香港特別行政區 訴 劉偉財

HCCC 109/2017

香港特別行政區

高等法院

原訟法庭

刑事案件2017年第109號

----------------

----------------

----------------------

判刑
以下內容乃法庭數碼錄音謄本

----------------------

官：　

本案被告承認一項搶劫罪、一項盜竊罪同埋兩項有意圖而傷人罪。

案情指，佢喺凌晨時分行劫兩名女子，期間亮出利刀，指嚇其中一人，命令佢交出手提電話，該女子受驚、踏空，跌在地上，另一人見狀主動交出銀包，被告搶去港幣3,000元之後逃去。

呢件事件之後數天嘅一個下午，被告從一電訊店鋪嘅貨架，偷走展示嘅兩部分別價值為港幣6,388元同埋港幣5,588元嘅iPhone，觸動店鋪嘅警鐘，兩名店員見狀即跑出店外，追截被告，卻先後畀被告用刀傷頭部以及手部，後來被告被從後追截嘅警員制服以及拘捕。

警誡之下，佢保持緘默。

有關嘅刀係尖頭鋒利嘅刀，金屬刀刃長大概十五厘米，手柄長大概十二厘米。而兩名受傷店員嘅傷勢如下：第一人嘅左邊顱頂骨頭皮割傷，有7厘米深、流血，而左邊肩部表面擦傷及有瘀傷；第二人嘅右下巴近頸部割傷4厘米，有裂口（需要縫七針），而右手係割傷1厘米。

被告現年46歲，過往有十五次合共二十二項嘅刑事紀錄，其中四次係搶劫罪，分別係喺1989年、1997年、2010年以及2012年，而最後呢一項搶劫罪，佢係被判監3年嘅，佢係2015年8月先至獲釋嘅，而佢其他嘅刑事紀錄係多次涉及不誠實嘅控罪同埋毒品嘅罪行。本席獲告知，本案係喺佢另外一件案件擔保期間干犯。

大律師喺求情嘅時候指出，本案被告因為經濟原因而犯案。但係大律師亦都同意，本案案情情節嚴重，而被告最大嘅求情理由係佢喺好早階段已經認罪，彰顯佢嘅悔意，希望本席能夠盡量寬大處理，考慮量刑嘅整體性。

本席喺量刑嘅時候，考慮咗本案嘅案情，而被告早喺交付程序嘅時候已經認罪，亦都考慮到大律師嘅求情。事實上，被告喺及早認罪嘅情況，喺本案而言，係本案唯一有力嘅求情理由。

就控罪一發生嘅時間喺凌晨時分，被告亮出利刀指嚇兩名女子，本席以6年為量刑基準。

而控罪二係發生喺控罪一九天之後，被告係食髓知味，再帶同利刀出動去犯案，喺光天白日下明目張膽，從店鋪中偷走兩部陳列嘅手提電話，而喺畀店員追截嘅時候，更加揮動利刀，先後斬向兩名店員嘅頭部同埋手部，導致兩人受傷。本席認為，被告係一名屢犯屢咎嘅積犯，佢早喺1997年喺區域法院，已經因為干犯搶劫罪而得到6年嘅監禁，但係佢並冇汲取教訓，反而係不斷重施故技，為求一己嘅私慾，出手狠毒，甚至置他人生命同埋身體如草芥，行為猖獗，必須嚴懲，以儆效尤，反映公眾對此類行為嘅憎厭。第二項嘅控罪，本席以15個月為量刑基準；第三同埋第四項控罪，本席以各6年為量刑基準。

每項控罪給予認罪嘅三分之一扣減如下：第一項控罪，判刑4年；第二項控罪，判刑10個月；第三項控罪同埋第四項控罪，每項控罪判刑4年。本席考慮咗控罪一與其他控罪，係喺唔同嘅日子發生，亦都考慮咗量刑嘅整體性，下令控罪一嘅4年監禁刑期係與其他刑期分期執行，控罪二之中嘅6個月、控罪三之中嘅兩年、控罪四之中嘅一年半分期執行。即係話，控罪二至三，佢係需要服刑4年，另外再加喺控罪一嘅4年，總刑期為8年監禁。