香港特別行政區 訴 陳小慧

HCCC 245/2016

[2018] HKCFI 1081

香港特別行政區

高等法院

原訟法庭

刑事案件2016年第245號

----------------

----------------

----------------------------------

判刑

以下內容乃法庭數碼錄音謄本

----------------------------------

官：　

被告人喺席前承認一項販運危險藥物嘅控罪。

案情撮要顯示，喺2015年12月30日嘅傍晚時分，被告人被海關人員喺旺角西洋菜街係截停，喺被告人所攜帶嘅一個手袋裡面，海關人員搜得988克嘅「冰」毒，市值係超過$300,000嘅港幣。

被告人現年43歲，曾經接受中學教育，佢同一名5歲嘅兒子係同住。喺事發嘅時候，被告人係失業，接受緊呢個綜援。被告人曾經有兩次嘅刑事紀錄，兩次都係同呢一個管有危險藥物有關嘅，而被定罪嘅時間係2012年，咁當時候係判處被告人接受18個月嘅感化。不過似乎睇落嚟，被告人你係並冇珍惜感化嘅機會，咁而喺不久亦都係再次接觸毒品，而今次所接觸嘅更加唔係普通嘅管有，而係販運。

喺求情嘅時候，被告人指佢今次犯事純粹係因為經濟拮据而應承他人係攜帶毒品，咁如果佢能夠成功運送嘅話係可以獲得2,000元嘅酬勞。

就住販運「冰」毒，上訴庭已經有清晰嘅量刑指引，販運988克嘅「冰」毒，量刑嘅起點應該係22年嘅即時監禁。被告人承認控罪，而案發嘅時間亦都係2015年，因此佢仍然係可以享有認罪嘅三分之一嘅折扣。喺現階段，除咗被告人承認控罪呢一個求情因素之外，本席睇唔到有其他嘅求情因素。咁就住被告人所承認嘅一項販運危險藥物嘅控罪，佢係被判處十八年八個月嘅即時監禁。

（上午11時42分至11時50分之聆訊毋須謄寫）

更正，其實我寫係寫十四年八個月嘅，不過讀係讀咗十八年八個月，所以十四年八個月嘅監禁。係，更正，唔好意思，唔該晒。