香港特別行政區 訴 曾昭强

HCCC 80/2018

[2018] HKCFI 2225

香港特別行政區

高等法院

原訟法庭

刑事案件2018年第80號

----------------

----------------

----------------------------------------

判刑

以下內容乃法庭數碼錄音謄本

----------------------------------------

被告人經過審訊後被裁定一項販運危險藥物罪，罪名成立。

案情撮要如下：

2017年4月8日凌晨00：02時，被告人同一名在逃人士喺海麗邨海瑞樓14樓走廊被兩名之前已經喺同一層樓走廊嘅防煙門後埋伏嘅警員截停，當警員表露警員身分時，在逃人士立即衝向防煙門，然後從後樓梯跑落地面，隨即坐計程車離開，到審訊時仍然在逃。至於被告人方面，喺警員表露身分後，被告人即時跑向兩名警員嘅方向，向住電梯大堂奔跑。大概去到兩名警員之間嘅時候，第一名警員11027用雙手用力捉住被告人雙手前臂，而同一時間兩人雙雙跌落地，當時11027打算用雙手壓住被告人身體，但被告人仍然激烈反抗，兩人在地上糾纏。被告人的反抗維持約十秒，喺呢十秒內，兩人繼續喺地下，11027繼續用雙手壓低被告人，期間被告人有推開佢，想撥開佢雙手，另外一名警員12761然後開始協助11027，用雙手壓住當時仍然打側喺地上面嘅被告人嘅背部。喺12761嘅協助下，佢哋將被告人由打側喺地上面轉為面向地下咁樣壓咗喺地上面嘅。然後因為被告人繼續掙扎，不停喐動身體，於是11027發出警告，叫被告人唔好再喐，再喐就會用手銬。被告人繼續激烈反抗，於是11027用手銬將被告人雙手反扣於背後，扣上手銬後大約二十秒，11027同埋12761扶起被告人嘅。

兩人之後將被告人帶到14樓後樓梯間，11027對被告人表示懷疑佢藏毒，會根據毒品條例搜佢身。11027然後搜被告人身，喺被告人嘅藍色牛仔褲右前褲袋內搜出兩包思疑毒品，載有控罪詳情裡面所指嘅28.11克晶狀固體同埋1.75克嘅粉末，分別內含25.26克嘅「冰」毒同埋1.01克嘅氯胺酮。11027然後以販運危險藥物罪罪名拘捕被告人。警誡後，被告人講出以下嘅說話「阿Sir，呢啲毒品我買嚟自己食㗎，畀次機會喇。」陪審團被要求就被告人是否管有涉案毒品，若有的話，被告人是否知道管有嘅係一啲毒品，同埋被告人管有涉案毒品是否作販運用途，即是是否意圖提供畀其他人作出考慮及裁決。陪審團以六對一比數，裁定被告人罪名成立嘅。

有關刑事紀錄方面，被告人係冇任何刑事定罪紀錄嘅。

有關求情陳詞方面，被告人39歲，香港出生，接受教育至中三程度。於被拘捕時為貨車司機，月薪約15,000元。

代表被告人嘅林大律師話畀法庭知，被告人之前一直有正當職業及穩定收入嘅，過去二十年斷斷續續有吸食「冰」毒嘅習慣，被告人透過林大律師表示毒品並非如控方所講喺佢身上搜出，佢從來冇管有涉案毒品嘅。林大律師希望法庭不因為被告人販運多於一種毒品而加重刑罰，因為涉案嘅氯胺酮份量只有1.01克，只係總毒品含量嘅百分之三點八左右嘅。

判刑

有關販運甲基苯丙胺鹽酸鹽嘅判刑指引，見於案件香港特別行政區訴譚伊真（CACC 524/2011），販運10克至到70克之間嘅「冰」毒嘅判刑係介乎7年至11年之間。販運25.26克嘅「冰」毒嘅判刑起點應為8年監禁，林大律師對此並冇爭議嘅。本席認為由於涉案嘅氯胺酮份量相對為非常少，加上8年嘅刑期對一個冇任何刑事定罪紀錄嘅人而言已經係一個足夠嘅懲罰，本席不因為被告人販運多於一種毒品而加重刑罰，因此，本席採納8年為判刑起點。

由於被告人經審後被定罪，而且冇任何嘅減刑因素存在，本席不能偏離判刑指引，因此，被告人最終判監8年。