刑，法庭主要嘅考慮係毒品嘅份量。根據上訴庭嘅指引（見Abdallah一案，CACC 304/2008），4公斤嘅毒品份量已經係屬於26至30年嘅範疇，而被告今次係有成5公斤咁多。不過，被告相對年輕，今次面對嘅會係非常長時間嘅監禁，經考慮後，本席決定採取一個較低嘅年期，即係26年作為刑期起點，本席會將刑期上調1年嚟到反映國際販運嘅因素，刑期變為係27年。

在認罪扣減方面，被告在爭辯自願性方面失敗後才決定認罪，因此佢不能得到三分一嘅全數扣減，減幅應該大概係四分之一。咁本席會將刑期減到去20年，呢個減幅其實已經係比四分一係多咗一啲。辯方大律師強調被告有強烈嘅意圖去協助海關或者控方，大律師亦都呈上咗三份被告已經作出嘅口供，辯方質疑海關點解唔傳召被告喺某一啲案裡面做控方嘅證人，大律師希望法庭可以就被告已經做咗嘅協助，畀番被告某程度嘅扣減。喺呢一方面，控方回應話現時某位嫌疑人被控告，係與被告嘅資料冇關係，因此唔需要佢嘅協助，至於其他嘅資料，就係需要進行調查，先至可以確定是否有用。喺咁嘅不明朗情況下，本席認為與其現時係盲目咁樣去作出扣減，更好或者係話對被告會更公平嘅處理，係喺調查塵埃落定或者其他嘅審訊有結論之後，被告再由其他渠道，以「提供協助」理由嚟到要求減刑，到時不論係上訴庭或者係其他委員會，相信可以作出更準確嘅評估。因此本席決定喺呢一個階段，在「提供協助」嘅議題上，不作扣減。

所以呢項控罪嘅刑期係20年。