被告C.F.L.原本係被控十項控罪嘅，咁當時初初被控嘅時候，被告就喺裁判官席前承認七項，呢七項就本來嘅一、二、三、七（原文照錄），都係呢個普通襲擊罪喇，即係毆打罪喇，違反普通法同埋可以根據香港法例第212章個《侵害人身罪條例》嘅第40條嚟懲處嘅。另外四、五、八（原文照錄），就係俗稱「非禮」喇，即係猥褻侵犯，就係違反咗香港法例嘅第200章《刑事罪行條例》嘅第122（1）條。咁呢七項控罪當然被告就係因為已經認咗罪喇，所以就係交嚟高等法院度係判刑嘅，嗰件案件就係HCCC 161/2021嘅。
咁另外，被告人唔認罪嘅就嗰三項控罪分別就係話呢個對Y非禮喇，仲有對X係強姦喇，同埋係話襲擊X，導致佢身體受到實際嘅傷害嘅。咁嗰件案件個號碼就係HCCC 160/2021，咁嗰件案件就係由本席連同呢個陪審員一同係去審理喇。咁喺審訊嘅時候，就被告人因為自己其實都認咗係有非禮到X嘅，就不過就唔承認係有強姦佢，咁所以就喺審訊中間就加咗呢個交替嘅控罪，即係話強姦就交替有個非禮，即係呢個猥褻侵犯嘅控罪嘅。咁當然被告你喺審訊嘅時候係承認話有非禮喇，咁但係控方就唔接納被告呢個認罪，咁所以繼續審喇。咁最後係陪審員要決定究竟控方能唔能夠令到佢哋肯定被告人你係有干犯到你面對嗰三項控罪喇。
咁喺審訊之後，陪審員就一致裁定你係冇非禮到Y，亦都冇強姦到X，亦都冇話襲擊X，令到佢身體受實際嘅傷害，而係根據你自己承認咗嘅情況，陪審員就裁定你係有非禮到X嘅，咁嗰件就喺160嗰件案件。咁即係話我而家就喺呢個案件裡面，變咗有四項係普通嘅襲擊，即係呢個毆打喇，就四項係非禮案，而家我要判刑嘅，係總共八項控罪。
咁好喇，講番呢件案件，嗰啲案情係兩宗，即係160同161都係有關嘅。就係話X就喺1983年嘅3月出世嘅，Y就喺1980年嘅1月，咁佢哋係兩姊妹，咁佢哋嘅爸爸就有個妹妹，即係姑姐喇，咁姑姐就有兩個仔，即係被告你係其中一個喇，就1976年出世嘅，你有個大哥，咁就叫做「大表哥」喇，咁有個女喇，叫做「表姐」，咁被告你就被稱為係「二表哥」嘅。咁呢個成家，即係姑姐成家當時事發嘅時候住喺大埔嘅。咁X同Y細個嘅時候，喺暑假嘅時候，佢爸爸就會送佢哋去姑姐個屋企，即係大埔呢個屋企就過兩個星期咁樣喇，就係喺1990就已經做㗎喇。咁喺1990之前，其實佢哋都有話暑假呀，放暑假喺嗰個大埔嗰度地方度住㗎喇。
咁1990嘅時候，分別X就係7歲，Y就係10歲，而被告你就14歲。咁喺1990年嘅時候，當X同Y留喺姑姐屋企嘅時候，啲大人就去番返工嘅，咁就同埋去--表姐咪做暑期工嗰啲喇，就留番淨係被告人就--即係日頭嘅時候，得被告你同埋X同Y喺嗰個樓宇入面嘅。
咁好喇，關於161，被告你承認咗嘅案情入面，咁首先就第一同第二項控罪都係話呢一個普通襲擊罪喇。咁就話喺日頭嘅時候，即係1990年8月，日頭得番你同兩個喺屋企嘅時候，咁X同Y就喺表哥你哋嘅睡房度玩喇，咁有一次就X就睇到Y就背對住呢個睡房嘅門，你就企喺佢個面前，就用你個手嘅拳頭抌Y個肚，咁Y個樣睇落就痛嘅，佢就話「唔好再打喇，太痛喇。」咁樣，咁但係就你照再打咗佢，再打多佢一拳嘅。咁跟住你就叫X喇，企番喺Y嗰個位，咁然後就你又係用個拳頭打X個肚兩次，咁令到X係痛嘅，咁呢兩項就分別係打X同打Y喇。
咁另外，第三項控罪亦都係普通毆打，或者普通襲擊喇，普通毆打罪。咁另外一次就當時又係得你喺屋企喇，同兩個表妹喇，咁佢哋兩個又係食完飯之後就喺表哥你哋兩個個房度玩喇，咁你就入嚟，就叫佢哋兩個講啲廣東話嘅字嘅，咁就跟住佢講完之後就話佢哋講得唔正喇，咁跟住就打咗X個肚係兩至三下，咁X當時就覺得好痛嘅，咁X就叫你話唔好打佢，咁你就再打多佢一拳添。咁跟住仲同佢話「唔好話畀人哋聽」，尤其唔好話畀姑丈聽。呢個係第三項控罪。
咁第四同第五項控罪就係呢個非禮喇。咁另外一次又係1990年嘅8月，冚𠾴𠾴唥都係1990年8月㗎喇，咁當時X就喺表哥嘅房入面喇，咁被告你入咗嚟，就叫佢做個「倒豎蔥」喇，咁X照做喇，咁佢就見到被告你就企喺佢面前喇，咁就佢就覺得你嘅手指係有喐過佢嘅面褲同埋底褲，咁令到佢個私處係露出嚟嘅，大概係十秒鐘喥，咁佢亦都覺得就你個手指尖有掂到佢呢個陰道嘅開口大概一秒鐘。
咁另外一次就係同樣喇，被告你就做同樣嘅嘢喇，即係話要佢做一個「倒豎蔥」，咁然後就係掂佢個面褲同底褲，令到佢嗰個私處係露出嚟，又掂到佢嗰個陰道嘅開口大概一秒鐘。咁X就話佢冇將呢兩次嘅事件話畀人聽，因為佢當時仲係好細個，佢當時淨係知道嗰個係去小便嘅地方，佢唔知道係一個性器官，佢亦都唔知道話點樣去保護自己，唔好畀人哋係睇到佢嘅性器官嘅，咁亦都擔心如果佢講畀人哋聽會畀被告你你打嘅。咁呢個就係四同五個控罪。
咁七同八就係分別係呢個毆打同埋非禮罪喇。咁呢次就係喺頭先所講嗰啲發生晒之後㗎喇，咁有一日，喺1990年嘅8月嘅下晝，咁當時X就喺表哥房度玩緊喇，咁被告你就打咗X個肚就四至六下，咁X覺得好痛，但係唔夠膽去話反抗喇，咁打完之後，被告你就叫佢做一個「倒豎蔥」，咁佢照做喇，咁然後跟住被告你又再同樣係話用隻手係擝開佢個褲，等可以睇到佢個下體喇，今次係睇咗大概十秒鐘。咁而你嘅手指亦都係掂到佢個私處，即係呢個陰道嘅開口大概一秒鐘嘅。咁跟住就叫佢企番正。咁過咗幾日之後，X就話畀姑姐聽話佢要返屋企喇，咁但係姑姐就話「唔好喇，玩多幾日喇。」咁。咁就呢啲事件，X係冇接受到任何嘅治療或者睇醫生咁嘅。
咁控方嘅講法就係話喺呢一啲X被非禮嘅情況，Y係在場嘅，但係被告就否認，佢嘅意思話佢唔肯定Y係咪在場喇。咁本席喺呢件案件判被告嘅時候，係以嗰個基礎係當時淨係得佢同X一齊嘅啫，即係話本席都唔能夠肯定Y係在場嘅。
咁好喇，咁喺1990之後發生咩嘢事呢？咁1990、1991開始以後，跟住X同Y就冇再去姑姐屋企度過呢個暑假㗎喇。咁跟住就當姑姐成家人去X同Y屋企，即係過年呀（過新年），因為嗰陣時個阿爺、阿嫲仲在生吖嘛，咁過年喇，咁X就話佢都唔同被告講嘢嘅。咁1995年就阿嫲過咗世之後，咁姑姐屋企就成家人就冇再嚟喇。
咁喺2018年嘅10月，X同Y當時就喺呢個WhatsApp傾偈喇，咁嗰陣因為Y其實已經搬咗去澳洲住嘅，咁Y就預備帶個女返嚟香港探親咁樣，咁所以喺嗰個WhatsApp度傾喇。咁當X知道咗Y會請被告你同埋其他姑姐嘅屋企人去飲茶，佢就好嬲，咁跟住X就話畀Y聽，話就係叫佢要小心啲，因為好多時呢啲性侵犯會係被一啲屋企--識嘅人、熟人嚟做嘅，叫佢小心自己個女咁喇。咁後屘X就係亦都係同大表哥同埋表姐係接觸咗，咁叫佢哋唔好請被告你去參與呢個屋企嗰啲嘅聚會喇。咁同一晚，X亦都係有聯絡你喇，係用呢個e-mail或者係用呢個WhatsApp就講番話你對佢做過啲咩嘢事咁樣。咁被告當時同佢講話咁既然佢--佢唔想見佢喇，就以後都唔會再見佢喇，咁亦都X就話以後唔想見到你喇，咁你就話好，就講咗對唔住，就話你唔會再出現喇。咁後屘喺2018年嘅10月26號，X就去咗報案。咁呢個係你承認咗嗰個案情喇。咁仲係同一件事喇，你承認咗話拉你嘅時候點情況。
咁警方拘捕咗你喇，咁後屘就有一個警誡嘅錄影會面嘅，咁喺警誡錄影會面你就承認咗以下嘅情況喇。就首先你承認你同X、Y之間嗰啲表兄妹嘅關係喇，就話佢哋的確係有喺暑假嘅時候嚟你屋企度住兩、三個星期。咁當時亦都警方畀咗你睇番你同X之間嗰啲WhatsApp嘅對話，咁你有道歉嗰啲對話喇，咁你就承認話你係有非禮到X嘅，亦都有打過X，就因為當時就係因為X係屋企人好鍾意佢，佢變咗係個重心，咁你就好妒忌佢嘅情況嘅。咁亦都承認你係有叫到X做呢個「倒豎蔥」嘅，咁亦都係話你曾經係因為好奇嘅緣故，係有睇過佢個下體嘅，有喐過佢嘅內褲同埋面褲喇，去睇佢個下體嘅。
咁你亦都話，喺個錄影嘅時候已經承認，話有一次當X係做緊呢一個「倒豎蔥」嘅時候，你曾經用過個2A嘅筆芯電係去掂佢個陰道，咁就可能有插到啲啲咁多入去都唔定，但係X一話痛，你已經即刻停手喇。咁又有兩次你係叫X做呢個「倒豎蔥」嘅，咁你都唔記得咗有冇叫到Y做「倒豎蔥」喇。咁而亦都有試過多過一、兩次你係有打到X個肚嘅，但係其實打咗幾多次就唔記得喇。咁亦都話有打到Y個肚嘅，因為你係嬲佢，妒忌喇。
咁跟住後屘就唔知點樣喇，屋企人就發現咗原來你有打過X喇，咁你爸爸仲打你喇，即係罰你喇，咁就所以你就相信屋企人其實已經知道你係有打過同埋有非禮過X呢件事件㗎喇。咁你個哥哥喇，所謂叫「大表哥」嗰個喇，你哥哥亦都有問過你點解你去打X同埋打Y，咁你當時都解釋咗話你係因為妒忌嘅。咁就承認你係對兩個表妹打佢哋嗰啲情況係愈嚟愈過分，喺嗰個警誡錄影會面都承認警誡--話愈嚟愈過分，亦都承認係有性侵X喇，咁亦都係話你揀去侵犯X，因為X係細個啲。而下面--呢啲全部就係頭先講晒呢個你承認咗嗰七項控罪嘅案情嘅。
咁好喇，160，話你唔認罪嗰個情況係點呢？咁頭先已經講咗喇，因為陪審員係裁定你冇非禮到Y，冇強姦到X，亦都冇打到X，令到佢身體受實際傷害喇，咁而陪審員裁定你係有非禮到X，係根據你自己喺嗰個錄影會面同埋喺法庭度講嗰個情況喇。咁你當時亦都喺法庭度講就話當時你係點樣令到X做咗呢個「倒豎蔥」喇，咁然後你就揭佢嘅底褲去睇佢個私處，咁嗰次因為你想研究多啲，咁就試過就將個2A size嘅筆芯電係擠落去X嗰個陰道，但係X一話痛你已經即刻係停止咗，咁呢個就變咗係160嗰個嘅案情喇。咁變咗被告你其實就係承認咗係打咗X就三次，就打咗Y一次，咁然後你就係承認有非禮咗X係四次喇。咁而每次非禮X都係叫佢做「倒豎蔥」，咁然後就當佢係倒立嘅時候，就係揭開佢嘅內褲去睇佢個私處嘅。咁最後嗰次你就做多咗，就係話直情試埋用呢個筆芯電係擠落佢嗰個私處嘅。
咁好喇，求情嗰方面同埋你嘅背景喇。咁你而家47歲，就其實係有--當然喺而家呢啲嘅控罪定罪之前係冇任何嘅刑事紀錄嘅，係單身嘅，係同爸爸、同埋家姐係一齊住，你媽媽已經喺2005年係過世嘅。咁被告亦都係有呢一個大學嘅文憑嘅，係呢個市場喇，我諗叫做 “marketing” 喇，同埋engineering（工程系）喇，咁亦都係就呢一個marketing同埋呢個關於嗰啲叫做 “brand management”，係咪凡係啲名牌嗰個情況喇，即係牌子喇，你係有一個證書嘅，advanced diploma。咁你喺1995年開始已經係一路都有工作嘅，即係受僱嘅，咁就喺唔同嘅公司做喇，又做過係售貨喇，又做過係同呢一個accounts有關嘅職位嘅。咁因為呢件案件其實係押後咗好多次，一方面又係因為新冠病毒嘅緣故喇，咁所以變咗就你就冇再做一個正職，就辭咗職，等可以處理呢件案件。
咁辯方代表律師喺求情嘅時候都已經話被告你對於犯咗呢啲事都深感後悔，同埋就都知道自己細個嗰陣時候做咗啲咁嘅嘢係好唔啱，咁亦都係好清楚睇到一拉咗之後你係全部承認晒你自己所做過嘅嘢喇，同埋你喺嗰個錄影會面嗰度亦都係全部交代晒你曾經做過啲乜嘢嘅。
咁被告你本人其實都有寫到封信畀法庭嘅，就其實上次都已經喺法庭度讀咗出嚟㗎喇。咁喺嗰封信都睇到你就係表達番你喺事發嘅時候同埋喺而家發生咗呢個事，即係被拉之後，你個心聲係如何喇。咁呢啲嘅講法其實都同你喺個法庭度畀緊口供嗰陣時候係吻合嘅，即係你講法就係話你一來就轉咗去中學嘅時候就畀人蝦喇，受到欺凌喇，而另外，就係你覺得兩個表妹嚟到屋企度就成為家人嘅寵愛嘅中心，所以你非常之嘅妒忌喇，咁你就覺得自己當時，三十幾年前喇，用呢個武力嚟對付嗰兩個女仔，又打佢哋個肚，因為係自己妒忌喇，而家就覺得好醜、好慚愧，咁亦都好後悔係因為係對性有呢一個好奇嘅情況就去非禮咗X嘅。
咁你就係堅持話其實只不過喺非禮X嗰啲情況就只不過係好--即係嗰個接觸係好少嘅啫，唔係話接觸好耐嘅。咁亦都你都唔知道--即係打X同打Y都係喇，唔係話打好耐好耐，咁但係就唔知道原來佢哋係冇放開呢啲事嘅，唔知道原來佢哋咁多年來都係將你係點樣侵犯佢哋嘅事係記喺個心裡面嘅，咁而直至到你收到X嗰個WhatsApp，你先至知道原來對佢哋嘅傷害係咁深。咁你就話你其實去非禮X，純粹係因為對性有好奇嘅啫，完全唔係話因為有性慾去侵犯嘅，因為嗰陣時你都唔知道性係乜。
咁同埋你話因為X係用你做「性罪犯」咁嘅言詞嚟形容你喇，所以令到你自己就好震驚，因為你冇諗過你自己會係性罪犯嘅。咁亦都覺得對X同Y係帶來咗呢啲不可抹煞嘅傷害喇，都好後悔，感到好醜。咁亦都三十幾年嚟，你自己話其實都唔敢講呢件事，咁其實而家拉咗之後，見咗光喇可以講，咁就希望兩名嘅受害人能夠話將呢件事件就擠開喇，唔好再影響佢哋將來嗰個生活喇。咁被告你亦都係話你願意去承擔，因為干犯咗呢啲嘅控罪嗰個全部嘅責任嘅，亦都對X同Y同埋佢哋嘅家人係致以呢一個嘅歉意。
咁你話其實你自己一路以往經常盡量去做好人㗎喇，所以你就唔會同個法庭去話「我應承我會做好人」，因為你一向已經做緊一個好嘅人㗎喇，咁你亦都係決心你喺嗰個判咗之後，你係會繼續係做一個好嘅人，唔會去犯事喇，咁希望法庭係畀個機會你，等你可以過番一個正常嘅生活嘅。
咁而辯方大律師求情嘅時候，亦都好強調一點，就係話你當時係只係14歲嘅啫，要考慮番你犯案嘅時候嘅年齡，唔係考慮你而家嗰個年齡吖嘛。咁同埋你係--變咗如果當時係拉咗你嘅話，你得14歲，就係少年犯嚟嘅，咁就會喺少年庭度審嘅，咁所以亦都希望本庭係考慮嘅時候，就係假如你當時已經係被拉嘅話，喺少年庭會得到啲乜嘢嘅懲罰嘅。
咁辯方律師亦都係向本席提及一件案件，係叫做陳志滔嘅，咁呢件案件同你呢件案件有少少相同喇，即係所謂叫做「歷史嘅案件」喇，嘅意思話好多年後先至發現到有件咁嘅事喇。咁嗰個被告係38歲，咁喺當時就話佢係曾經係三十幾年前係非禮過呢個7歲嘅--即係幾似你喇，又係7歲，又係表妹喇，佢當時就14歲。咁喺呢件案件法庭就判咗佢12個月嘅呢個感化嘅，咁當時就係控方提出呢個刑罰上訴嘅，話太輕，咁而上訴庭係考慮咗之後，就接納因為當時14歲嘅被告係一個年輕人喇，就對性好奇，就冇干預到呢一個嘅判刑嘅。咁辯方律師就係特別強調嗰個嘅案件。
咁辯方律師亦都係強調，就話雖然你係表哥，X係表妹啫，但係就唔算係話違反誠信咁嘅情況嘅，即係話你喺一個位置係對表妹有一啲嘅關係，令到你可以利用呢個關係去侵犯表妹，咁呢個係辯方嗰個嘅求情。咁辯方亦都要求就話由於當時你係年紀咁細喇，已經係咁耐以前發生嘅事，亦都係自己和盤托出，咁希望本席考慮係判一個非監禁式嘅刑期。咁喺上次我就係將件案件押後咗，攞一個報告喇，一方面就係感化官報告同埋係咪適合做呢一個社會服務令嘅報告。
咁我有個報告返咗嚟喇，咁個報告都好詳細嘅，就係一位叫做劉生，Simon Lau寫嘅。咁劉生不單止係畀關於被告你嗰啲資料嘅詳情，仲畀埋你屋企人嗰啲資料嘅詳情畀我嘅，喺個報告嗰度。咁簡單啲講喇，其實你同劉生講就基本上同你喺嗰個錄影會面同埋喺法庭講嘅係一致嘅，都係講個情況係咁。咁被告亦都係特別強調，你係深深好後悔呢件事件。咁劉生特別提到，佢就係覺得被告你就冇話利用時代久遠喇，就咋啼話「打得甩嘅」，就去唔認，反而就係話係一早已經係承認咗你自己嗰個嘅過錯嘅。咁而被告人同埋你屋企人都係要求法庭就係唔好判你去坐監嘅。
呢位劉生嘅感化官佢亦都講話當佢將嗰個分別喇，即係如果係感化有啲咩嘢嘅、如果係做呢個社會服務令係有咩嘢情況，解釋晒畀你聽，咁你都同感化官講就話你認為你係唔需要接受感化，由個感化官去督導你咁嘅情況，認為唔需要，不過你係願意係做呢一個社會服務令，等係用一個冇薪嘅情況去做呢個社會嘅工作嚟彌補番你嘅過錯，對個社會係有啲貢獻咁嘅，同埋幫助啲需要有幫助嘅人。咁劉生自己都覺得喺呢件嘅事件就唔--話呢個感化令都係唔適合嘅，咁佢話睇到你就係--對於呢個社會服務令有一啲嘅要求嘅，咁佢覺得你係符合嗰啲要求，亦都有呢啲咁嘅社會嘅工作係畀你做到嘅，咁你又身體適合喇，又嗰個生活正常，有好嘅家庭支持，同埋佢哋check過晒，就認為你呢件嘅個案係適合去做呢一個社會服務令嘅，咁而亦都認為被告人你係一個合適嘅人可以做社會服務令喇。咁劉生嗰個建議就係話如果法庭係批准，就係做200至240個小時嘅社會服務令嘅。
咁好喇，咁本席當然要喺考慮嗰個刑期嘅時候或者個判刑，本席就考慮到所有嘅案件喇，所有嘅事件都係好耐以前發生喇，1990年嘅事，咁當時被告你係14歲，咁兩名受害人分別係7歲同10歲，係去到2018年，即係三十幾年後先至係話揭發咗呢件事件嘅，咁而由被告人你一被捕之後嗰個嘅反應同埋做過啲乜嘢，我就接納你係真誠後悔你喺當時仲係年輕嘅時候對X同Y做過啲乜嘢。咁同埋事實上我都接納被告你冇話利用件事件發生咗三十幾年前喇，就乘機去搏話「或者X同Y啲證供冇人信呢。」咁你就話唔認罪，反而就係好早已經係全盤托出自己做過啲乜嘢、做過啲乜嘢。
咁雖然係有一個審訊喇，因為被告你唔認罪吖嘛，你唔認嗰三個控罪，即係話非禮Y、強姦X同埋襲擊X，導致佢身體受到實際嘅傷害，但係你當時其實已經認咗係有非禮到X嘅，咁而陪審員亦都係裁定你全部其他--即係你本來面對嘅控罪係罪名不成立，只係因為你自己認咗個緣故，係裁定你非禮X嘅罪名成立嘅。咁所以其實等於所有八項控罪你都係認咗罪嘅，咁本席會以呢一個基礎嚟睇喇。
咁本席去考慮恰當嘅判刑嘅時候，當然本席都要記住當時你只不過係14歲喇，即係一個少年犯喇可以講，咁我亦都接納你之所以打X同Y，係因為係妒忌，係認為佢哋係得到家人嘅歡心。你之所以去非禮X，亦都係因為對性有好奇，咁所以去非禮X嘅。咁而你非禮--或者你打先喇，你打X同Y，都係話用拳頭打佢哋嘅，打佢哋嘅肚喇。
而非禮X，全部都係要X做呢一個「倒豎蔥」，咁然後就因為佢「倒豎蔥」嘅緣故，變咗你就容易可以揭起佢嘅面褲同埋底褲，去睇佢嗰個私處嘅。咁而一次較為嚴重嘅非禮，就當然係最後嗰次喇，你自己都講話用嗰個筆芯電係想插入去佢個陰道去做呢個調查嗰次喇。咁當然，我亦都要考慮到如果當時1990年嘅時候你係被捕，然後去指控你，咁好可能係會判你一個非監禁式嘅刑罰嘅，因為當時你仲係一個少青犯。咁除咗而家面對已經承認咗個控罪會有一個刑事紀錄之外，你係一路都係嗰個生活正常，工作正常，係冇任何嘅刑事紀錄嘅，亦都係讀書讀到有呢個學位都相當高㗎喇。
咁我考慮咗有一件案件喇，就係叫做R v Brown嘅，嗰件案件其實就講咗喺啲咩嘢情況之下係適合一名被告可以有呢一個社會服務令嘅。咁首先就係要係第一次犯事喇，又或者係就算有犯過事，嗰啲案底都係好輕微，咁你好明顯就第一次犯事喇，喺呢件案件嚟講；咁就家庭個背景方面係平穩喇，最好就有埋家庭支持喇；就有好嘅工作紀錄喇，一係就已經係做緊嘢，又或者就算唔係做緊嘢，都有一個好嘅機會係會有嘢做嘅；咁同埋係顯示到真誠嘅悔意喇；同埋就係話重犯嗰個機會係微嘅。
咁被告你好明顯就第一次干犯事件喇，同埋係有呢一個好嘅家庭背景，雖然你冇結到婚，你淨係同爸爸同埋家姐住，但係你嗰個家庭背景嘅基礎係好嘅，就亦都有一個好好嘅工作嘅紀錄喇。咁而你之所以而家冇做到嘢喇，或者冇一個長嘅工作，係因為你要面對呢個審訊，所以唔想有份長工，咁但係好明顯，呢件事件完咗之後，你係會有一個好明顯有個機會係會做番一個正當嘅工作喇。咁而你亦都係好顯示到你嘅真誠悔意，我就認為基本上係冇呢一個險係話你會重犯，唔好講話輕微喇，咁亦都冇乜呢個險會重犯呢個咁樣嘅罪行。咁所以被告你係適合做呢個社會服務令嘅人嚟嘅。咁我都認為喺呢件嘅事件要你做一啲冇薪嘅工作，係為個社會做工作，令到你係可以報答番社會，貢獻社會，係亦都幫助其他人，會係一個恰當嘅做法，所以我係會--加上你自己都係願意做呢一個社會服務令，呢個係其中一個需要嘅條件嚟嘅，咁喺咁嘅情況之下，本席就所有呢啲嘅控罪都係判你去做呢一個社會服務令，就係總共240個鐘頭。