恆益物業管理有限公司 訴 陳仰淇

HCMP2203/2007

香港特別行政區

高等法院原訟法庭

高院雜項案件編號2007年第2203號

----------------------

----------------------

主審法官：高等法院原訟法庭法官任懿君

審訊日期：2008年9月25日

宣判日期：2008年9月25日

----------------------

判 案 書

----------------------

1.今日係關於被告人陳先生上訴關於余敏琦聆案官喺6 月13 號判決原訴人得直，可以得到收樓同埋扣押，之後呢就然後收樓同埋出售令。咁陳先生就不服，因而上訴。

2.咁佢個理由呢係其實係講番由磐古初開嘅呢件案件嘅形成。其實呢件案件其實係好簡單嘅，就係大廈佢住果個大廈嘅管理公司呢告佢係冇埋管理費。咁嗰個時間呢係由99 年9 月，根據陳先生講呢，到到06 年10 月19 號呢段咁悠長嘅時間佢冇俾管理費，又加埋啲利息，咁出票果日呢係06 年10 月19 號。咁呢，嗰個案件嘅編號係DCCJ5205/2006。咁陳先生話呢，呢啲嘅案件已經過咗時限嘞，6 年，咁當然啦，就唔係全部過時限，可能係第1 個月第2 個月係可能過咗時限，但呢啲喺而家所提出呢亦都係唔會被准許嘅。個原因呢就係呢件案件呢已經審理完畢，就已經錄咗個判詞、最終嘅判決。

3.陳先生亦都係曾經為此上訴，上訴駁回。其後呢，就再申請進一步嘅上訴呢係得唔到批准。咁所以呢件案件究竟陳先生有任何答辯或者有任何理由，都已經今時今日再提出嚟嘅時候呢，係冇意思嘅，亦都係唔會被批准嘅。除非佢能夠成功擱置到呢一個嘅判決，咁然後先至可以對今日2007 年雜項2203 號呢件案件就有影響，如果唔係呢，個最基本嘅事實就係佢係爭咗管理公司呢筆款項。

4.咁法庭已經判咗呢個款項出嚟，如果佢唔畀嘅時候呢，嗰個嘅後果呢就好似英文嘅講法，就係夜晚就會跟住日唞咁肯定。咁當然如果唔畀，咁管理公司冇其他辦法，就係一定要申請扣押佢嗰個而家有嗰個嘅呢一層樓個資產，然後跟住攞呢個收樓同埋出售令。所以佢講話咩超過6 年追索時限呀，呢個問題呢係完全係呢件而家喺我席前嘅案件呢係唔可以再提嘞。

5.至於佢其他話喺上一次開庭嘅時候6 月13 號佢冇得到呢一個對方律師嘅書面陳詞，咁其實對方係已經係事實上遲咗嘅，兩點半開庭呢佢嗰朝早已經交咗畀法官，係有違實務指引嗰個嘅準則。但係呢，對方阿鄭律師話當時係交咗呢一份嘅英文嘅陳詞畀佢，咁當然陳先生今日話畀我聽佢其實係冇收到嘅，對方話即係完咗先至畀佢咁樣。我對呢一樣嘅講法呢，係有啲懷疑。點解呢？因為如果律師公然喺余聆案官嘅席前話我一陣先畀佢啦，咁嘅時候余聆案官准許佢哋咁樣做嘅呢，就係有啲奇怪。

6.但無論如何，就算陳先生講嘅講法係啱呀，都係唔會影響到呢件案件嗰個嘅上訴，即係唔會成為一個上訴理據，因為陳先生好清楚話畀我聽佢完全唔識英上嘅，咁畀咗佢同唔畀佢呢都係即係佢都唔知裡面講乜嘢。最主要呢，阿鄭律師話畀我聽呢，係余聆案官呢要求佢哋用中文講一次喺庭上，咁呢一點呢，陳先生呢亦都係冇反駁嘅。所以我睇唔到有任何不公允不公道嗰個嘅程序。

7.最後呢，就陳先生呢就話「最後要求高等法院就DCCJ5205/2006給予本人進行上訴」。咁呢一點就係無可疑問係我係冇呢個管轄權去做呢樣嘢。呢件案件陳先生已經進行咗上訴，上訴又駁回，駁回之後佢又進一步上訴，得唔到上訴批准。咁我以為我以一個小小嘅原訟庭嘅法官呢，係完全冇司法管轄權再畀佢去上訴嘅。如果係有果陣時候真係天下大亂，因為上訴期度完全用晒之後，又去返原訟庭又問一個法官嚟到畀呢個上訴准許，咁佢又再去上訴。上訴一大輪時間佢又駁回，駁回之後再進一步上訴，佢又不批准，咁又去另外一個原訟庭嘅法官，又可以得到上訴准許進行上訴，咁樣咪天下大亂永遠都唔會完永遠都收唔到層樓。係咪吖？

8.綜觀陳先生今日列舉咁多嘅上訴嘅理由呢，都係唔成立嘅。所以呢，就上訴呢係駁回。咁當然呢，陳先生上咁多次法庭，佢知道如果係輸咗官司會被對方嘅律師費用。雙方對呢一方面有咩陳詞呀？如果陳先生冇嘅時候，鄭律師你認為你想點樣吖？

[律師陳詞]

9.鄭律師，即係你哋上次去余聆案官果陣時呢，就遲咗交呢個書面陳詞，今次呢係完全冇準備，如果你又要簡易程序去釐定，咁又完全冇準備。咁我呢…

[律師陳詞]

10.咁凡事都係有第一次，但應該知道除非你係一個好悲觀嘅人諗住呢上訴對方得直，咁所以你唔去準備呢樣嘢。如果你喺呢件案件裡面睇到上訴人嘅誓章裡面4 點呢，你會覺得佢根本冇上訴嘅理據嘅，你係贏梗嘅。咁你都唔去準備一個簡易程序嘅釐定呢，我又覺得有少少奇怪。不過呢，上訴因為你哋得直呢，你哋贏咗呢，咁當然訴費係歸你哋所有。咁而家你冇準備呢一個簡易程序嘅釐定呢，我唯有呢就係落一個命令呢，就係你去到一個聆案官嘅席前，用簡易程序嘅方式去釐定。如果雙方唔能夠同意個金額嘅話，當然你可以畀你嗰個金額對方，睇吓佢同唔同意，如果佢唔同意，你就我而家嘅指引係你去一個聆案官度去訂一個日子嗌佢釐定。

11.其實呢個好簡單啫，你用咗幾多個鐘頭，你係做咗幾多年律師，咁你嗰個收費應該准許幾多錢。咁係好簡單啫。你唔駛再返嚟我嗰度，如果你返嚟我嗰度呢你排期好耐嘅。我就指引你，不過你自己要小心一啲，就係要諗吓個後果，後果如果你以後通常法官一定問你，咁你係想點樣收你個訴訟費呢，係咪即刻用簡易程序釐定，而家簡易程序係好普遍嘅，咁所以就好多律師都係話我冇準備到喎，不過又要簡易程序釐定，你唔第第一個，但係即係我希望你呢一個咁嘅風氣呢，就即係唔好再繼續落去嘞。

原告人：由周啟邦律師事務所委派鄭德燕律師代表。

被告人：無律師代表，親自出庭應訊。