香港特別行政區 訴 林慧儀

HCCC 304/2018

[2019] HKCFI 1869

香港特別行政區

高等法院

原訟法庭

刑事案件2018年第304號

----------------

----------------

------------------------------------

判刑

以下內容乃法庭數碼錄音謄本

------------------------------------

官：　

被告人經審訊之後被陪審團裁定一項販運危險藥物同埋一項經營煙窟罪，罪名成立。

證供顯示喺2017年12月29日，警員進入被告人居住喺藍田平田邨平誠樓嘅住所，咁喺住所嘅單位裡面嘅一個房間裡面，警員發現一大一小兩包分別係617克同埋27.9克嘅「冰」毒，市值約為係280,000鈫。除咗「冰」毒之外，警員亦都喺房間搜獲包裝「冰」毒嘅工具，包括電子磅、可再封膠袋、鏟、熱熔機等等。警員亦都喺單位客廳嘅茶几上高搜到吸食「冰」毒嘅「冰壺」配件、打火機、汽罐等嘅物品。警誡之下，被告人承認搜得嘅毒品係佢嘅，而佢亦都係會出售一啲毒品畀上嚟單位服食嘅人士。單位裡面當時係有三男、四女、一名小孩。喺錄影嘅會面紀錄裡面，被告人進一步聲稱佢係從一個叫阿耀嘅男子嗰度攞到呢啲「冰」毒，大嘅一包佢會係按住進一步嘅指示係處理，至於細嘅一包就會出售畀係去到單位嘅人士係吸服。

根據上訴庭嘅量刑指引，販運單單係600克嘅「冰」毒，量刑嘅起點監禁嘅刑期應該係20年嘅即時監禁。故此，單就大包嘅「冰」毒而言，就已經係20年嘅即時監禁喇。涉案嘅毒品總重係644.9克，即使小包嘅「冰」毒裡面有部分係被告人自食嘅話，我相信亦都唔會影響到最終嘅量刑起點嘅基礎。

被告人現年37歲，中一程度，有兩名女兒。至於佢嘅刑事紀錄，就住佢嘅刑事紀錄，今次亦都唔係被告人第一次係干犯刑法，佢有三次嘅刑事紀錄，全部都係同毒品係有關嘅，其中一次更加係販運危險藥物，喺區域法院被判處3年嘅即時監禁。

就住第一項控罪，考慮到涉案毒品嘅份量，再加上被告人過往嘅相同嘅刑事紀錄，量刑嘅起點定為21年嘅即時監禁。被告人經審訊之後係被定罪嘅，冇任何其他嘅折扣可言。就住第一項控罪，判處21年嘅即時監禁。

至於第二項控罪，呢一項控罪嘅刑罰最高就係15年嘅即時監禁，但係一般嘅判刑，一般嘅刑期就係12至到24個月嘅監禁。從喺茶几上高擺放嘅工具睇到，今次最少呢度--即係個單位個茶几上面嘅擺設睇到，呢度最少係可以畀兩至三個人係一起服食，吸食呢個「冰」毒。被告人喺呢個錄影會面裡面聲稱當日佢係收取每名上嚟吸食嘅人士係500鈫嘅費用。喺香港特別行政區訴張耀輝Alex（譯音）（CACC 173/2005）一案，嗰一件案嘅被告聲稱替佢嘅老闆經營一個煙窟兩日，每日係收到450鈫嘅酬勞，咁而警員喺煙窟裡面係搜到2.18克嘅海洛英，咁上訴庭並沒有干預係兩年嘅量刑起點。本案嘅被告人並唔係受薪經營，佢係直接有關嘅營運者嚟，咁所以佢係直接得益嘅。考慮到以上所述同埋案例，就第二項控罪，本席亦都係以兩年作為呢個量刑起點。

喺考慮到總體嘅刑期之後，下令其中12個月（即係1年）係同第一項嘅21年係分期執行。就住被告人被裁定罪名成立嘅兩項控罪共被判處22年嘅即時監禁。