被告人，你係經審訊之後由陪審團裁定你一項強姦罪名成立嘅，咁另外亦都係你於本年嘅8月2號係承認相關嘅另外一項猥褻侵犯罪。
本案嘅案情係指稱你係喺呢個大概2020年10月19日當日，你係由於本身與案中嘅女童X係住喺同一所嘅大廈，當日你係呢個喺大廈樓下見到佢之後，你尾隨佢一齊進入電梯，咁然後跟住就係佢喺自己住所嘅樓層出咗電梯之後，你亦都尾隨佢出電梯，咁然後就將佢帶咗後樓梯，帶咗去同一座大廈嘅11樓後樓梯嗰度，就干犯本案嘅罪行。
案中嘅女童當時年齡只係12歲，你自己當年係已經夠19歲㗎喇。佢係一名中學生，而且佢同你係互不相識嘅。佢係患有呢個自閉症，同埋有呢個專注不足，同埋過渡活躍症。而法庭最關注嘅，就係佢嘅智商其實只係得78，佢嘅言語理解指數都只係得76。佢無論言語理解能力喇，同埋談吐呀，智力功能，只係屬於係有限嘅範圍。
就係當日由陪審團接受案情顯示，你喺同女童相處嘅過程當中，你就聲稱自己係大學生，係要做一個實驗，女童係根本就唔明白你係對佢進行緊侵犯嘅。喺呢個案件發生嘅過程當中，你曾經係四度將你嘅陰莖插入去佢嘅陰道，每次為時大約係五分鐘。期間你亦都係有四次將你嘅手指，右手嘅中指係--或者係一隻手指係插入佢嘅陰道，亦都係有撫摸佢嘅胸部。咁呢個關於猥褻侵犯嗰個案情我稍後會再詳細講，但係呢個全部係同一件事件入面發生。咁法庭係接受你當中其中係有數次就係要求女童同你進行口交，女童拒絕，但係你冇做到其他任何威逼佢嘅事項。
咁喺你被定罪之後，法庭就住女童係攞咗一個心理報告。根據社會福利署臨床心理學家嘅報告，顯示評估到女童係喺呢件事件之後有呢個逃避同埋創傷後壓力症狀。佢呢個女童喺事件啱啱發生之後嘅幾個星期，佢依然腦海係不斷浮現強姦嘅過程，同埋你嘅面孔，咁樣就係亦都當時影響到佢係無法專心上課，亦都影響到佢嘅食慾嘅。咁就佢盡量避免想起呢次嘅事件，覺得侵犯嘅事件係噁心。而且亦都就此之後，佢嘅危機意識係增加咗，對男性亦都變得更為警剔。雖然事件發生到而家距離已經有兩年喇，但係佢都會刻意迴避事件。咁就呢個臨床心理學家係建議係為佢提供心理治療，以舒解佢嘅情緒困擾。但係由於佢嘅智力問題，其實佢係唔理解佢自身有啲乜嘢需要，因而佢係拒絕咗呢個心理治療嘅建議，咁呢個就係法庭考慮佢嗰個嘅心理報告嗰個範疇。
另外法庭亦都係喺判刑之前，就住你本身就攞咗一個精神科報告同埋一個心理報告。根據呢個精神科醫生嗰個報告入面，顯示你本身係自7歲開始，你就係有呢個專注力不足同埋過渡活躍症，簡稱ADHD，咁你多年來一直係有定期覆診嘅。咁就但係你喺接見呢個醫生嘅過程當中，就住本案嘅控罪你係否認有強姦呢個X喇，咁只係話有撫摸佢嘅胸部同埋外陰嘅。咁就住你呢個ADHA嗰個症狀喇，咁醫生嘅意見就係個症狀其實已經穩定咗落嚟㗎喇。
心理報告方面，呢個法庭係攞咗一個心理報告喇，咁喺就由呢個嘅心理學家就係接見過你喇，係幫你做過嘅評估。咁喺接見你過程當中，就都係同樣地你係否認有強姦過X喇，只不過係承認你一邊手淫，一邊用手指係撫弄佢嘅私處。咁然後心理學家嘅判斷，就係你嘅智能係正常，你有能力去分辨對錯，明白所作所為帶嚟嘅後果。咁而且就係根據評估，就並無任何證據顯示你有戀童癖，或者有其他異常嘅性癖，咁佢評估你嗰個重犯嘅風險係屬於中等。咁就心理學家嗰個建議，係你應該要接受一個心理治療，係去針對你缺乏呢個親密關係，同埋加強情緒管理嘅技巧，同埋防止你重犯嘅。咁正如呢個辯方大律師喺為你求情嗰陣時候指出，似乎就係冇乜嘢，呢個女童並非因為本案係受到好大嘅長遠嘅創傷。
求情嗰陣時候，大律師向法庭指出，而家你就係--現年你已經係到21歲喇，案發期間你係只係得19歲，你係一個過往冇呢個刑事定罪紀錄嘅人士。咁就律師表示，本案嘅案情顯示，你並非係一早有預謀，而且只不過係由於一時衝動之下先至干犯本案。律師強調，X嗰個身體狀況並冇因為今次嘅事件係受到嚴重嘅創傷，咁所以就係律師要求法庭考慮過相關情況之後，就係予以輕判嘅。除此之外，法庭亦都係收到好多封由你嘅親友喇，你嘅鄰居喇，老師喇，係甚至義工喇，同埋你自己本人係交畀法庭嘅求情信。咁律師亦都表示由於你係樂於助人，你其中嘅一名鄰居亦都帶同佢家人今日嚟到法庭係，希望對你係作出一個支持嘅。律師亦都希望法庭考慮，案件審訊期間係呢個辯方方面係冇浪費法庭嘅時間喇，喺需要可以同意嘅案情之下，都係冇提出呢個爭議嘅。
法庭考慮過整件案件嘅案情、你求情嘅因素，包括所有呈遞過畀法庭嘅信件。法庭認為本案比一般嘅強姦案件係有三項加重刑罰嘅因素。首先就係本案嘅女事主X係女童，佢當年案發時非常年幼，只係得12歲。唔只係咁，佢唔只係一個年幼嘅女童，佢甚至係一個嗰個智商能力係比較低於常人嘅，佢嘅智力只係有78分。佢嘅言語理解能力亦都係非常有限嘅。而你就係喺呢個做實驗嘅情況之下，就係欺負佢呢個智力有問題喇，就將佢帶咗去後樓梯同佢做咗呢啲咁樣嘅行為。其實以佢嘅智力，佢係一個唔識得保護自己，冇危機意識，容易受到欺負嘅女童嚟嘅，咁呢個係第一個嘅加刑因素。
第二個加刑因素就係本案你同佢呢個性交行為雖然控罪係一條，但係其實案情顯示就係你當中有四次係將你嘅陰莖插入佢嘅陰道，每次為時係大約五分鐘。咁所以係多過一次呢個性交嘅行為。咁第三樣就係好明顯喇，就係案發嘅期間你係冇採用任何呢個避孕嘅措施，亦都冇用避孕套，咁而令到女童係有呢個風險係可能會有機會懷孕或者染上性病嘅，呢個亦都係法律上視作一個加刑嘅因素。
另一方面，法庭亦都接受辯方大律師喺求情期間有所提及嘅，就係你本身都係一個年輕人，你冇任何刑事犯罪紀錄。咁你本身喺呢宗案件當中，似乎並非係一早有預謀，你似乎只不過係由個大廈樓下𨋢口開始跟住女童，似乎就整件事係由嗰個階段開始。案中你冇用過多嘅暴力，但係因為女童嗰個智力狀態喇，同埋佢係諗住你做實驗喇，其實你都唔需要用任何武力去干犯本案嘅罪行。但係幸而本案嘅女童喺事件當中冇受到過大嘅傷害，佢嘅創傷報告亦都似乎顯示佢冇一個長期嚴重嘅傷害。
考慮過案件所有嘅情況之後，就住呢個強姦嘅罪名，法庭認為量刑起點應該係5年監禁。然後再加上考慮到我剛才提及嗰三項加刑因素，會將總刑期係提高去到總共七年半監禁。有鑑於你嘅年紀，同埋曾經律師提及過嘅所有求情嘅因素，法庭係運用酌情權減刑三個月。所以就住強姦嘅罪名，法庭判處你嘅監禁係七年三個月。
此外你喺案件審訊之前喇，喺今年嘅8月2號，就係就住呢宗案件係承認一項猥褻侵犯嘅罪名。咁樣其實個情節就係喺剛剛所提及強姦嘅過程當中，你就係將你嘅右手中指插入女童嘅陰道喇，咁樣就同埋亦都係伸手入佢嘅衣服入面係撫摸呢個女童嘅身體，包括佢嘅胸部。喺你承認控罪當天，係有關呢個到底有幾多次將手指插入女童陰道，呢個辯方代表你係作出一個爭議嘅。咁你只係承認話曾經插入過一次，而唔承認就係呢個插入四次。但係案件審訊期間，如果根據女童X嘅證供，其實你有四次嘅，每一次為時都有數分鐘之久。
咁考慮過你嗰個全部案件嘅案情喇，呢個本案亦都係牽涉嘅事情係同一日，同一件事件入面發生。亦都考慮過同樣係律師提出嘅求情因素喇，呢個係同強姦罪名嘅求情因素亦都係相同嘅。咁就法庭認為就住猥褻侵犯嘅案件，個適當量刑起點係三年半監禁，三年半嘅監禁。咁就住你係承認該項嘅控罪，你應該係獲得一個刑期上嘅扣減。雖然你係有爭議到底有幾多次將手指插入女童嘅陰道，但係有鑑於求情期間所提及嘅因素喇，咁法庭認為係行使酌情權，依然係容許你有三分一嘅刑期扣減，而冇因為你爭議其中嘅有幾多次用手指插入佢陰道呢件事，畀你少過三分一嘅刑期扣減。因此就住你認罪減咗三分一嘅刑期，你呢個猥褻侵犯嗰個罪行，法庭係判你總共28個月監禁，即係兩年零四個月監禁。
案件係同一件事情，當中發生只不過係兩種唔同刑事罪行嘅行為，因此法庭下令就住猥褻侵犯嗰個監禁，係與強姦嘅監禁係同期執行，因此你就住本案呢兩項控罪嘅總刑期，法庭判處你係七年三個月嘅。