楊世傑，你係面對一項販運危險藥物嘅罪名，違反香港法例134章《危險藥物條例》嘅第4（1）同埋（3）條，咁你喺裁判官席前已經承咗控罪，係交付嚟高等法院原訟庭判刑嘅。
咁睇番嗰個案情，即係你承認咗嘅案情喇，其實好簡單嘅案情。因為當時你就揸住架車喺登打士街嗰度行嘅，咁差人見到你就覺得你可疑喇，就截停你，叫你落車。咁你就唔做嘅，即唔係即刻按照佢哋嘅指示去做喇，仲去掙扎嘅，咁終於就拉咗你落車喇，你仲想走添，不過走唔到，你喺登打士街走咗冇幾耐就已經畀差人追到㗎喇。咁最後梗係捉到喇，就搜你身冇嘢嘅，就帶番你到架車度搜喇，喺架車度就喺一個打開咗嘅裝嘢嘅地方，就搵到--即係喺兩個seat位中間有一個袋，一個袋入面就袋住總共係有六包嘅嘢喇，咁啲詳情本席就唔讀出嚟喇，可以講就係有一包「冰」毒喇，就15.2克，一包就係呢個亦都係「冰」毒嚟嘅，就係8.13克。另一包就係82.1克，全部係「冰」毒，咁仲有一包就係4.2克，咁另外就少啲嘅，0.45克就係呢個可卡因，同埋另外一包就有10克嘅呢個ketamine，即係氯胺酮。
咁就係後屘--即係一個袋袋住呢幾樣毒品喇，三樣嘅毒品喇，分開六包。咁後屘喺個袋度就搵到你嘅DNA嘅，即係後屘驗嘅時候喇。咁當然喺現場就未知喇，現場拉你，咁就拉你販毒喇，問你攞身份證，你就交唔出嘅。警誡你之下，你就話「我咩都唔知，啲嘢唔係我嘅」咁。而當時你身上就有$2,964.2，同埋有個手提電話嘅。後屘就同你做個錄影會面喇，咁錄影會面嘅時候，你就保持緘默，即係唔講嘢喇，冇回答問題嘅。
咁而喺拉你嗰陣時喇，係2021年嘅3月吖嘛，當時計番嗰個市價，嗰啲毒品嘅市價，呢個「冰」毒價值係62,328鈫，可卡因788鈫，係用呢個粉狀喇，如果係呢個crack cocaine（霹靂可卡因），就係$1,038，咁氯胺酮就係值7,520鈫。夾埋晒就係呢個--即係睇嗰個可卡因，一係就粉狀，一係就霹靂吖嘛，咁即係話$70,636，或者係$70,886喇，即係呢兩個價錢中間。咁被告你喺裁判官席前都承認咗話喺事發嘅時候你係明知而管有呢三樣嘅毒品，而嗰個用途係作非法販運嘅，咁就係用呢個案情係罪名成立嘅。
好喇，講你個背景同埋求情陳詞喇。被告你係單身嘅，39歲，咁讀書就讀到去中學三年班喇，係未拉之前，同媽媽同阿哥一齊住嘅，咁就話一個月賺大概係30,000鈫。咁你就有三--即係有三次嘅紀錄係同呢個販運毒品有關嘅，另外有五次係藏有，即係管有危險藥物，另外亦都有兩次係話管有一啲工具可以吸食毒品嘅。喺求情嘅時候，你嘅律師鄺律師就話被告你當時係因為經濟嘅環境，因為受到呢一個疫情嘅影響喇，所以係好愚蠢咁諗住搵快錢，所以犯呢件案件嘅，就幫人哋係做帶家喇，帶呢啲毒品。咁最初被告你本人，就係話部份嘅毒品係你愛嚟自己食嘅，因為你其實係有毒癮嘅，咁亦都先前有呢個同毒品有關嘅罪行紀錄喇。咁鄺律師亦都指出喇，你當時--即係拉咗你嗰日，有帶到你去食美沙酮嘅。
鄺律師亦都係向我提出咗有關「冰」毒呀，呢個可卡因呀，同埋呢一個氯胺酮有關判刑嘅案例，譬如譚伊真，Pedro Nel Rojas同埋劉德明，呢個Hii Siew Cheng咁。咁呢幾個案件都係講到就係--同埋佢亦都提及一件案件喇，就係話如果嗰個被告人，當時去販運嘅毒品其中有部份畀自己食，係可以作為一個減刑嘅因素，咁有兩件嘅案例佢提供咗一個就係江達隆，一個叫做周俊生嘅。咁鄺律師就話，因為個「冰」毒夾埋晒係109.65克喇，咁就係相對之下係比較嚴重啲嘅毒品同埋份量亦都大喇，所以佢就係要求就係話用呢個「冰」嚟做個基礎嚟計喇。鄺律師就話，佢當時寫嘅陳詞，就係話嗱，咁嗰個可卡因就得0.48克，而氯胺酮就10克，咁夾埋晒都係整個毒品份量𥚃面嘅0.4個per cent，同埋8.32個per cent，咁就要求本席就係唔好理嗰兩樣喇，淨係用個「冰」毒嚟計咁樣。
咁亦都當時鄺律師就係提供咗一個莊顯珍（譯音）嘅案件或者莊顯陣（譯音）嘅案件嚟支持佢呢個論點嘅。本席喺睇咗佢嗰個書面嘅陳詞之後，我就要求鄺律師係做一個列表出嚟，就係話將嗰三個嘅測試，一個就即係荒謬喇，一個係話兌換，同埋一個係以呢個比例嘅測試，就係計晒三樣，即係唔計嗰兩樣，全部計晒出嚟畀本席。咁我書記通知咗鄺律師之後，鄺律師就真係畀咗呢個列表喇，即係將列表畀本席喇。咁就亦都係用109.65克嘅「冰」毒嚟做個底嚟計嘅，咁如果係109.65克嘅「冰」毒就係十一年八個月。而呢個本身分開每樣毒品計，如果0.48克嘅可卡因，就係25.73個月，即係多過兩年少少喇。而10克嘅氯胺酮就應該係4年，咁如果用呢個荒謬嘅測試呀，同埋呢個兌換嘅測試，同埋呢個比例嘅測試，計咗出嚟分別就係142.51個月，140.94個月，同埋137.47個月，呢三個數。
鄺律師就話睇咗當時啲毒品喇，同埋嗰個份量，承認咗嘅案情，被告人你嗰個--即係喺呢件事件擔任嘅角色，同埋你嘅背景，佢就認為十一年八個月，即係140個月就係適合㗎喇。鄺律師亦都係倚賴兩件嘅案件，一件叫做陳浩然（譯音），一個叫做郭家偉（譯音），就話雖然被告人你係有販毒嘅前科，咁不過最後嗰次都成八年前喇，就要求本席就係喺加刑嗰方面唔好加得咁勁，即係加少啲咁嘅意思喇。咁而鄺律師亦都係話，考慮到有部份嘅毒品--因為被告人你話有部份毒品係你自己食吖嘛，咁佢就話就應該係十一年三個月已經夠㗎喇，即係本來咪十一年八個月㗎嘛，即係鄺律師喺嗰個書面陳詞就係話可以減啲，咁就係用呢個十一年三個月，然後畀三分一嘅刑期扣減，因為認咗罪，咁夾埋就係七年零六個月喇，咁呢個就係基本上係鄺律師嗰個書面嘅陳詞喇。
咁而被告嗰方面，辯方亦都畀咗一封信就係求情信嚟嘅，就係一位姓陳嘅社工寫畀本席嘅，呢位陳社工就係話佢自從2015年開始，已經一路跟住被告人你呢個個案㗎喇，佢話你就出番嚟之後喇，當然坐完監之後喇，咁就都已經係奉公守法，就一路都係接受呢個社工畀你嗰啲嘅支援喇。咁就話但係發生咩事呢，就話喺2020年嘅時候你就識咗個女士喇，咁就發展咗成為密友。而呢位女士即係借咗就100,000鈫畀你，就去買架二手嘅貨車，等你就可以去幫人搬貨嚟賺錢喇。咁但係因為呢個疫情嘅緣故，所以被告人你就收唔夠order喇，咁就即係根本就賺唔到夠錢。就開始欠債喇。呢位本來好親密嘅女友，就猛要求你還錢還錢還錢，結果你就因為覺得係受到各方面壓迫喇，即係經濟上，咁於是就畀人哋𧨾，就再去幫人販運毒品喇。咁你就已經係非常之後悔，亦都覺得好羞恥，就承諾會將來係努力做嘢，照顧家庭，會回饋社會。咁就呢位陳女士亦都要求本席輕判你喇。咁今朝被告你本人都係寫咗封信畀本席喇，咁其實你一方面係表達你嘅悔意喇，另一方面，你都係講番同一件事畀我聽喇，就係話點解會犯呢件事喇，點樣識咗個女士，咁點樣就借咗錢要還錢，都係同一件事喇，你都係要求本席係畀次機會你嘅。
喺我未講我點樣去決定嗰個判刑之前，我都提一提就係主控係都接納鄺律師計嗰個數，即係就嗰三個測試計出嚟嗰個數係冇爭議嘅。
咁好喇，以下就係我判刑考慮嗰啲情況嘅。首先呢個販運危險藥物係非常之嚴重嘅罪行喇，你都唔係第一次更加已經知喇。如果一個人係因為喺公訴程序之下嚟被定罪，係可以判監禁係終身監禁，同埋呢個罰款係$5,000,000，即係可以睇到幾嚴重。咁而因為今次販運係超過一種嘅毒品㗎喇，所以可以有兩個形式做嘅，一係就獨立逐件嚟睇，然後加埋晒幾多嘅刑期，或者係一個混合式嘅做法。咁首先睇番佢哋每樣毒品嗰個份量，根據個量刑指引係咩先。咁而109.65克嘅「冰」毒，根據譚伊真嗰件案件，就喺70至300克呢個範疇喇，咁所以嗰個量刑起點係11至15年嘅。而可卡因呢，就因為根據呢個Pedro Nel Rojas嗰件案件，就係話佢 同呢個海洛英可以一齊咁樣計法喇。海洛英嗰個案例就係劉德明喇，咁10克就係兩年至五年，即係嗰個範疇。而呢個氯胺酮就係10克，咁根據呢個許守城嗰件案件，如果係販運1至10克，嗰個起點係兩年至四年。咁睇過之後，當然呢個就係最適合嘅做法，本席認為係應該用個混合式，即唔係逐個單開嚟計，用混合式。
咁好喇，而家本席跟住個做法，因為係多過一種毒品，用混合式呢，咁有一個案例就係叫做Islam S M Majharul，咁嗰個就有七個步驟嘅，上訴庭講。咁而另外一個叫做Herry Jane Yusup嗰件案件，即係就唔係話講混合嘅，就咁講毒品，就有六個步驟。咁本席就將呢七個步驟同六個步驟夾埋晒一齊嚟睇喇，即係逐個步驟嚟睇應該點樣判刑。咁首先第一喇，就係用咗最基本嗰個，邊樣做基本嚟計咁，頭先講咗喇，即係「冰」毒同埋可卡因，同埋呢一個氯胺酮，本席係用「冰」毒嚟計，呢個第一步。咁第二步就係根據呢個「冰」，109.65克，就係十一年八個月嘅，即係等於140個月，咁呢個第二步。咁第三步睇咩呢？就係話雖然鄺律師係話嗰個氯胺酮好少啫，嗰個可卡因好少啫，就唔使計喇咁。但係本席嘅睇法唔同，即係雖然佢都有提到案例嚟支持，但係本席嘅睇法唔同。因為你睇番其實可卡因係兩年嘅，而個氯胺酮係四年嘅，本席覺得唔可以就咁話唔計算，本席覺得應該要計埋落去，雖然佢哋嘅份量好細，咁所以就係計晒落去之後，本席都睇咗頭先讀咗出嚟嗰三個測試嘅計出嚟嘅數喇，咁本席就認為140個月係啱嘅，用呢個，咁就第三步喇。咁第四步就睇你嗰個--即係喺呢件事件做嗰個角色，咁本席都接納你係一個「帶家」喇，我哋所謂叫做courier嘅角色。咁不過本席又要考慮，雖然本席話咗係140個月喇，你係做帶家喇，咁但係有三樣毒品吖嘛，咁三樣毒品梗係嚴重過一樣毒品喇，因為可以供應畀多啲唔同嘅人喇，本席就加多兩個月，所以142個月喇，okay？
咁然後跟住就考慮就有冇其他嘅加刑因素喇，咁加刑因素係咩呢？喺呢件案件，因為你已經有三次係販毒嘅案底，今次係第四次，唔好講其他藏毒嗰啲唔計喇，淨係計販毒你都係已經第四次，所以唔可以唔加刑嘅。不過本席都考慮到係成八年前喇，咁就加四個月，okay？咁即係夾埋晒就係應該係146個月，唔該大家一齊開始計，因為我一路計住，我都驚我計錯。咁好喇，呢個係第六個步驟喇。咁第七個步驟係咩呢？就係話本來被告你係話某部份嘅毒品係自己食㗎嘛，咁但係被告你就講唔出究竟而家畀警方已經檢取咗嘅毒品，呢六包三樣毒品𥚃面，係有幾多係畀自己食吖嘛，講唔出吖嘛。咁本席畀你同你個律師商談過之後，因為當時--即係話定畀你聽喇，就係話如果睇番周俊生嗰件案件，如果嗰啲毒品話愛嚟自己食嗰啲，冇番一個相當嘅份量，根本係唔會有減刑嘅因素，咁所以畀你有機會同你嘅律師傾咗之後，被告你就唔再倚賴呢一個範疇喇，就唔再話係自己食喇，所以變咗本席喺呢個第七步，本席就唔需要畀任何扣減你係話愛嚟自己食㗎喇。
咁跟住就再睇，就係呢個求情嘅因素喇，咁就第八步喇，第八步即係被告你認罪喇，亦都係喺最早可以認罪嘅情況已經認罪喇，咁本席就畀你三分之一嘅刑期扣減。雖然其實你一啲都唔合作㗎喎，當時又唔認，又想走，又要差人追你，撳低你，本席都照畀番你三分之一嘅刑期扣減，因為你的確喺最早嘅時候已經認罪，係慳咗法庭嘅時間。咁本席計過，用146個月，根據扣咗三分一之後，應該就係八年零一個月，可唔可以你同我計一計？呢個就係第八步，應該係97個月，如果冇記錯。咁97個月就係八年零一個月。
咁好喇，最後一步就係話刑期整體嚟睇，退後一步睇睇呢個刑期係點呢？咁本席退後一步睇睇，本席覺得減一個月，8年適合㗎喇，咁所以就而家呢個你個非法販運危險藥物呢個罪行，你就要坐8年監。明白喇嘛？明白，大家清楚，係咪？Okay。