香港特別行政區 訴 曾子龍

HCCC 67/2017

香港特別行政區

高等法院

原訟法庭

刑事案件2017年第67號

----------------

----------------

-------------------------------------

判刑

以下內容乃法庭數碼錄音謄本

-------------------------------------

官：　

被告承認一項《販運危險藥物罪》，違反香港法例第134章《危險藥物條例》第4（1）（a）同埋（3）條。

案情指，被告與另一名女子被警員截查，被告即將手中嘅環保袋掟喺地上嘗試逃走，其後被制服。

喺個環保袋入面，警員搜出七包嘅危險藥物，而有關嘅毒品經過化驗之後證實為內含984克甲基苯丙胺鹽酸鹽嘅991克晶狀固體，當時市值大概三十多萬元。

喺警誡下，被告話佢係從另外一個人喺旺角嗰度獲取大概1公斤嘅「冰」毒，但唔知道要去邊度或者將佢送畀乜嘢人，但係佢會得到1,500鈫嘅報酬。

被告現年32歲，一共有十六項被定罪嘅紀錄，其中有三項係涉及管有危險藥物，最後一次定罪係喺2016年6月30號，因為襲擊罪而被判監4個月。

大律師喺求情嘅時候表示，被告喺事發嘅時候係癮君子，加上佢誤交損友先會鋌而走險干犯本案，佢已經深感後悔，喺被捕之後即時坦白承認，將事件和盤託出，嚟到法庭嘅時候亦都第一時間認罪，彰顯悔意。另外大律師又指，佢嘅女友剛為佢誕下女兒，而被告已經深知會面對頗長時間嘅監禁，佢為咗不能陪伴女兒成長深感無奈。大律師又話，被告已經表示會喺獄中進修，裝備好自己，等侍出獄之後可以融入以及回饋社會，希望本席輕判。

本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告承認控罪，亦都考慮大律師嘅求情，根據譚伊真一案，販運多過600克「冰」毒嘅量刑指引係沿用Abdallah一案，就販運海洛英鹽酸鹽嘅指引，即係600至到1200克起刑點係20至到23年。

本案涉及984克嘅「冰」毒，本席以22年作為量刑基準，予以三分之一嘅認罪扣減，判刑十四年八個月。