香港特別行政區 訴 蕭泳標
Read the full judgment text of HCCC 61/2017 on BabelCite. This High Court CFI judgment was delivered on 21 April 2017.
|
HCCC 61/2017 香港特別行政區 高等法院 原訟法庭 刑事案件2017年第61號 ----------------
----------------
---------------------- 判刑 ---------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，被告喺街上被警員截查，並冇發現任何可疑物品，期後被帶返住所，喺廳中一張檯上發現有五包毒品。被告喺警誡下表示嗰五包係海洛英，並聲稱係收取他人1,000鈫。警員喺單位內搜出三百個可再封口嘅膠袋以及一個電子磅。毒品經過化驗之後，證實為143克混合物內含113克海洛英，而所有毒品嘅市值當時係大概係113,828元。被告承認係替人將啲毒品從一個花槽中帶返佢個住所，並且存放喺住所內，獲得1,000元嘅報酬。 被告現年59歲，之前有六項嘅定罪紀錄，其中兩項與毒品有關。最後一項係喺2004年11月19日，因為販運危險藥物罪，被判監禁32個月。 大律師喺求情中表示，被告早年係偷渡嚟香港，留下母親同埋弟弟喺中國大陸，曾經結婚，同妻子係育有兩名女兒，但係已經離異，佢同前妻及女兒嘅關係疏離。大律師指，被告喺地盤工作期間受人唆擺，染上毒癮，故此喺1999年開始干犯與毒品有關嘅控罪。喺最後一次犯案被判監，喺2006年出獄之後一直冇再干犯任何罪行，但係今次係因為再抵受唔住毒品嘅誘惑，再次染上毒癮，先至甘願被人利用，鋌而走險，干犯本案。大律師指，被告第一時間認罪，而本案不含其他令案情嚴重嘅加刑因素，希望法庭予以輕判。 本席喺量刑嘅時候考慮本案嘅案情、毒品嘅種類、重量、有關嘅量刑指引、被告認罪、大律師嘅求情。根據有關嘅量刑指引，販運海洛英重量50至到200克，起刑點係8至到12年。就本案毒品嘅重量113克，本席認為一個審訊後嘅刑期應該係九年半，予以三分之一嘅認罪扣減，判刑六年四個月。 |