香港特別行政區 訴 陳厚光

HCCC 210/2018

[2018] HKCFI 2817

香港特別行政區

高等法院

原訟法庭

刑事案件2018年第210號

----------------

----------------

---------------------------------------

判刑
以下內容乃法庭數碼錄音謄本

---------------------------------------

官：　

被告人陳厚光係被控一項有意圖而傷人罪，違反香港法例嘅212章《侵害人身罪條例》嘅17（a）條。

罪行嘅詳情就係話，被告人你喺2017年8月3日，喺天水圍天晴邨一個單位嘅入面，係非法惡意傷害咗X，就係令到佢身體受嚴重傷害嘅。被告人你喺裁判官嘅席前已經係承認咗控罪，就交付嚟呢個高等法院嘅原訟庭去判刑。

就睇番嗰個案情。即係被告你承認嘅案情就顯示，就話你原本就已經係結咗婚，有三個仔嘅，不過你就喺內地就識咗X，就大家即係變咗做情人，X就同你生咗兩個細路，就係兩個女嘅，一個2003年出世，一個2005年出世。到2009年嘅時候，你就正式同X結婚，即係X就係你嘅第二任太太，嗰陣時就喺內地結婚嘅，後屘X同埋兩個女就都嚟咗香港，喺2014年嘅時候嚟咗香港，就同你一齊住嘅。然後即係到咗2015年嘅時候就去咗即係後屘話係發生事天水圍嗰個地址度住。到咗2016年嘅時候，X就係申請話離婚，不過雖然話離婚啫，但係一家人都仲係喺同一個地址度住嘅。到咗2017年7月5號嗰日，被告人你就因為一個家庭嘅暴力事件，係被警方拘捕咗，呢件事件就係牽涉X嘅。發生呢件事件之後，就媽媽同兩個女都搬咗一個庇護中心度住。到咗月尾，即係31號，就媽媽即係X，同埋兩個女，就返番嚟天水圍度住幾日嘅，原因就因為其中一個女有一啲活動要參加，就即係嗰日呢，就去到8月3號嗰一日，當時就X同埋兩個女就食完早餐，你就去問X，就話佢係咪同嗰啲女會走㗎喇，離開㗎喇，係嘅話，你就換鎖喇咁，即係門鎖。X就話「咁你想換鎖咪幾時換囉」咁，喺咁嘅情況之下，你就衝入廚房，攞咗一把錘仔，就有成30個厘米長嘅，就係𢱕嗰個X個頭，喺佢後面𢱕。當時兩個女在場睇住嘅，你𢱕咗佢一下，跟住X就係跌咗喺地下度，就流好多血，兩個女驚你繼續打阿媽，就將阿媽拖咗入去佢哋間房度，鎖埋房門，咁就報警。而被告人你就踢個房門，想入去間房度，就呢個細女曾經開過門嚟睇過嘅，但係兩個女都唔畀你入去間房入面，就即係擔心你再去傷害個媽媽，最後被告人你再試多一次，話想入房入唔到，你就鎖咗你自己喺自己間房度。咁差人嚟，差人入到嚟之後，被告人你就畀差人見到，就坐喺個窗邊嗰度，就係話要自殺嘅，於是警方就搵呢個談判專家嚟同你傾。傾咗之後，被告人你就終於爬返入你間房度，就跟住就畀差人拉你，就係話呢個罪行，就係呢個有意圖而傷人罪。

喺警誡之下，被告人你就冇講嘢嘅。

講到X嗰方面嘅狀況，當時就送咗佢去屯門醫院度嘅。佢去到醫院，就畀醫生睇到，就話佢嘅左邊嘅頂骨度係有裂痕，同埋佢嘅左眼膜上就有血腫，同埋一個叫做蛛網膜嘅，就下腔出血，要進行緊急嘅開顱手術，即係開頭嘅手術，就攞啲血塊出嚟。喺手術嘅期間，就醫生發覺佢嘅左顳部就有兩厘米線形嘅裂傷，同埋另外就有30厘米線形嘅骨折，仲有就30毫升硬腦膜外係有血塊。手術之後，嗰個情況都正常嘅，除咗有一次佢就有係懷疑係似癲癇症咁嘅情況出現，然後就係喺8月10號就出院。因為發生咗呢件事之後，兩個女其實就被送咗去保良局度住嘅。所以喺11號，X就喺社工嘅陪同之下就去保良局探嗰兩個女，點知喺探個女嘅期間嘅時候就發現，即係畀人發現佢X又頭痛、又神智不清，就送咗佢去呢一個律敦治醫院嗰度，喺嗰度做咗一個腦部斷層嘅掃描，之後發覺原來佢個硬腦膜外嗰個血腫係輕微增多，又要再入院，就係去咗呢一個東區嘅尤德醫院，就係去咗個腦科嗰個病房嘅。喺嗰度逗留嘅期間，就再做多一次嘅腦部斷層掃描，就顯示到原來佢左前房血管聚集間隔係減縮咗，同埋呢個顱腔內係積氣，佢又要做呢一個物理治療同埋職業治療，就8月14號先至出院嘅。其實睇番即係根據法庭有嘅資料，其實X到而家都仍然係仲要繼續跟進緊嘅，但係佢嗰個詳細醫療嘅情況法庭就唔知，因為X女士係唔肯簽同意書，等法庭或者係其他人係知道佢嗰個醫療嘅情況，就所以關於佢嗰方面，就知道咁多。

關於被告你個背景同埋求情陳詞嗰方面。被告而家就62歲，就冇先前嘅刑事紀錄，不過就喺案情入面咪講過話，2017年7月嘅時候有一個家庭嘅暴力被捕嘅，因為嗰件嘅事件，就其實喺法庭簽保守行為，就2,000鈫、24個月嘅。換言之即係話，被告人你干犯現時嗰個控罪就喺呢一個嘅期間，即係喺呢一個簽保守行為嘅期間，因為啱啱7月先至簽保咗，然後8月就已經發生呢件事。讀書方面，讀到係中三程度，即係喺內地讀嘅，跟住就做呢一個裝修工人。而根據代表你嘅黃大律師話畀本席聽，就即係初初一路都係做呢一個裝修工人，後屘就同一個朋友或者拍檔就即係開咗一間公司，就係做判頭嗰類，判啲工程返嚟做嘅，即係直至到案發嘅時候都係做嗰類嘅工作。而另外一個方面，就係黃大律師求情嘅時候係話畀本席聽，就係你一路都係做呢一個勞力，即係體力上嘅工作，嚟支持屋企人嘅，一路啲家用都係你畀，雖然你同個即係前妻係離咗婚，但係你仍然同前妻同埋三個仔都保持良好嘅關係。其實你嘅前妻同埋三個仔今日都有嚟到法庭度係嚟支持你，佢哋亦都係分別有寫到信畀本席，替你求情嘅。而黃大律師亦都係向本席替你求情嘅時候，就陳詞嘅時候話，其實被告人你係身體上都有相當多嘅毛病，包括就係膀胱係曾經試過有呢一個癌症，而亦都唔止一次係需要做手術，即係開刀嚟做手術，係切除呢個膀胱嘅某部分。根據呢個醫療嘅報告得返嚟嗰啲資料，即係其實被告人你由2014年開始，就已經係有呢啲身體不適嘅狀況，因為2014年嗰時候就已經係確認咗係有呢一個癌症，而亦都有其他一啲嘅病痛，我唔特別講。不過，因為呢一啲咁樣嘅病痛，即係影響咗你工作嘅能力，因為你做工嗰方面係需要即係體力多啲嘅，而因為工作量少咗，亦都係咁就令到你個即係入息嗰方面係減少咗，所以就變咗一方面就你個身體嘅情況就話影響到你嘅情緒，另一方面就因為入息少咗，就又影響到同太太即係X之間嘅感情，因為啲錢銀嗰方面有爭拗，因為大家成日有爭拗，最後就發生咗今次呢個咁不幸嘅事件。即係換句話講，即係當時發生呢件事件嘅時候，你喺自己控制情緒嗰方面係受到你個病情，同埋即係因為做唔到嘢入息係少咗呢方面嘅影響。而黃大律師亦都話，案發嗰日，你以為就屋企人就係會--即係X，就太太同埋兩個女，就係會以後都走咗去，以後都唔再返嚟，所以你係嗰陣時係好愚蠢咁樣，係干犯咗而家呢個控罪，去襲擊X嘅。發生咗呢件事之後，你就知道係咁樣嘅做法係好錯誤，好後悔，亦都即係好後悔自己係令到X受咗咁大嘅傷害。當時其實你喺發生呢件事之後，你後悔到個程度，你係想自殺嘅，不過後屘因為有呢一個警方嘅談判專家同你傾咗之後，你最後先至取消咗個念頭，就冇自殺到。而黃大律師亦都求情話，被告人你今次所做呢一個愚蠢嘅行為，傷害咗X嘅行為，其實唔係凈係傷害到X咁簡單，其實係呢件事件令到兩個女、令到你自己本人同埋其他嘅屋企人，都係受到某程度上嘅傷害。

我頭先已經講咗話，即係你個前妻，即係第一位太太，同埋三個仔，有寫到信畀我，但係其實除咗佢哋之外，被告人你本人、X女士（即係受害人）、同埋被告人你做嗰個判頭生意嗰個嘅拍檔、同埋仲有一個係相當長時間係朋友嘅人士，都有寫信畀我嘅。首先講被告人你嗰封信，我唔會特別講得太過詳細，即係好簡單咁講下。被告人你喺嗰封信入面就承認，就當時你就係失去咗自我控制能力，就係令到太太受到傷害，即係身體同埋精神上都係受到傷害，你就非常、非常之後悔，你係衷心咁樣向太太X、你自己啲仔女、你自己嘅家人同埋朋友係道歉，就係因為佢哋--尤其加上佢哋係個個到而家都仍然咁支持你，你係願意為你自己所做嘅行為係負上呢個法律嘅責任，亦都係應承以後唔會重犯咁樣嘅罪行。你太太，即係前妻，第一位太太，同埋三個仔，喺啲信入面基本上都係話，即係被告你係一個好爸爸、孝順仔，同埋就好肯幫鄰舍嘅一個人嚟，佢哋都畀咗好多唔同嘅例子，即係點樣係好爸爸，點樣係孝順仔咁嗰啲，我唔講嗰啲詳細情形喇；而佢哋亦都係有講到話，即係當然，當佢哋，即係第一位太太同埋啲仔知道你原來同X有婚外情，可以講，初初就--即係有婚外情之後，令到前妻要同你離婚，佢哋就好唔開心嘅，初初係好唔開心，不過後屘佢哋亦都全部係體諒到你嘅情況，原諒咗你，而大家嗰個關係仲係非常之良好嘅。而根據佢哋講，就冇見過有任何暴力嘅事件發生，即係口頭鬧交、拗交，就冇喐手喐腳嘅，佢哋所以知道話今次被告人用咁嘅情況去傷害X，佢哋個個都好震驚，佢哋個個就係要求法庭係盡量輕判你嘅。而被告人你做生意嗰個夥伴同埋你啲朋友，都係讚你話你點樣好、點樣好，亦都係要求法庭係輕判。

我特別提就係X，即係X因為呢件案件嘅受害人嚟。佢就親身喺社工陪同之下嚟咗法庭嚟支持被告人你，佢亦都寫咗封信畀我嘅。X自己喺封信度，我又唔會特別講得太詳細，不過基本上佢就承認佢自己當時都係有講到啲嘢係激嬲咗被告人你，所以被告人你先至咁樣對待佢嘅。佢就喺發生事件之後，佢話佢都去探咗你好多次，佢就接受你嘅道歉，亦都原諒咗你，佢就希望法庭就係盡量輕判你，等你可以早啲返出去，就係同佢一齊去照顧兩個女，同埋一家團聚。

到判刑呢一方面。當然有意圖而傷人罪係非常之嚴重嘅罪行。根據法例，如果一個人即係喺根據呢一個公訴程序被控呢個罪行罪名成立，係可以被判到去終身監禁嘅。呢一類嘅罪行就冇量刑指引，即係冇話上訴庭講咗你一定要判幾多、判幾多，冇嘅。喺呢一件案件，就控辯雙方都有提到一啲嘅案例，譬如就係包括咗一件叫做謝學林嘅案件，另外一個案件就叫做余日生嘅案例，仲有一件就係叫做Avis Ying Yung，好似係個醫生嚟嘅，但係我雖然都睇過呢一啲嘅案例，不過因為其實喺嗰幾個案例入面發生呢個有意圖而傷人罪，同呢件案件嗰個情況，根本就唔同嘅，所以我認為唔係對我太大幫助。不過，我亦都有為意到，上訴庭有一件案件係叫做袁偉渠嘅，我諗譯音嚟嘅，佢喺嗰件案件係接納咗，就話喺呢一個一本權威嘅著作叫做Cross & Cheung入面有提過，就係呢一類嘅案件通常嗰個量刑就係3至12年，而呢一個講法就喺頭先我提過嗰個謝學林案件，上訴庭都接納就話，3至12年呢一個範疇都啱㗎喇，咁，當然以呢個範疇嚟計唔係話單單都一定係3或者12，因為都始終要睇番每件案件本身嗰個案情係點樣，然後去作出個決定嘅。今次被告人你咁樣用個錘仔去打X，就點樣睇都係嚴重，冇可能係話唔嚴重嘅，因為有個結果你都可以睇到，即係當時佢受傷嘅情況，喺醫院發生咗咩嘢事，呢啲就係睇到，嗰一個襲擊係幾咁嚴重。頭先已經講咗關於喺醫院度發生咩嘢事，我唔再提。

不過就睇番呢個背景嘅報告，即係背景嗰啲資料，我應該講，尤其係黃大律師求情陳詞入面所講，就顯示到喺事發嘅時候，被告人你係真係因為你自己身體嘅狀況，有癌症，又要開刀，又有其他嘅病痛，又做唔到嘢，搵錢少咗，同太太有爭拗各方面，係令到你有好大嘅壓力。而喺2017年7月嗰一次，即係後屘要簽保守行為，嗰次你係推太太同埋踢佢，冇用武器嘅，發生咗嗰件事之後，其實X同埋兩個女都已經去咗呢個庇護中心度住，後屘就搬返番嚟，好明顯睇案發嗰日，你就因為去問個太太「係咪永遠都唔返嚟喇，係我就換鎖」，佢就答你，就唔係話「唔係，我唔走」咁，仲話「你換咪換囉」咁，就令到你就好明顯係當時火遮眼，然後就係失去咗呢一個自我控制能力，走去個廚房度攞嗰一個錘仔嚟𢱕個受害人。我亦都會考慮到，你係𢱕佢一下，雖然都好大力，嗰一下，起碼你唔係係咁𢱕去𢱕咗好多下，我都考慮到你係𢱕一下，即係嗰個都顯示到你嗰一刻就係失去咗控制能力，跟住唔再𢱕。而案情亦都顯示，你係有去踢個女個門，想入去嘅，不過我都接納大律師同你求情嘅時候話，你嗰陣時唔係想去再打個老婆，即係X，而係想睇下佢究竟傷成嗰個情況係點嘅。我亦都接納，你今次去用一個武器去襲擊X，同你一貫嗰個性格行為係唔吻合嘅，雖然你試過踢佢，即係用到武器呢樣嘢係同你嗰個一貫行為唔吻合，同埋你今次做咗呢件事係非常之有悔意，呢啲我都接納嘅。我亦都接納喺呢件案件入面，當然我係其中一個考慮之列，就係身為受害人嘅X係原諒咗你，仲幫你求情添。

喺我考慮適當刑期嘅時候，一方面我當然要考慮埋呢一個罪行嗰個嚴重性，對X造成嗰個傷害，我要考慮呢一方面。但係另一方面，我亦都考慮埋你當時嗰個獨特嘅個人背景，即係話你又有癌症，又要做手術，又有其他嘅病痛，令到你係做嘢做得唔夠多，賺唔到咁多錢，呢啲嘅個人情況我亦都會考慮在內。如果係冇你嗰啲個人獨特嘅情況，唔係話因為有癌症、因為受到好大嘅壓力咁樣，又或者太太係當時講咗啲嘢令到你嬲怒，一時之間激氣得滯，一下控制唔到自己嘅情緒，如果唔係有咁嘅情況，我會用7年做量刑起點。不過因為有呢啲咁嘅獨特情況我考慮咗，我減18個月，即係變咗嗰個量刑起點，我用五年半嚟做量刑起點。你喺裁判官嘅席前已經認罪，我就係畀你三分之一嗰個刑期嘅扣減。扣咗之後，嗰個刑期就係三年八個月。

明白喇嘛？你當然你已經坐咗1年，其實已經起碼韞咗1年，再加下減咗，應該都唔使好耐再出返嚟，真係好自為之，其實你亦都好難得，老實講，即係前妻又原諒你，仔又原諒你，受害人自己又原諒你，係咪？真係你珍惜呢一個咁嘅情況，真係唔好再犯，明白喇嘛？

不過，因為你就真係喺個簽保期間係犯事，所以要罰喺2,000鈫，因為你二十四個月之內唔可以犯事，咁犯咗嗰個就一定要畀嗰2,000鈫。