香港特別行政區 訴 葉致和

HCCC 419/2019

[2021] HKCFI 3104

香港特別行政區

高等法院

原訟法庭

刑事案件2019年第419號

________________________

________________________

________________________

判刑

以下內容乃法庭數碼錄音謄本

________________________

官：　

被告人喺審訊嘅第一日喺本席面前係承認一項販運危險藥物嘅控罪。

案情撮要就顯示，被告人喺2019年2月10日係被警員截停，咁之後佢係被帶到佢嘅住所作進一步嘅搜查。喺搜查之後，警員就撿獲21.63克嘅「冰」同埋1.85克嘅海洛英。另外，佢哋亦都撿獲咗電子磅、可再封膠袋同埋一啲吸食「冰」毒同埋海洛英嘅工具。咁被告人就承認撿獲嘅一半毒品（即係「冰」毒同埋海洛英）係作販運用途，另外一半就係自用嘅。就呢一點，控方係不作任何嘅反對。

被告人現年就46歲，有多次嘅刑事紀錄，其中涉及毒品嘅罪有九次。2018年12月15日就離開喜靈洲戒毒所。喺被捕之前，就係靠綜援係維持生計。

單就10克嘅「冰」毒，上訴庭嘅量刑指引就係7年，即係84個月嘅即時監禁。如果將涉案海洛英份量嘅一半亦都加入去呢個販運危險藥物嘅「冰」毒裡面，咁毒品嘅總重量就略超係11克，不過就住整體嘅量刑起點嚟講嘅影響係甚微。根據上訴庭嘅量刑指引，如果被告人販運嘅「冰」毒係15克嘅話，咁量刑嘅起點就係88個月嘅監禁。即使被告人販運20克嘅「冰」毒，咁量刑嘅起點亦都只不過係92個月嘅監禁。

咁喺考慮到呢一件案件裡面，即使被告人承認一半係用作販運，咁另外一半亦都係用作管有，管有危險藥物亦都係屬於犯法。咁喺考慮過呢一點，再加上被告人過往嘅刑事紀錄同埋佢離開咗戒毒所之後就再次係接觸危險藥物呢一啲控罪，因此，本席喺考慮過晒所有呢啲情況之後，係以呢個88個月作為係總體嘅量刑起點。

被告人喺審訊嘅第一日（基本上唔係第一日，不過我都視作第一日）承認控罪，根據上訴庭所定下嘅量刑折扣，折扣最多只係能夠可以給予係20個per cent嘅啫，即係百分之二十。咁純單從呢個數學上嘅計算，就係88乘4除5，咁就等於70.4個月，不過嗰點四個月就此作罷喇。因此，就被告人所承認嘅控罪係判處70個月嘅即時監禁。