被告錢平被控一項企圖強姦罪，違反香港法例第200章《刑事罪行條例》第118（1）同埋159G條，被告人否認控罪。經審訊之後，陪審員係以五比二嘅大比數裁定被告人呢個「企圖強姦」罪罪名不成立，但係一致裁定被告人就呢個較輕微嘅罪行，即係「猥褻侵犯」罪就罪名成立。「猥褻侵犯」罪就係違反香港法例第200章《刑事罪行條例》第122條。
講番個案情，唔爭拗嘅事實就喺2023年6月25號，當時X係一位來自內地嘅遊客，佢就去光顧被告人做嘢嗰間嘅按摩店，當時被告人就喺嗰度做嘢，被告人就係幫X按摩嘅按摩師。根據X嘅證供，話當時佢就係喺按摩房入面嗰張床上面趴喺度就接受按摩，而X當時已經係換上咗一套黃色嘅上衫同埋短褲，就係被告畀佢嘅，咁就接受按摩。
X同被告傾咗一陣，冇幾耐X就已經瞓咗覺，因為X當日已經係周圍去行街，所以好攰，後屘差唔多時間夠嘅時候就被告叫醒佢，因為X仲係好攰，所以X就要求加鐘，結果就加咗鐘，因為X真係好攰，所以繼續瞓，喺第二節嘅時候X瞓咗嘅。
X瞓瞓下嘅時候就覺得喺佢個背部--呢個下半部，即係下半身就有啲好重嘅嘢砸住佢，同埋有啲嘢係壓向佢嘅陰部，即係私處，令到佢係醒咗。當時佢發覺佢著嗰個黃色嘅短褲同埋佢自己著住嘅內褲已經係被拉下到去到佢個膝頭哥以下嘅位置，於是佢擰轉身去睇下佢後面嘅情況，就見到被告人喺嗰按摩床嘅後面，就係面褲同埋底褲都拉低咗，露出咗佢係勃起咗嘅陽具。
當時X就非常震驚，就尖叫，就拎起佢嘅電話即刻衝落樓，就向樓下嗰啲人作出投訴，話被告人係非禮佢、強姦佢。當時有個女嘅按摩師同X講話「冇啲咁嘅嘢嘅，冇可能發生嘅，妳可能誤會嘅啫。」X因為得唔到任何職員嘅幫忙，於是佢就用自己嘅手提電話就向警方報案。
喺等緊警方嚟嘅時候，佢仲講緊個電話，佢就已經上番去樓上就攞番佢自己嗰啲衫，但係佢冇換到嘅，佢只係手揸住嗰啲衫，當時仍然係著住被告畀佢嗰套黃色嘅衫褲。佢喺街度，即係喺對面馬路等警察嚟，當時佢個情況非常之激動，係嚎哭嘅。然後跟住女警嚟到，於是女警就將佢帶咗上去警車度。喺佢平靜咗落嚟之後，佢就將發生嘅事係講咗畀個女警聽。
被告都有畀口供，被告畀口供就畀咗一個非常之唔同嘅情況。佢話就係X同佢傾偈，講講下就講咗一夜情話題，最後仲講到X自己都想要一夜情，X就引領被告雙手就去摙佢個胸部，即係乳房，同埋跟住X自己拉低佢嘅短褲同埋底褲，預備可以性交，所以被告就擒上床，就預備同佢性交。當時就將佢自己嗰個橡筋褲擝低，露出咗佢陽具。當佢係掂到或者壓向X個下體（即係陰部）嘅時候，X突然間就話要1,000鈫，被告就還價，就話「咁唔收妳兩個鐘頭嘅按摩錢喇（即係400鈫），咁得唔得呢？」X就唔肯。終於因為咁傾唔成，所以被告就冇同X發生性行為，被告擒番落床。
當時擒番落床之後，X就調番轉身，即係又再趴咗喺度，但係又冇擝高褲，又冇擝高底褲，咁咪露咗佢臀部囉，於是被告就攞條大毛巾冚住X個屁股，跟住就繼續同X按摩，就按摩X嘅小腿。但係因為當時個慾火未消，所以被告就靜靜雞自己就去--佢用嘅講法就「打飛機」，即係自瀆，直至係佢射精為止，當時X係唔知道呢樣嘢嘅。被告自瀆完畢之後，佢就抹番隻手，即係抹乾淨左手，跟住就繼續同X係按摩佢嘅小腿，點知X突然間彈起身，就話佢強姦，跟住就X落咗去下面，去要求話--即係衝落去樓下話被告強姦佢，被告跟佢落去都只不過係想安撫佢嘅啫。
好明顯，因為陪審員一致裁定被告人係非禮X罪名成立，即係話陪審員根本唔接受被告呢個講法。陪審團一定係接納被告係有做到X所講嗰啲嘅情況，先至係裁定佢非禮罪罪名成立，即係猥褻侵犯罪罪名成立。陪審員只係唔能夠肯定被告當時有一個懷住去強姦X嘅意圖而作出咗一啲行為係超乎咗呢個只係預備嘅工夫。雖然咁講，但係被告人所做嘅嘢都係一個非常之嚴重嘅猥褻侵犯，所以判刑嗰方面一定要嚴懲。
喺未判刑之前，本席曾經要求兩位大律師睇下搵唔搵到係相類似嘅案件，即係話與按摩師非禮顧客嘅案件嚟幫助本席。控方就提供咗總共五宗案例，但係其中只係兩宗係同呢個按摩師有關。而嗰兩宗案件一宗係喺裁判處度處理，一宗係喺區域法院處理，即係話冇一啲高等法院嘅上訴庭畀關於按摩師非禮顧客嘅案例。而嗰五宗案件其實辯方都係提供相同嘅案例，不過辯方就話搵到頭嗰四件，就搵唔到最後嗰宗嘅。
最主要講番嗰個按摩師係非禮嗰個顧客嘅案件，其實一宗就係呢個裁判處嘅案件，嗰個人只係罰咗9個月嘅啫。但係另一宗就係喺區域法院，嗰個18個月監禁，但係兩件案件其實最主要--即係案情同呢件案件係唔同嘅，最主要嗰個範疇就係話一個按摩師去非禮一個顧客係屬於違反誠信咁解嘅啫，係呢兩件案件個官都係咁講。
而其他嘅案件，譬如陳青豪（譯音）嗰件案件最主要都係話法庭喺考慮呢一類性侵犯案件、性罪行案件嘅時候，就要顧及三個範疇。判刑一方面係要有阻嚇作用，要阻嚇其他人去干犯同樣嘅事件；另外係顯示到社會對呢一啲咁嘔心嘅事件係顯示不滿；同埋係要去安撫嗰個受害人同埋佢嘅屋企人、佢朋友嗰個嘅情緒，所以呢三個範疇都要兼顧到。基本上最主要係呢三樣。
就第一件案件，控方同埋辯方都有提到，因為嗰件案件亦都係一個被告人本身係被告企圖強姦，而後屘陪審員係裁定咗係非禮嘅，即係話呢個猥褻侵犯罪罪成，但係當然嗰件案件嘅案情同呢件案件亦都係非常之唔同。本席喺考慮判刑嘅時候都已經考慮咗呢五宗案例㗎喇。
講番背景先，根據嗰個口供，同埋被告人喺法庭講嘅證供，都知道佢係喺內地出世，喺四川出世，而家就已經係45歲。根據佢講，就因為娶咗個香港居民，所以就嚟咗香港，佢自己話就2006，不過政府嗰方面就冇一個準確嘅紀錄話佢究竟幾時嚟，總之佢就嚟咗香港。被告自己就話佢嚟咗香港之後，就同呢個第一位太太就離咗婚，之後就再結婚，有個19歲嘅仔。佢喺內地讀書讀到中學嘅三年級。佢嚟到香港之後一路都係做按摩師，佢其實做按摩師嘅工作做咗成二十幾年㗎喇，就冇案底嘅。
梁大律師代表被告人求情嘅時候就話畀本席聽，喺案發嘅時候被告人就大概一個月係賺20,000鈫喥。梁大律師都接受呢件案件係一個違反誠信嘅案件，亦都接受話--即係陳詞就話因為X係一個遊客，所以都係令到案件係嚴重。
梁大律師要求本席考慮被告人係冇案底，即係喺量刑嘅時候考慮佢冇案底。同埋亦都講到被告人係家庭嘅唯一經濟支柱，所以被判監之後，屋企就會有呢一個困難，即係財政方面有困難。另外一個求情嘅說話就係話被告人重犯嗰個機會係微。
以下就係本席考慮嘅量刑。首先根據法例，一個人如果係公訴之下被判猥褻侵犯罪罪名成立，即係非禮另一個人，係可以被判處到10年監禁，即係刑期都唔短，10年監禁。咁而呢一類嘅案件係冇量刑指引，因為非禮案其實每件案嗰個案情都可以好唔同，可以由好少，譬如就咁摸一下，甚至去到係近乎強姦嘅情況。其實嗰個判刑都係要睇番嗰件案件實際上嘅案情係乜嘢，然後嚟考慮嘅。
呢件案件本席就認為被告人係向X非禮嘅情況唔可以講係輕微，因為其實本席就覺得係好嚴重。被告當時係向X提供呢個按摩服務嘅按摩師，X係同意畀被告人摸佢嘅身體，係以一個按摩師嘅身分去摸佢嘅身體，而唔係去非禮佢嘅。而被告人好明顯當時就係利用嗰個機會，就見到X瞓著咗覺，熟睡，所以佢自己就起咗一個邪念，為咗要去滿足佢自己呢一個性慾，佢就將X個短褲同埋內褲係擝低，然後將佢自己露出個陽具係壓向X嘅私處，即係個陰部。當然，當呢個被告人係用佢自己嘅陽具去壓向或者係掂到X嘅私處，呢個係相對話如果佢係用手嚟做，係嚴重好多。
亦都正如被告嘅代表大律師梁大律師接受，亦都係喺呢個張貴生（譯音）呢件案件入面，個法庭亦都係咁樣嘅決定，就係話當一名按摩師係去非禮一個顧客嘅時候，呢個係涉及違反誠信嘅，所以被告人當時去非禮X係一個違反誠信嘅情況。
本席個睇法，本席都認同喺呢個陳青豪嗰件案件所講嗰三個範疇，即係話判刑嗰個刑期係要夠阻嚇作用，本席就認為係要對被告人本身要有阻嚇作用，同埋對其他人有阻嚇作用；亦都要係清楚顯示到社會大眾對呢啲咁樣嘅行為係憤怒嘅，會顯示係不滿、憤怒嘅情況；同埋呢個X好明顯喺呢件事係受到好大嘅委屈，係受到好大嘅困擾，而一定要去安撫到佢同埋佢屋企人或者接近佢嘅人，朋友、親戚都好，係安撫佢哋呢啲嘅情緒，所以個判刑一定唔可以輕嘅。
喺考慮晒所有呢啲嘅情況之後，本席就認為被告人所做咗呢啲嘅情況，3年嘅量刑起點就恰當，呢個量刑起點已經係以被告人係冇案底嚟計。而本席都明白到，被告人係被監禁，一定會對佢屋企造成某程度上財政上嘅困難，但係呢個唔係一個求情理由，喺呢件案件冇其他嘅求情理由係將呢個3年嘅刑期係扣減，所以就猥褻侵犯罪，被告係要坐3年監。