香港特別行政區 訴 文世友

HCCC 272/2017

香港特別行政區

高等法院

原訟法庭

刑事案件2017年第272號

----------------

----------------

---------------------------------------

判刑
以下內容乃法庭數碼錄音謄本

---------------------------------------

官：　

被告承認兩項販運危險藥物罪，違反香港法例第134章《危險藥物條例》第4（1）（a）及（3）條。

案情指，被告喺街上被警員截查，警員喺佢手中攞住嘅紙巾入面搜獲四包毒品，佢喺警誡之下聲稱呢啲「可樂」係佢自己食，而呢一啲毒品經過化驗之後證實係0.85克嘅固體，內含0.78克嘅可卡因。

警員其後喺被告嘅住所搜到一個「冰」壼，並且喺一個夾萬入面發現多袋嘅毒品，而該些毒品經過化驗之後，就證實為10克可卡因嘅11克固體，以及內含25.30克甲基苯丙胺鹽酸鹽嘅32.90克晶狀固體。另外，夾萬入面仲有一本寫住日期同埋數字嘅記事簿、八百多個可再封口嘅膠袋、一個電子磅。

可卡因當時嘅市值係15,103元，而「冰」毒嘅市值係7,843元。

被告喺警誡之下聲稱所有嘅毒品都係佢自用，但係佢現在承認佢管有嗰啲毒品係作販運用途。

被告現年27歲，有六次嘅定罪紀錄，有兩項同毒品有關，其中一項（即係最後嗰項）喺2012年6月5號，因為販運危險藥物，被判監禁4年。

根據被告所呈遞嘅求情信中，被告表示自己知道行為愚蠢，罪有應得，希望本席能夠寬大處理。另外，被告又呈上佢剛被扣押嘅時候嘅驗尿報告，以茲顯示佢係有毒癮，亦都以茲顯示，案中部分嘅毒品係供佢自用。

本席喺量刑嘅時候考慮咗本案嘅案情、毒品嘅種類、重量，以及有關嘅量刑指引，亦都考慮被告認罪，閱讀咗被告所撰寫嘅求情信，本案涉及一共係10.78克嘅可卡因同埋25.30克嘅「冰」毒，就個別嘅毒品而言，10.78克嘅可卡因係納入10至到50克，即係5至到8年嘅量刑基準；而25克嘅「冰」毒係納入10至到70克起刑點，係7至到11年。

本席係根據陳旭亮案作咗以下嘅測試：第一，「歸謬法」，即係假定所有嘅毒品係「冰」毒，起刑點應該係105個月；第二，「換算法」，即係以10.78克嘅可卡因，換算為6克嘅「冰」毒，31.30克嘅「冰」毒嘅起刑點應該係101個月；第三，「比例法」，即係以本案嘅可卡因同「冰」大概係七、三比例，放予全部係可卡因同埋全部係「冰」毒嘅起刑點，再將兩者加起嚟，起刑點應該係99個月。

喺以上測試嘅範疇之後，本席認為，就本案所有嘅毒品，一個102個月嘅起刑點係適合。至於被告所聲稱部分嘅毒品係佢自用，蔡文俊（譯音）案件係補充，並確立咗黃雪巧案件嘅量刑指引，即係被告除咗作出自用嘅聲稱之外，仲須證明案件所有或者大部分嘅毒品係佢自用，如果佢不能證實呢一點，佢將不能基於此自用嘅聲稱，而獲得額外嘅量刑扣減。

喺本案中，本席考慮嘅因素包括：毒品嘅市值、多袋毒品同埋包裝工具、身上搜到，而其後喺住所有住更多嘅包裝嘅毒品，咁但係本席亦都考慮到被告嘅屋企入面係有吸食工具，不過，根據佢嘅刑事紀錄，佢除咗有管有危險藥物嘅刑事紀錄之外，最接近本案嘅一次係一個販運危險藥物嘅案底。

綜合以上，本席唔認為上述嘅證供，可以顯示本案嘅大部分毒品係被告自用，所以只係予以三分之一嘅量刑扣減，判刑68個月分配如下：控罪一，16個月；控罪二，68個月，同期執行。