香港特別行政區 訴 李健豪

HCCC 93/2018

[2018] HKCFI 2261

香港特別行政區

高等法院

原訟法庭

刑事案件2018年第93號

----------------

----------------

-----------------------------------------

判刑

以下內容乃法庭數碼錄音謄本

-----------------------------------------

官：　

本席考慮過程大律師嘅求情，相信程大律師亦都係相當務實咁將佢可以為被告所講嘅說話都講晒。今次被告係因為販運危險藥物罪而被定罪，所牽涉嘅危險藥物係27.3克嘅晶狀固體，內含27.3克嘅甲基苯丙胺鹽酸鹽（即係俗稱嘅「『冰』毒」）。

咁根據譚伊真第二案，即係[2014] 3 HKLRD 691關於「冰」毒嘅量刑指引，販運10至70克「冰」毒嘅指引係7至11年監禁，根據上訴庭案件HKSAR v Burnales [2000] 4 HKC 636，與及香港特別行政區訴梁桂平（譯音）第二案，[2003] 2 HKC 575，一個好重要嘅判刑政策，係判刑需要有一個嘅一貫性（consistency）。亦都係一個上訴庭好清晰嘅指示係畀下級法院嘅，就係話量刑嘅起點主要係根據純毒品嘅重量。

喺本案裡面，本席睇唔到有任何理據容許本席偏離上訴法庭給予嘅量刑指引。本席亦都認同判刑上係需要有一個一致性，使到其他可能觸犯同類案件嘅人士知道觸犯法律嘅後果，以致對佢哋產生一個警剔嘅作用。

咁喺今次呢件案件裡面，根據涉案「冰」毒嘅份量，本席係以八年一個月監禁作為起點。本席睇唔到有任何可以減刑嘅理由，所以本案嚟講被告人被判八年一個月監禁。

另外本席留意到被告人係2016年4月29日有一個管有危險藥物罪嘅定罪，當時係被判刑6個月，緩刑18個月。呢件案件係喺緩刑期間發生嘅。程大律師亦都非常之務實咁係同法庭講，而法庭亦都認同，本席睇唔到有咩嘢理由唔將呢一個緩刑令執行，或者唔全數執行。因此，本席命令將被告人上次嘅緩刑，呢6個月嘅緩刑，全數執行，同呢件案件分期執行。即係話，被告人2016年4月29日嗰一個6個月嘅判刑係需要全數係服刑嘅。