香港特別行政區 訴 馮德恩

HCCC 392/2018

[2019] HKCFI 1789

香港特別行政區

高等法院

原訟法庭

刑事案件2018年第392號

----------------

----------------

----------------------------------------

判刑
以下內容乃法庭數碼錄音謄本

----------------------------------------

官：　

被告人喺裁判法院承認咗一項販運危險藥物罪，被交付高等法院原訟法庭判處。

本席喺判處嘅時候顧及咗案件嘅整體情況，包括案件嘅性質同埋情節、相關危險藥物嘅類別同埋份量、辯方大律師嘅求情陳詞同埋被告人嘅個人背景。

本案嘅案情係簡單，被告人同埋另一名男子與及一名女子喺一座大廈嘅地下被警員截停，被告人手持嘅紙袋裡面有控罪所述嘅「冰」毒。喺警誡之下，被告人話佢受人指使去將嗰包「冰」毒拎去旺角交畀其他人。

喺之後嘅錄影會面裡面，被告人亦都話一名姓胡嘅男子欠咗佢港幣2,000元，佢同嗰名男子同埋女子一同前往涉案大廈嘅一個單位向姓胡嘅男子追討，姓胡嘅男子向佢表示佢冇錢還，並且畀咗一包「冰」毒畀佢，叫佢拎去旺角交畀一個叫阿明嘅男子，佢話阿明會代佢還錢。被告人亦都話喺相關單位裡面仍然有另外一包「冰」毒。

被告人現年34歲，中三學業程度，佢曾經喺酒吧任職侍應，被告人冇結婚，但係有一名6歲嘅兒子，兒子嘅母親喺佢產下兒子之後不久就離開咗被告人佢哋。被告人共有七次被定罪，包括三次管有危險藥物同埋兩次干犯同侵犯版權有關嘅罪行，亦都曾經喺2008年因為一項販運危險藥物罪被判監禁兩年。

喺求情嘅時候，辯方王大律師請法庭顧及被告人第一時間承認控罪同埋一直都與警方合作，而被告人有年幼嘅兒子同埋七十多歲嘅母親。母親雖然有申領綜援，但係佢同埋被告人嘅兒子經濟上都係十分依賴被告人。

辯方亦都呈交咗被告人同埋佢母親寫嘅信件，喺信件裡面被告人表示悔意，而母親亦都表示被告人本性係純良嘅，而佢而家要照顧被告人未滿7歲嘅兒子，生活非常困難。

被告人販運嘅係內含240克甲基苯丙胺鹽酸鹽嘅249克晶體。根據上訴庭喺譚伊真案（CACC 524/2011）裡面所述，販運「冰」毒如果純含量係70至300克嘅話，應該考慮判處11至15年嘅監禁刑罰。

考慮咗整體情況，本席不見有足可以偏離量刑指引嘅因素，本席會採用14年作為量刑基準。被告人第一時間承認控罪，亦都有悔意，應該得到三分一嘅刑期扣減。考慮咗整體情況、顧及辯方大律師求情陳詞，加上法庭被告知而本席亦都信納嘅資料，本席認為應該可以給予被告人多10個月嘅刑期扣減。

係，被告人，請起立。基於上述理由，本席判你就本案嘅控罪監禁八年半。