香港特別行政區 訴 張家彪
Read the full judgment text of HCCC 151/2016 on BabelCite. This High Court CFI judgment was delivered on 17 June 2017.
|
HCCC 151/2016 [2021] HKCFI 2837 香港特別行政區 高等法院 原訟法庭 刑事案件2016年第151號 ________________________
________________________
________________________ 判刑 ________________________ 官： 被告人喺席前承認一項販運危險藥物嘅控罪。 案情撮要顯示，被告人喺2015年嘅12月一個晚上，喺步離屋企之後被警員截停搜查。喺被告人所穿著嘅外套裡面，警員係搜獲兩包共重33克嘅「冰」毒。喺警誡之下，被告人承認佢販運「冰」毒係為咗維持生計，同埋賺錢係維持生計。警員稍後進入被告人嘅屋企，喺搜查之後並冇發現任何吸食「冰」毒嘅工具，而涉案嘅毒品嘅零售價就大約係10,000鈫。 被告人今年就47歲，聲稱就係一名跟車嘅工人，不過佢已經有多項嘅刑事紀錄，其中係涉及有多次管有危險藥物嘅紀錄，不過今次就係佢第一次干犯販運危險藥物。 代表被告人嘅李大律師喺求情嘅時候就呈上屋企人嘅求情信，屋企人嘅求情信就係希望法庭能夠輕判。我明白屋企人嘅要求同埋屋企人嘅感受。不過，就住販運危險藥物上訴庭已經訂下清晰嘅量刑指引，販運10至70克嘅「冰」毒量刑應該係7至11年嘅即時監禁，而販運33克嘅「冰」毒量刑嘅起點應該就係八年半嘅即時監禁。過去嗰十幾年，法庭已經多次就住被告人管有危險藥物係畀過機會被告人，被告人曾經就住干犯呢一啲控罪係被判處罰款、接受感化，亦都係被判處去過戒毒所接受戒毒嘅療程，不過似乎被告人並冇珍惜過往法庭畀嘅機會。 今次被告人干犯嘅販運危險藥物控罪，我亦都係睇唔到有啲乜嘢嘅原因呢個法庭係需要偏離上訴庭嘅判刑指引。喺呢一件案件裡面，唯一嘅求情理由就係被告人承認控罪。因為被告人承認控罪，所以佢可以獲得一般嘅三分之一嘅量刑折扣。因此，就被告人所干犯嘅販運危險藥物控罪，佢係被判處五年八個月嘅即時監禁。 |