香港特別行政區 訴 姚華偉

HCCC 156/2017

[2018] HKCFI 648

香港特別行政區

高等法院

原訟法庭

刑事案件2017年第156號

----------------

----------------

------------------------------------------

判刑

以下內容乃法庭數碼錄音謄本

------------------------------------------

官：　

被告承認一項管有危險藥物罪，違反香港法例第134章《危險藥物條例》第8（1）（a）及（2）條。

案情指警員喺一間單位搜查嘅時候，被告喺單位外敲門，佢睇到警員就逃跑，警員喺電梯大堂截查佢，喺佢嘅短褲褲袋搜出一個煙盒，內有三個可再封膠袋，而分別載有三個、兩個同埋十一個內有「冰」毒嘅可再封膠袋。另外亦都喺佢所攜帶嘅背包入面搜出七十個空嘅可再封膠袋、三十支膠飲管、一個電子磅以及三個打火機。

警誡之下，被告表示「冰」毒係佢自用嘅，但係後來又改口表示呢啲並非喺佢身上搜到嘅。而毒品經過化驗之後證實為15.95克嘅晶狀固體，內含15.62克甲基苯丙胺鹽酸鹽，被告承認管有該些毒品。

被告現年32歲，共有九次刑事紀錄，係最後一次係與毒品有關嘅。佢係喺2017年12月19日因為吸食危險藥物被判監禁四個月零二十一日，並且因為之前嘅扣押期，喺同日獲釋，本案係喺該案擔保期間干犯嘅。

根據戒毒所報告，被告現在並冇毒癮，不推薦佢到戒毒所服刑。

大律師喺求情嘅時候指被告喺被捕之前係任職待應，而且被告承認控罪，彰顯悔意。根據案例，管有危險藥物嘅起刑點一般12至到18個月，而因為潛在風險往上調嘅幅度則由3個月至到12個月不等，大律師希望本席仍然因為被告早前嘅認罪給予三分之一嘅認罪扣減。

首先法庭喺考慮有關管有危險藥物罪是否將原本嘅起刑點因為潛在風險而往上調嘅時候，法庭係需要考慮被告當其時是否有工作喇、毒品收藏、擺放嘅地點喇、毒品嘅重量喇、毒品分為幾多包裝喇，以及被告是否有其他牽涉危險藥物嘅案底作整體考慮。

本案嘅「冰」毒係重15.62克，而另外一單案例喇，陳志強案喇（CACC 390/2004）嘅「冰」毒係重12.47克，上訴庭認為一個18個月嘅起刑點係適合嘅。本席以18個月作為本來嘅起刑點，而本案係涉及多袋嘅毒品，亦都有七十個可再封口嘅膠袋、電子磅呢一啲係用作販運嘅工具，所以將部分「冰」毒提供他人以支持佢嘅毒癮嘅潛在風險係不容忽視嘅。本席將起刑點往上提高6個月至24個月，再予以三分之一嘅量刑扣減，判刑16個月。